Ióvo 17 - Библия - Пэ Балтитко Романи чиб (Романэс) 2019

Ио́во Мангэлапэ Дэвлэ́скэ, соб (кай) тэ Ячэл Локхэды́р Лэ́скэ

¹ Ма́ндэ нанэ ду́хо (фа́но), мирэ́ дывэсэнгэ исын ко́нцо (яго́ро), маґила (кула) исын скэдыны ваш ма́нгэ [мулыканэ/гробы-р.с.].

² Пашы́л ма́ндэ исын мануша́, кон салапэ холямэс, нэ мирэ́ якха́ дыкхэнас, сыр ёнэ биманушыткэс пэрэ́на пэ ма́ндэ.

³ Дэ́вла! Яв миро дудвало! Чхув сымады́ (залого) пал ма́ндэ Пэ́скэ. Кон жа яви́р сашты́ тэ марэл пир васта́ пал ма́ндэ?

⁴ Пал-дова́ со Ту гарадян лэ́нгирэ-малэнгирэ илэ тэ ґалён, палдава́ Ту на домэкэса, соб (кай) ёнэ тэ ґаздэ́нпэ.

⁵ Кон ракирэ́ла хоханэ́с пэ́скирэ малэнца, кодолэ́-чхавэ́нгирэ якха́ пириячэна тэ дыкхэ́н.

Ио́во Жалинэлапэ, со Лэ́скирэ Мала́ на Патя́на Лэ́скэ

⁶ И Дэвэ́л кэрдя́ адя́кэ, со мэ яцём сыр притча ваш манушэ́нгэ; мэ яцём кадасаво́ ману́ш, пэ конэ́стэ чунгардэна дро муй.

⁷ Мирэ́ якха́ пириячнэ тэ дыкхэ́н мирэ́ тугатыр, и сарэ́ мирэ́ кокалы́ ячнэ́ сыр зэр (тень).

⁸ Чачунэ́ мануша́ дивинэнапэ далэ́стыр, и бибангипнаскиро ґаздэ́лапэ холя́са пэ ма́ндэ сы́рбы пэ дуе́-муе́нгирэстэ.

⁹ Нэ чачуно́ явэ́ла тэ рикирэлпэ кэ пэ́скиро дром, и конэ́стэ исын жужэ́ васта́, одова́ ману́ш явэ́ла зоралэды́р дро пэ́скиро ду́хо.

¹⁰ Нэ, мэ манга́ва, явэ́н сарэ́ палэ, палэ-дова́ со мэ на латхём машки́р тумэ́ндэ екхэ годэ́ манушэ́с.

¹¹ Мирэ́ дывэса́ прогинэ́, миро камибэн дро джиибэ́н биладыя (растопиндя), адя́кэ-паць и мирэ́-илэ́скирэ ду́мы.

¹² Мирэ́ мала́ парудэ рат дро дывэ́с, и ке́ли явэ́ла калыпэ́н, ёнэ ракирэ́на, со сыг дуд явэ́ла.

¹³ Ко́ли вари-со исын ма́нгэ тэ ужакирав, дава́ исын лю́но (преисподня), соб (кай) ёв тэ явэ́л сыр кхэр ма́нгэ, и соб (кай) ма́нгэ тэ кэра́в миро чхуибэ́н дро калыпэ́н:

¹⁴ тэды мэ да́ва го́дла маґилакэ: “Ту сан сыр дад ма́нгэ!” И кирмэскэ: “Ту сан сыр дай и пхэн ма́нгэ.”

¹⁵ Со́стыр ма́нгэ тэды тэ ужакирав лачхипэ́н? О, мири́ наде́я, ци вари-кон джинэ́ла пал дава́?

¹⁶ Ци ёй, мири́ наде́я сашты́ тэ джал тэлэ́ пал ма́ндэ кэ люноскири по́рта (вра́ты), соб (кай) амэ́нгэ кхэтанэ́ тэ откхинёвас дро пра́хо.”