Ióvo 13 - Библия - Пэ Балтитко Романи чиб (Романэс) 2019

¹ Акэ, мирэ́ якха́ дыкхнэ́ саро́ дава́, мирэ́ кана́ шундлэ́ и ґалынэ́ дава́.

² Со тумэ́ джинэ́на и мэ адя́кэ-паць (джина́в): мэ на сом тэлэды́р тумэ́ндыр.

³ Нэ мэ камамас тэ ракира́в Сарэзорьякирэ Дэвлэ́са, и мэ древа́н кама́м тэ пириракирав причына Лэ́са пал мири́ би́да.

⁴ Э тумэ́, чачэс, сан хоханэ́-подкэрибнаскирэ, тумэ́ ж сан билачхипнаскирэ састыпнарья.

⁵ О, соб (кай) тумэ́ тэ явэ́н штыл кхэтанэ́! И дава́ явэ́лас тумаро́ годыпэ́н.

⁶ Шунэ́н, акана́ мирэ́ ду́мы, и прилэ́н кэ годы́, пал со мирэ́ ушта́ явэ́на тэ затэрдён.

⁷ Со ж тумэ́ явэ́на тэ ракирэ́н начачипэ́н ваш Дэвлэ́скэ? И ваш Лэ́скэ тумэ́ явэ́на тэ хохавэн?

⁸ Ци тумэ́ камэ́на тэ прилэ́н Лэ́скири риг? Ци явэ́на тумэ́ тэ лыджа́н чинга́рд мануша́, соб (кай) тэ явэ́л лачхо́ (годно) Лэ́скэ?

⁹ Ци явэ́ла мишто́, ко́ли Ёв пропатякирэла тумэн? Ци (могинэ́на) сашты́ тумэ́ тэ санпэ Лэ́стыр сы́рбы тумэ́ санапэ манушэ́стыр?

¹⁰ Ёв би кунипнаскиро (шылалэс) сыкавэ́ла тумари́ банг, ко́ли тумэ́ чораханэ́с явэ́на тэ прилэ́н вари-конэ́скири риг.

¹¹ Ци на явэ́ла Лэ́скиро райканыпэн тэ страхакирэл тумэн, ци со трашаибэ́н анги́л Лэ́стэ на пэрэ́ла пэ тумэ́ндэ?

¹² Тумаро сыклякирибэ́н исын сы́рбы годыпнытка лава́ праскатыр (пеплостыр), а лава́, савэ́нца тумэ́ затэрдёна пал пэ́стэ, исын сы́рбы кэрдэ́ блататыр.

¹³ Явэ́н штыл, и шунэ́н ман, со мэ пхэна́ва, – мэк тэ явэ́л дова́, со явэ́ла.

¹⁴ Со́скэ ма́нгэ тэ рикирав пэ́скирэ маса́ (лоч) дандэнца кэ дар? И тэ чхував миро джиибэ́н дро васт?

¹⁵ Ѓа́да, ко́ли Ёв и мулякирэ́ла ман, нэ мэ сароекх ява́ва зоралэ́с тэ патяв дрэ Лэ́стэ, нэ и мэ ява́ва тэ затэрдёвав пал пэ́стэ мирэ́ лавэ́нца анги́л Лэ́стэ.

¹⁶ Дава́ пэ са́мо на́бут (куты́) адя́кэ-паць явэ́ла миро зракхибэ́н, пал-дова́ со дуе-муенгиро (лицэме́ро) ману́ш на явэ́ла анги́л Лэ́стэ.

¹⁷ Шунэ́н важливэс миро ракирибэ́н, и дова́, со мэ статэчнэс (официальнэс) пхэна́ва, шунэ́н канэнца.

¹⁸ Ѓа́да, акана́, мэ росчхудём екх пал екх мирэ́ ду́мы дро миро рэ́ндо, мэ джино́м, со чачипэ́н явэ́ла пал ма́ндэ.

¹⁹ Кон явэ́ла муршкано́ тэ лыджа́л чинга́рд ма́нца? Пал-дова́ со, ко́ли мэ ява́ва штыл акана́, тэды явэ́ла саро́ ма́нгэ.

Иовоскири Па́тери (Моли́тва)

²⁰ Фэ́ни ма́ндэ исыс дуй мангипэна кэ Ту, Дэ́вла, тэ на кэрэ́с ма́нгэ; тэ́ньчи мэ на ява́ва тэ гарадёвав Ту́тыр.

²¹ Лэ Тыро́ васт дур ма́ндыр; и мэк Тыро́ трашаибэ́н тэ на страхакирэл ман;

²² тэ́ньчи кхар и мэ отпхэнава; – ци мэ ява́ва тэ ракира́в, и Ту явэ́са тэ отпхэнэс ма́нгэ.

²³ Кицы́ ма́ндэ исын чорипэна и грэ́хи? Кэр адя́кэ, соб (кай) мэ тэ джино́м (джина́в) мирэ́ чорэ́ рэ́нды и миро грэ́хо.

²⁴ Со́скэ Ту, Дэ́вла, рикирэсапэ ригаса ма́ндыр, и гинэса ман пал тырэ́ вэргостэ?

²⁵ Ци на затрашавэса Ту патри́н (листо), со кунинэлапэ одори́к и палэ? И ци на традэсапэ Ту пал шукэ́-гивэскири тетива?

²⁶ Пал-дова́ со Ту чхинэса киркипэн пал ма́ндэ, и кэрэ́са адя́кэ, соб (кай) мэ тэ прилав чорипэ́н мирэ́ тырныпнастыр сыр миро миштыпэ́н.

²⁷ Ту чхувэ́са мирэ́ ґэра́ дрэ калода и Ту дыкхэ́са ракхибны́ткэс пал сарэ́ мирэ́ дроморэ; и Ту чхувэ́са шпэры пал мирэ́ – ґэрэнгирэ пирэ́ (подэшвы).

²⁸ Нэ, о ману́ш, сыр и мэ, роскирнёлапэ сыр кирно котэ́р, сы́рбы урибэ́н, со моль (мэль) ха́ла.