Ióvo 19 - Библия - Пэ Балтитко Романи чиб (Романэс) 2019

Иовоскиро Отпхэныбэ́н: “Дэвэ́л Затэрдёла Пал Ма́ндэ”

¹ И отпхэндя́ Ио́во дасавэ́ лавэ́нца:

² “Ци бут жа явэ́на тумэ́ тэ мэнчынэн миро ди, и тэ пхагирэн ман пэ котэра́ лавэ́нца.

³ Кадава́ ужэ исын дэш мо́лы, со тумэ́ обракирэна ман, тумэ́ на ладжана тэ дурьякирэн ман.

⁴ И мэк тэ явэ́л, со мэ дыёмпэ дукха́, и мэк мири́ дукх тэ ячэ́лпэ ма́нца.

⁵ Ко́ли тумэ́, чачэс, камэ́на тэ барьякирэ́н пэс анги́л ма́ндэ, и тумэ́ чхувэ́на анги́л мири́ бипатыв проти ма́ндэ,

⁶ то тэды джинэ́н, со адава́ Дэвэ́л чхурдыя́ тэлэ́ ман, и дава́ Ёв обгия трусця́л ма́ндэ Лэ́скирэ кхудяса (мирежаса).

⁷ Ѓа́да, мэ да́ва го́дла: “Нахратыма пэ ма́ндэ”, ман на шунэ́на; ко́ли мэ да́ва го́дла сарэ́ зорья́тыр, тэды нанэ сэ́ндо.

⁸ Дэвэ́л чхудя́ тыно пэ миро дром, со мэ нашты́ тэ проджав, и Ёв росчхудя́ калыпэ́н пэ мирэ́ дрома́.

⁹ Ёв чорьякирдя тэлэ́ ма́ндыр миро барипэ́н, и Ёв злыя́ мири́ крали́тко стадык мирэ́ шэрэстыр.

¹⁰ Ёв роспхагирдя́ ман сарэ́ ригэ́ндыр, и ма́нгэ явэ́ла саро́, а миро ужакирибэ́н пэ лачхипэ́н Ёв вырискирдя сыр кашт.

¹¹ Ёв адя́кэ-паць захачи́я холя́са пэ ма́ндэ, и Ёв гинэ́ла ман пал екхэ вэргостэ.

¹² Лэ́скирэ халадыбэна явнэ́ кхэтанэ́, ёнэ росчхувэна лагерё (лод) трусця́л мири́ ша́тра.

¹³ Ёв дурьякирдя мирэ́ пшалэ́н ма́ндыр, и мирэ́ пинджкирдэ мануша́ дурьякирдэ пэс сарэ́са криг ма́ндыр.

¹⁴ Мири́ сэмэ́нца ячкирдя́ ман, и миря мала́ бистырдэ ман.

¹⁵ Мирэ́-кхэрэ́скирэ мануша́, и мирэ́-штубакирэ дынарицы (слугицы) гинэ́на пал чужонэ́ манушэ́стэ, мэ сы́рбы сом явирэ-тхэмэскиро ману́ш дрэ лэ́нгирэ якха́.

¹⁶ Мэ кхара́ва мирэ́ дынари́с, и ёв на отпхэнэ́ла ма́нгэ, и мэ тэды штылэ́с манга́ва лэс пэ́скирэ мо́са.

¹⁷ Мири́ ромны́ брыдинэла мирэ́ духо́стыр и сыр мэ дыхинава, дава́ исын джунгало́ мирэ́ пшалэ́нгэ.

¹⁸ Ровнэс и тыкнэ́ чхаворэ́ дыкхэ́на пэ ма́ндэ бангэ́ мо́са, мэ ґаздавапэ тэ пхэна́в, и ёнэ ракирэ́на пэ ма́ндэ.

¹⁹ Сарэ́ мирэ́ пашатунэ́ мала́ дурьёна криг ма́ндыр, и кодолэ́, конэ́с мэ прилыём илэ́са, рисинэ́ холя́са пэ ма́ндэ.

²⁰ Мирэ́ кокалы́ зоралэ́с ухтылдэпэ пал мири́ цы́па, и мирэ́ маса́, и екх цы́па яця́пэ ма́ндыр кэ мирэ́ данда́.

²¹ Потангинэн ман, потангинэн ман, о – тумэ́, мирэ́ мала́! Дыкхэ́н, Дэвлэ́скиро васт пэкадя́ ман.

²² Со́скэ тумэ́ традэ́на ман, сыр Дэвэ́л кэрэ́ла адя́кэ, и со тумэ́, – рискирибна́скирэ мурдала́, – со на чалынэ мирэ́ масэ́ндыр?

²³ О, соб (кай) тэ зачхинэн мирэ́ лава́! Тэ вчхинэн андрэ́ лэн ваш рипирибэ́н дрэ лылваря!

²⁴ Соб (кай) тэ вычхинэн лэн саструнэ́ порэса (резцоса) и муловиса (оловоса) пэ бар пэ сарэ́ ве́ки!

²⁵ Нэ мэ джино́м мирэ́ джидэс, Выракхибнаскирэс, и дро са́мо ко́нцо (яго́ро), Ёв затэрдёла пал ма́ндэ пэ пхув;

²⁶ и ко́ли, пало́ дова́ мири́ цы́па роспэрэлапэ, нэ мэ усае́кх дро мирэ́ маса́ дыкха́ва Дэвлэ́с,

²⁷ мэ кокоро́ ява́ва тэ дыкха́в Лэс, и, ґа́да, дава́ явэ́на мирэ́ якха́, никонэскирэ яви́р, сыр миро ило́ нашавэла зор!

²⁸ Ко́ли тумэ́ пхэнэнас: “Сыр амэ ява́са тэ традас лэс?” Пал-дова́ со причына дрэ лэ́стэ кокорэстэ, со ёв мэнчынэлапэ; –

²⁹ нэ дарэ́н тумэ́ куртала́тыр! Ваш тумари́ бари холы́ курта́ла явэ́ла пэ тумэ́ндэ, сыр росплэскирибэн, соб (кай) тумэ́ тэ джинэ́н, со исын чачипэ́н.”