Ióvo 20 - Библия - Пэ Балтитко Романи чиб (Романэс) 2019

Софароскирэ Патерья (Молитвы) пэ Фуе Манушэ́ндэ

¹ И Софаро Ноамостыр отпхэндя́ лавэ́нца:

² “Акэ, со́скэ мирэ́ ду́мы дэ́на отпхэныбэ́н ма́нгэ, и ваш дова́ мэ сыгнякиравапэ.

³ Мэ шундём, сыр ман зоралэ́с бангякирдэ, и ладжакирдэ́, и миро ду́хо (фа́но) отпхэнэ́ла пал ма́ндэ адя́кэ, сыр мэ ґалёвава.

⁴ Ци на джинэ́са ту, со дава́ исын ґаратунэ́ бэршэ́ндыр тэды, сыр ману́ш явдя́ пэ свэ́то (лот),

⁵ со фуй мануша́ свэнкинэна кэ вучипэ́н наґара (надлугэс), и со фуе́-манушэ́нгири ра́дыма урикирэлапэ фэ́ни (то́ка) минута (мэнта)?

⁶ Мэк лэ́скири пышныма тэ ґаздэлпэ кэ болыбэ́н, и лэ́скиро шэро́ тэ тырдэлпэ кэ о́блоки,

⁷ нэ ёв хасёла пэ сарэ́ ве́ки сы́рбы лэ́скирэ отбросы, со́са ёв псирэ́на яври́. И кодолэ́, кон дыкхця́ лэс, пхэнэ́на: “Кай исын ёв?”

⁸ Ёв вурняла криг сыр годэнгиро суно́, и лэс на латхэ́на; и ёв вари-кай хасёла, сы́рбы зданки раты́.

⁹ Якха́, со дыкхнэ́ лэс, на дыкхэ́на буты́р, адя́кэ-паць и лэ́скиро штэ́то.

¹⁰ Лэ́скирэ чхавэ́ явэ́на тэ дэн палэ ловэ́ чорорэнгэ, а лэ́скирэ васта́ рискирэна палэ саро́ пэ́скиро барвалыпэ́н.

¹¹ Лэ́скирэ кокалы́ исын пхэрдэ́ лэ́скирэ-тэрныпнаскирэ грэхэ́нца, нэ ёнэ хасёна лэ́са кхэтанэ́ дро пра́хо.

¹² Мэк тэ кэрэ́л биба́хт исын сы́рбы гудло́ хабэ́н дро лэ́скиро муй, и ёв гаравэла ла тэл пэ́скири чиб,

¹³ мэк ёв и тэ пригаравэл ла, и тэ на мэкэл ла: а ёв рикирэ́ла ла дро пэ́скиро муй;

¹⁴ дава́ лэ́скиро хабэ́н дрэ виндырья ячэ́ла шутло, и пирикэрэлапэ дрэ сапэскири трута андра́л лэ́стэ.

¹⁵ Ёв накхадя (глытындя) барвалыпэ́н, нэ ёв чадэла лэ́са палэ: о Дэвэ́л тырдэла яври́ зорья́са дава́ барвалыпэ́н, аж пэрэстыр.

¹⁶ Ёв явэ́ла тэ жуинэл мэрибнытконэ сапэскири трута; нэ саплынякири чиб мулякирэ́ла лэс.

¹⁷ Ёв на явэ́ла тэ дыкхэ́л рэкицы, рэ́ки (лэня́) со тхадэна авгинэса и тхуляса.

¹⁸ Ёв дэ́ла палэ дова́, со ёв дорэсця́ пхарэ́ бутя́тыр, ёв нашты́ тэ накхавэл ла; ёв на явэ́ла тэ радынэ́лпэ кофостыр, со ёв дорэсця́ пэ́скирэ рэндостыр.

¹⁹ Пал-дова́ со ёв притасадя и мэкця́ чорорэн, со ёв нахратэс заухтылдя кхэр, саво́ ёв на газдыя.

²⁰ Ваш лэ́скири ґалкима ёв на откхинёлас, ёв нисо́ на зракхця́, соб (кай) ёв тэ закамэл.

²¹ Ёв исыс прохаибнаскиро, и нисоса зракхцяпэ лэ́стыр: ваш-дова́ со лэ́скиро миштыпэ́н на явэ́ла ґара́ тэ урикирэлпэ.

²² На дыкхи́, со лэ́стэ исын пхэрдо́ миштыпэ́н, ёв явэ́ла дрэ бари траш; кажнонэ́ – Манушэ́скиро васта́, конэ́скэ ёв кэрдя́ бари би́да, явэ́ла пэ лэ́стэ.

²³ И явэ́ла адя́кэ: ёв явэ́ла пэ на́бут (куты́) скэдыно́ тэ пхэрдякирэл пэ́скиро пэр, то тэды Дэвэ́л бичхавэ́ла пэ лэ́стэ Пэ́скири хачкирды холы́, со дэ́лапэ сыр брышы́нд пэ лэ́стэ.

²⁴ Ко́ли ёв и нашэла криг марибнытконэ́ састырэндыр, тэды бронзытко лу́ко пусавэла лэс пирда́л (скрозь).

²⁵ Ёв потырдэла саструны буст яври́ масэ́ндыр, ёй выджа́ла, и адя́кэ-паць выджа́ла зяиндлы острима пэ бустякиро яго́ро (ко́нцо) пирда́л жэлучытко буко: трашаибэ́н пэрэ́ла екх пал екх пэ лэ́стэ.

²⁶ Пхэрдо́ калыпэ́н чхакирэла лэ́скиро барвалыпэ́н: яг, сави́ нико́н на мурдякирэла, ха́ла сарэ́са саро́, со ячэ́лапэ дрэ лэ́скири ша́тра.

²⁷ Болыбэ́н сыкавэ́ла лэ́скиро чорипэ́н, и пхув ґаздэ́лапэ пэ лэ́стэ.

²⁸ Лэ́скирэ-кхэрэ́скиро прибарипэн хасёла, а лэ́скиро миштыпэ́н лыджа́на криг барэ́ панинга́ дро дывэ́с, сыр Дэвэ́л холясо́ла тэ сэндинэл.

²⁹ Кадасави исын фуе́-манушэскири до́ля Дэвлэ́стыр; ґа́да, исын лэ́скиро миштыпэ́н, со Сарорикирибнаскиро Дэвэ́л отчхиндя лэ́скэ.”