Ióvo 16 - Библия - Пэ Балтитко Романи чиб (Романэс) 2019

Ио́во Бангякирэла Пэ́скирэ Битангипнаскирэ Малэн

¹ И отпхэндя́ Ио́во лавэ́нца:

² “Мэ шундём бут кадалэ́ чачипэна́; тумэ́ сан бэдытка подрикирибнаскирэ.”

³ Ци явэ́ла ко́нцо (яго́ро) пэ далэ́ балвалитка лава́? Ци, со шпулэла (пихинэла) тут тэ отпхэнэс адя́кэ ма́нгэ?

⁴ Мэ адя́кэ-паць могинавас тэ ракира́в, сыр ту: ко́ли тэ явэс пэ миро штэ́то. Мэ могинавас тэ скэдав лава́ пэ ту́тэ, и тэ тринскирав шэрэ́са пэ тумэ́ндэ;

⁵ нэ мэ подрикиравас мирэ́ лавэ́нца, и мирэ́-уштэнгиро раманипэн (миро) локхякирэлас тырэ́-илэскири дукх.

⁶ Мэк мэ и ракира́ва, мирэ́-илэскири дукх на локхия, и мэк мэ пириячава, ци ма́нгэ исын локхэды́р?

⁷ Нэ акана́ Дэвэ́л кэрдя́ адя́кэ, со мэ сом кхинякирдо; Ту, Дэ́вла, хасякирдян сари́ мири́ сэ́м΄я (ири́);

⁸ Ту кэрдя́н адя́кэ, со мэ сом саро́ дрэ моршки и дава́ исын досыкаибэн пэ ма́ндэ. Ту вышутькирдян ман дрэ петрёнка (измождёно) – и дава́ адя́кэ-паць исын досыкаибэн, кон допхэнэ́ла пэ ма́ндэ.

⁹ Дэвэ́л кушэла ман Пэ́скирэ холякирибнастыр и Ёв бидыкхэла ман; Ёв рискирэ́ла скрежэтаса Пэ́скирэ данда́ пэ ма́ндэ. Миро вэ́рго востринэла пэ́скирэ данда́ пэ ма́ндэ.

¹⁰ Э мануша́ путравэна пэ́скирэ якха́ пэ ма́ндэ, ёнэ пэкавэна ман пир чхама (шчоки), бангякири, ёнэ кэдэнапэ кхэтанэ́ пэ ма́ндэ.

¹¹ Дэвэ́л пиридыя ман надэвлытконэнгэ, и чхурдыя́ ман дрэ фуе́-манушэ́нгирэ васта́.

¹² Мэ дживдём штылэ́с, нэ Дэвэ́л запхагирдя ман, Ёв адя́кэ-паць лыя́ ман пал мэн и ростринскирдя ман пэ котэра́, и Ёв чхудя́ ман сыр бакрэ́с тэ дэн карье.

¹³ Лэ́скирэ карье́-дыибнаскирэ (стрельцы) обгинэ трусця́л ма́ндэ, Ёв промардя миро ило́, и Ёв на тангинэла ман. Ёв вычхувэла миро жэлучо пэ пхув.

¹⁴ Ёв пхагирэ́ла ман рискирибнаса дрэ маса́ екх пал екх; Ёв прастала пэ ма́ндэ, сы́рбы Ёв исын зоралыпнаскиро марибны́тко.

¹⁵ Мэ сыдём пэ́скэ жалобно гоно́ пэ мири́ цы́па, и чхудём пэ́скиро шэро́ дро пра́хо.

¹⁶ Миро муй исын лоло́ ясвэндыр, и пэ мирэ́ цымблы исын мэрибнаскири зэр (тень),

¹⁷ мэк и нанэ нахрата рэ́нды пэ мирэ́ васта́, и мири́ па́тери (моли́тва) исын бидошэнгири.”

Ио́во раки́рла, со лэ́стэ исын якхи́тко пэ болыбэ́н

¹⁸ Э пхув! На чхакир миро рат, и мэ тэ явэ́л шундлы мири́ го́дла.

¹⁹ Ѓа́да, акана́, исын миро Якхи́тко пэ болыбэ́н, и дава́ исын Ёв, Кон затэрдёла пал ма́ндэ.

²⁰ Мирэ́ мала́ санапэ холямэс ма́ндыр, мирэ́ якха́ чхувэ́на ясва кэ Дэвэ́л.

²¹ О, соб (кай) тэ явэ́л вари-кон тэ мангэ́л зоралэ́с пал манушэ́стэ анги́л Дэвлэ́стэ, сыр и ману́ш мангэ́ла зоралэ́с пал лэ́скирэ пашатунэстэ.

²² Пал-дова́ со сыг явэ́ла ко́нцо (яго́ро) пэ кадалэ́ бэрша́, Мэ джа́ва дромэ́са одори́к, каты́р нанэ рисибэн.”