Ióvo 2 - Библия - Пэ Балтитко Романи чиб (Романэс) 2019

На́лачхо Спробинэла Иовос Нэвэ́стыр

¹ И сыс дывэ́с, ке́ли Дэвлэ́скирэ чхавэ́ (Янго́лы) явнэ́ тэ сыкадён анги́л Растэ-Дэвлэ́стэ, и на́лачхо адя́кэ-паць явдя́ машки́р лэ́ндэ тэ сыкадёл анги́л Растэ-Дэвлэ́стэ.

² И пхэндя́ Рай Дэвэ́л налачхэскэ: “Каты́р ту явдя́н? И на́лачхо отпхэндя́ Ра́скэ-Дэвлэ́скэ и пхэндя́: “Мэ псирдём одори́к и палэ пир пхув и штадём пир пхув упрэ́ и тэлэ́.”

³ И Рай Дэвэ́л пхэндя́ налачхэскэ: “Ци придыкхцянпэ ту пэ миро дына́ри Ио́во? Нанэ ние́кх ману́ш пэ пхув, кон тэ явэ́л адасаво́ бидошэ́нгиро и дэвлы́тко, саво́ дарэ́ла Дэвлэ́стыр и обрикирэла пэс тэ на кэрэ́л биба́хт? И саво́ сарое́кх рикирэ́лапэ зоралэ́с дро пэ́скиро бибангипэн, на дыкхи́ пэ дова́, со ту подхачкирдян ман пэ лэ́стэ, соб (кай) Мэ тэ хасякира́в лэс би причынакиро.”

⁴ И на́лачхо отпхэнэ́лас Ра́скэ-Дэвлэ́скэ и пхэндя́: “Цы́па пал цы́па, и, чачо́, ману́ш саро́ отдэ́ла пал пэ́скиро джиибэ́н.

⁵ Нэ ту протырдэ анги́л Тыро́ васт и чилав лэ́скирэ кокалы́, и, лэ́скирэ маса́, и подыкх, ци бахтякирэ́ла ёв тут [ёв, чалэ́с, кэрэ́ла прокошыбэ́н (арман) пэ ту́тэ кэ муй Тыро́-ю.о.].”

⁶ И пхэндя́ Рай Дэвэ́л налачхэскэ: “Акэ, ёв исын дро тыро́ васт, нэ ту зра́кх лэ́скиро джиибэ́н.”

⁷ И на́лачхо гия́ криг Ра́стыр-Дэвлэ́стыр, и ёв дукхадя Иовос холямэ́ проказаса (дукханэ франсэнца) ґэрьякирэ подэшватыр кэ лэ́скиро шэро́.

⁸ И лыя́ Ио́во ваш пэ́скэ котэ́р (куско) чэрепичнонэ пирьятыр, соб (кай) лэ́са тэ рандэл кокоро́ пэс; и бэсця́ ёв машки́р пра́ска (пе́пло).

⁹ И пхэндя́ лэ́скири ромны́ лэ́скэ: “Ту сароекх рикирэсапэ зоралэ́с дро пэ́скиро бибангипэн. Прокош (кэр арманя) Дэвлэ́с и мэр.”

¹⁰ Нэ ёв пхэндя́ ла́кэ: “Ту ракирэ́са сыр е́кх пхарэ́-шэрэскирэ джувлендыр, сави́ пхэнэлас: амэ адя́кэ-паць дорэсцям лачхипэ́н Дэвлэ́стыр, и ци амэ́нгэ адя́кэ-паць тэ на прилас биба́хт?” Пало́ саро́ дава́ Ио́во на пхэндя́ грэ́хо пэ́скирэ уштэ́нца.

Иовоскирэ Трин Мала́

¹¹ И явнэ́ трин Иовоскирэ дру́ги (мала́), ке́ли ёнэ шундлэ́ пал сари́ биба́хт, со пыя́ пэ лэ́стэ. И кажно (сва́ко) лэ́ндыр явдя́ пэ́скирэ штэто́стыр: О Элифазо Феманостыр, о Вилдадо Савхеятыр [Шуахостыр-ю.о.], о Софаро (Цофаро) Наамитостыр; и ёнэ доракирдэпэ тэ явэ́н, соб (кай) тэ тугинэн лэ́са, и соб (кай) тэ подрикирэн лэс дро ду́хо (фа́но).

¹² И сыр ёнэ ґаздынэ́ пэ́скирэ якха́ дура́л, тэды ёнэ на пинджкирдэ (на ґалынэ́) лэс; ёнэ дынэпэ тэ ровэ́н зоралэ́с. Кажно лэ́ндыр рискирдя́ пэ́скиро урибэ́н, чхурдыя́ пра́хо упрэ́ пэ болыбэ́н пэ пэ́скиро шэро́.

¹³ И ёнэ бэшнэ́ кхэтанэ́ лэ́са пэ пхув пэ эфта́ (битринэ́нгиро дэш) дывэса́ и эфта́ ратя, и ние́кх лэ́ндыр на пхэндя́ лав лэ́скэ, пал-дова́ со ёнэ дыкхнэ́, со лэ́скэ сыс древа́н пхаро́.