Ióvo 15 - Библия - Пэ Балтитко Романи чиб (Романэс) 2019

Яви́р Чинга́рд Машкир Иовостэ и Лэ́скирэ Малэндэ

¹ Тэ́ньци Элифазо Фэманостыр отпхэндя́ лавэ́нца:

² “Ци явэ́ла годо́ ману́ш тэ отпхэнэл чхучэ́ лавэ́нца, и тэ пхэрдякирэл пэ́скиро колы́н балваляса вастоко́стыр;

³ и ци явэ́ла ёв тэ лыджа́л чинга́рд лавэ́нца, со́стыр нанэ лачхипэ́н, ци ракирибнэнца, со нисо́ на дэ́на?

⁴ Ту, хай, домэкцян пэ́скэ тэ на дарэс Дэвлэ́стыр, и ту запхандян муй, соб (кай) тэ на розлэс заня́са па́тери (моли́тва) Дэвлэ́скэ.

⁵ Пал-дова́ со тыро́ чорипэ́н сыклякирэ́ла тут адя́кэ тэ ракирэ́с, и ту выкэдыян пэ́скэ тэ ракирэ́с хоханэ́ чиба́са.

⁶ Тыро́ муй кокоро́ зоралэ́с обсэндинэла тут, а на мэ, и тырэ́ ушта́ кокорэ́ досыкавэна пэ ту́тэ.

⁷ Ио́во! Ци на сан ту пэ́рво ману́ш пэ свэ́то (лот), кон бия́ндыя? Ци со создыя́ Дэвэ́л тут анги́л, сыр Ёв кэрдя́ бэ́ргицы?

⁸ Ци, хай шундя́н ту, сыр Дэвэ́л лыджия́ скэдыны? Ци, хай, сан ту екхоро ману́ш пэ свэ́то (лот), кон исын годо́?

⁹ Со исын дасаво, со джинэ́са ту, со амэ на джина́са? Со дасаво ґалёса ту екхджино́, со амэ́нгэ на джиндло́?

¹⁰ Машкир амэ́ндэ исын дуйджинэ́: о сывонэ-балэнгиро ману́ш и пхуро́, савэ́ исын бут пхурэды́р тырэ́ дадэ́стыр.

¹¹ Ци на ухты́лла (на́доси) ту́кэ, со Дэвэ́л подрикирэ́ла тут, ци лава́, со амэ локхэс пхэндям ту́кэ?

¹² Кэ со ґаздыя́ тут тыро́ ило́? Со́скэ тырэ́ якха́ дыкхэ́на холя́са,

¹³ со ту рискирдян ду́хо (фа́но) пэ Дэвлэ́стэ, и сыр кадасавэ́ лава́ выджа́на тырэ́ мо́стыр?

¹⁴ Саво́ ж трэй тэ явэ́л ману́ш, соб (кай) ёв тэ явэ́л бидошэ́нгиро? Ци на кодова́, савэ́с джувлы́ бияндя́, соб (кай) ёв сашты́ тэ явэ́л чачипна́скиро?

¹⁵ Ко́ли Дэвэ́л на допатяла Лэ́скирэ свэнтонэнгэ, и болыбэ́н нанэ бидошэ́нгиро анги́л Лэ́скирэ якха́:

¹⁶ – пэ ада́кицы буты́р о ману́ш исын джунгало́ (брытко) и розмэкнэ-годя́киро, кон кэрэ́ла чорипэ́н адя́кэ-паць, сы́рбы ёв пьел пани́:

¹⁷ “Мэ пхэна́ва ту́кэ, шун ман; дова́, со мэ дыкхцём, – пал дова́ мэ подава звесь (зан),

¹⁸ со годэ́ мануша́ пхэндлэ́, савэ́ шундлэ́ пэ́скирэ дадэндыр, савэ́ нисо́ на гарадэ́ лэ́ндыр,

¹⁹ конэ́скэ екхджинэнгэ сыс дыны́ пхув, и ние́кх, явирэ-тхэмэскиро ману́ш, на гия́ машки́р лэ́ндэ.

²⁰ Фуй ману́ш бандёла дукхаса пэ́скирэ бангятыр сарэ́ пэ́скирэ дывэса́, и кон притасавэла явирэ́н, лэ́скирэ бэрша́ исын гарадэ́.

²¹ Дрэ лэ́скирэ кана́ исын даракунэ зники (звуки): ке́ли исын саро́ мишто́ лэ́стэ, тэды розмарибнытко джа́ла пэ лэ́стэ.

²² Ёв на патя́ла, со ёв на рисёла цямлыпнастыр, и дыкхэ́ла, со лэс ужакирэ́на куртала́са.

²³ Ёв псирэ́ла одори́к и палэ пал маро́, пхэни́, – “Кай исын ёв?” Ёв джинэ́ла, со кало́ дывэ́с исын дро лэ́скиро васт.

²⁴ Пхарипэ́н и би́да рикирэ́на лэс дрэ дар, ёнэ сы́рбы пиризорьякирэна лэс, сы́рбы кра́ли, кон исын скэдыно́ кэ марибэ́н.

²⁵ Пал-дова́ со ёв диндькирдя (протырдыя́) васт пэ Дэвлэ́стэ, и со ёв кэдыя зор пэ Сарэзорьякирэ Дэвлэ́стэ,

²⁶ и ёв праста́ндыя пэ Лэ́стэ дзиндзькирдэ мэняса тэл грэмбонэ-пряжкэнгиро шчы́то.

²⁷ Пал-дова́ со ёв учхакирдя́ пэ́скиро муй пэ́скирэ тхулыпнаса, и кэдыя тхулыпэн паш пэ́скири кусты́к.

²⁸ И ёв дживэ́ла дрэ наобдживдлэ фо́рья, дрэ кхэра́, кай нико́н на дживэ́ла, савэ́ сыс анги́л-присэндиндлэ, соб (кай) лэ́ндыр тэ ячэн руи́ны.

²⁹ Ёв на явэ́ла барвало́, адя́кэ-паць и лэ́скиро миштыпэ́н пириячэ́ла тэ барьёл, и лэ́скиро маёнко на розбуґлякирэлапэ пир пхув.

³⁰ Ёв на уджала цямлыпнастыр, бари яг вышутькирэла лэ́скирэ рандя́ сы́рбы балваляса,

³¹ и Дэвлэ́скиро пхурдыпэн кошэла криг лэс штэто́стыр, сыр балва́л лулуди́ (цвэто).

³² Мэк ёв тэ на патял зоралэ́с дрэ чхучэ́ рэ́нды, сы́рбы хохаиндой пэс, пал-дова́ со чхучэ́ рэ́нды ёв дорэсэ́ла палэ сыр плэскирибэн. Ёв сы́рбы кашт вышутёла анги́л лэ́скиро дывэ́с, и лэ́скири рандь на явэ́ла нэвэ́с зэлэны.

³³ Ёв тринскирэла тэлэ́ пэ́стыр надогинэ винаграды́тка му́ри сы́рбы винаграды́тко кашт, и ёв чхурдэ́ла тэлэ́ пэ́скирэ лулудя́ (цвэты) сы́рбы маслинитко кашт.

³⁴ Кхэр, дро саво́ дживэ́на надэвлытка, явэ́ла чхучо́, и яг выхала ша́тры, со ёнэ дорэснэ́ пал подкиндытко мыто.

³⁵ Ёнэ задуминдлэ биба́хт, и зачхудэ чхучэ́ рэ́нды (де́лы), лэ́нгири лочови́ (утроба) барьякирэ́ла хохаибэ́н.”