Ióvo 18 - Библия - Пэ Балтитко Романи чиб (Романэс) 2019

Вилдадо: Фуе Манушэ́нгэ Явэ́ла Ка́ра

¹ О Вилдадо Савхеянино (Шуахостыр) ракирэ́лас яви́р мо́ло, и отпхэндя́ лавэ́нца:

² “Ке́ли кончынэса ту тэ чингирэспэ лавэ́нца? Яв годыпнаскиро, и тэ́ньчи (после) амэ ява́са тэ ракирас.

³ Со́скэ ту дыкхэ́са пэ амэ́ндэ сыр пэ мурдалэ́ндэ (жывотнонэндэ)? Ио́во, со́скэ амэ сам нажужэ́ дрэ тумарэ́ якха́?

⁴ Ту роскушэса пэс пэ́скирэ холя́тыр, ци со тэды пал ту́тэ манушэ́нгэ тэ ячавэн пхув? Ци, со ска́ла кхарэ́лапэ пэ́скирэ штэто́стыр?

⁵ Нэ фуе́-манушэ́нгиро дуд мурдёла, и момолы лэ́скирэ ягатыр на явэ́ла тэ зяинэл.

⁶ Дуд ячэ́ла цямло дрэ лэ́скири ша́тра, и лэ́скиро момолы́тко (свети́льнико) мурдёла.

⁷ Зор явэ́ла тэ уджал лэ́скирэ шагэндыр (ламне́ндыр), а лэ́скиро плано лыджа́ла лэс кокорэс тэ пэрэ́л.

⁸ Пал-дова́ со лэ́скирэ ґэра́ кокорэ́ лыджа́на лэс дрэ кхуды́ (мире́жа), и ёв штавэла кэ фэля́.

⁹ Чирикленгири фэлы́ подтырдэла лэс пал пента (кхур), а фэлы́ пэ пхув ухтылэ́ла лэс пал ґэро́й.

¹⁰ Шошкэнгиро (хорёскиро) капкано исын гарадо́ лэ́стыр, и фэлы́ сеткаса исын пэ дром.

¹¹ Трашаибэ́н пал трашаибэ́н дарьякирэна лэс кажнонэ́ рига́тыр, и пал лэ́стэ традэнапэ пала́л лэ́скирэ пе́нты (кхурья).

¹² Бокх сы́рбы выхая лэ́скиро зоралыпэ́н, и бари би́да, исын паш лэ́стэ, ужакирэ́ла пэ лэ́стэ.

¹³ Мэрибнытко насвалыпэн схала сарэ́са лэ́скирэ маса́, ёв похая сарэ́са лэ́скирэ ґэра́ и васта́.

¹⁴ Мэрибэ́н вырискирэла лэс лэ́скирэ шатратыр, кай ёв сыс би дара́киро, и лыджа́ла лэс тэлэ́ кэ кра́ли пэ барэ́ биды.

¹⁵ Дрэ лэ́скири ша́тра явэ́на тэ дживэ́н чу́жа мануша́, а се́ра (дзэвэ́ля) почхувэна пир лэ́скиро кхэратуно штэ́то:

¹⁶ лэ́скирэ ко́рни (рукха́) вышутёна тэлалэстыр, а лэ́скирэ рандя́ зашутёна упра́л.

¹⁷ Рипирибэ́н пал лэ́стэ хасёла пэ пхув, и лэ́скиро лав бистрэна пэ вули́цы (пэ га́сы).

¹⁸ Лэс традэ́на криг дудэ́стыр (свэто́стыр) дро калыпэ́н, лэс вытрадэна пхувья́тыр, кай мануша́ дживэ́на.

¹⁹ Лэ́стэ на явэ́ла ни чхаво́, ни плименико машки́р лэ́скирэ манушэ́ндэ, ние́кх на ячэ́лапэ пэ лэ́скиро кхэратуно штэ́то.

²⁰ Ди́во кэ дар ухтылэ́ла манушэ́н западостыр долэ́ дывэсэ́стыр, а мануша́ вастоко́стыр трашадёна.

²¹ Адя́кэ исын кхэратунэ штэтоса, кай дживдя́ начипнаскиро ману́ш, дасаво-паць исын дром кодолэ́скэ, кон на джинэ́ла Дэвлэ́с.”