Ióvo 14 - Библия - Пэ Балтитко Романи чиб (Романэс) 2019

¹ О ману́ш, савэ́с джувлы́ бияндя́, дживэ́ла наґара, и лэ́стэ исын бут пхарипэна пэ ило́.

² Ёв выбарьёла сыр лулуди́ (цвэто) и лэс чингирэна тэлэ́; и ёв нашэла криг сыр зэр (тень) и буты́р лэс нанэ.

³ Ци откэрэса Ту Пэ́скирэ якха́, Дэ́вла, пэ екхэ́стэ кадасавэстэ, сыр мэ; и ци лыджа́са Ту ман пэ сэ́ндо Пэ́са?

⁴ Ци сашты́ тэ бияндёл бидошэ́нгиро ману́ш манушэ́стэ дошэнца? Ние́кх!

⁵ Ко́ли лэ́скирэ дывэса́ ангилпхэндлэ, и лэ́скирэ-джиибна́скирэ дывэса́ исын джиндлэ́ Ту́кэ; и Ту ґаздыян вучэ́с лэ́скэ ме́жы, соб (кай) ёв нашты́ тэ пириджал лэн,

⁶ тэды Ту рисёв лэ́стыр; и мэк ёв тэ откхинёл анги́л дава́, сыр ёв кончынэла, сыр андынаршчыко (наёмнико) пэ́скиро дывэ́с.

⁷ Пал-дова́ со исын наде́я ваш кашт: ко́ли ёв чингирдо тэлэ́, ёв барьёла нэвэ́стыр, и лэ́скирэ сэнки (сучки) на хасёна;

⁸ и мэк лэ́скиро корнё (рукх) пхурьёла дрэ пхув, и лэ́скиро корчо кирнёла дрэ пхув;

⁹ нэ ко́ли ёв чхуиндя (шундя́) пани́, тэды ёв мэкэ́ла бутоны, и лэ́скирэ рандя́ выбарьёна сыр нэво́ выбарьякирибэн.

¹⁰ Нэ ману́ш мэрэ́ла и роспэрэлапэ; ґа́да-лэ́скэ ко́нцо (яго́ро), и кай ёв исын?

¹¹ Паня́ нашадёнапэ зеростыр, и рэка (лэнь) пириячэ́ла тэ тхадэл:

¹² адя́кэ-паць и ману́ш пасёла и на уштэ́ла палэ. Анги́л дава́, сыр кончынэнапэ дава́ болыбэ́н, ёнэ на джангадёна, на уштэна пэ́скирэ соибнастыр.

¹³ О, соб (кай) Ту, Дэ́вла, тэ гаравэсас ман дро лю́но (преисподня), соб (кай) Ту тэ рикирэс ман чораханэ́с, пака Тыри́ холы́ джа́ла пэ́скэ, соб (кай) Ту тэ ангилпхэнэс ма́нгэ часо, со Ту дыя́н ма́нгэ, и тэ рипирэс ман.

¹⁴ Ко́ли ману́ш мэрэ́ла, ци отджидёла ёв нэвэ́с? Мэ ужакиравас сарэ́ дывэса́, дрэ савэ́ мэ кэрдём пхари́ буты́ адя́кэ ґара́, сыр явэ́ла локхэды́р ма́нгэ:

¹⁵ Ту кхарэсас ман, и мэ отпхэнавас Ту́кэ; соб (кай) Ту́тэ древа́н камэсас тэ дыкхэ́с ман, конэ́с Ту создыян.

¹⁶ Пал-дова́ со акана́ Ту гинэса мирэ́ шаги (ламня): соб (кай) ту тэ на дыкхэ́с ракхибны́ткэс пэ мирэ́ грэ́хи?

¹⁷ Мирэ́ чорэ́ рэ́нды исын пхандлэ пэ якхи́тко (чэргэнори́) дро капшуко, и Ту запхандэса саро́ миро чорипэ́н.

¹⁸ И, чачо́; сыр бэ́рги пэрэ́на и роспхарадёна сарэ́са, и ска́ла кхарэ́лапэ (зджа́ла) пэ́скирэ штэто́стыр,

¹⁹ а паня́ роскэрэна пэ на́бут (куты́) бара́, и барэ́ панинга́ выморэна пыло пхувья́тыр, адя́кэ-паць ту хасякирэса манушэскири наде́я.

²⁰ Ту прилэса упралыпэ́н пэ лэ́стэ пэ ўса́ды (сак), и ёв уджала сарэ́са; Ту парувэса лэ́скиро муй и бичхавэса криг лэс.

²¹ Тэ ячэн лэ́скирэ чхавэ́ дрэ паты́в, – ёв на джинэ́ла, ци ко́ли телякирэна лэ́скирэ чхавэ́н, – ёв на роздыкхэла дава́.

²² Нэ адя́кэ ґара́ (длу́гэс), сыр лэ́скирэ маса́ (лоч) исын джидэ́, ада́кицы явэ́на и дукха́ лэ́стэ, и лэ́скиро ди явэ́ла зоралэ́с тэ тугинэл.”