Ióvo 12 - Библия - Пэ Балтитко Романи чиб (Романэс) 2019

Ио́во Нэвэ́с Отпхэнэ́ла

¹ И отпхэндя́ Ио́во лавэ́нца:

² “Чачо́, тумэ́ сан мануша́ и годыпэ́н мэрэ́ла тумэ́нца.

³ Нэ мэ адя́кэ-паць бут ґалёвава, сыр и тумэ́, мэ на сом тэлэды́р тумэ́ндыр; и, чачо́, кон на джинэ́ла саро́ дава́, со тумэ́ пхэндлэ́?

⁴ Мэ сом екх ману́ш, пэ конэ́стэ дру́го (мал) дыкхэ́ла бангэ́ мо́са, – мэ, кон кхарэ́ла Дэвлэ́с, и конэ́скэ Ёв отпхэнэ́ла: Мэ, дэвлы́тко и чачуно́ ману́ш, яцём сабнаса ваш явирэ́нгэ.

⁵ Вольна мануша́ дрэ годы́ сы́рбы дыкхэ́на бангэ́ мо́са пэ одолэ́ндэ, савэнгирэ ґэра́ бандинэ сы́рбы би́да.

⁶ Розмарибнытконэнгирэ ша́тры зяинэна миштыпнаса, и кодолэ́, савэ́ прэзэнтынэна Дэвлэ́с, дживэ́на бидаракиро, – дава́ дэ́ла лэ́нгэ Дэвэ́л Пэ́скирэ вастэ́са.

⁷ Нэ акана́ пхучэнпэ кхэритконэ́ мурдалэ́ндыр (ското́стыр), и ёнэ явэ́на тэ сыклякирэ́н тумэн и болыбна́скирэ чириклендыр, и ёнэ пхэнэ́на тумэ́нгэ;

⁸ ци ракирэ́н пхувья́са, и ёй высыклякирэла тумэн, ци морёскирэ (дэрьявэ́скирэ) мачхэ́ пхэнэ́на тумэ́нгэ.

⁹ Кон джинэ́ла дава́, со Дэвлэ́скиро васт создыя́ лэн;

¹⁰ со Лэ́скиро васт рикирэ́ла джиибэ́н пэ кажно (сва́ко) джидо́ ди.

¹¹ Ци на спробинэна тумарэ́ кана́ лава́, сыр и муй чуинэла хабэ́н?

¹² Годыпэ́н исын пхурэ́ манушэ́ндэ, и ману́ш лэ́ла тэ ґалёл буты́р джиибна́скирэ дывэсэ́ндыр.

¹³ Нэ Дэвлэ́стэ исын годыпэ́н и зоралыпэ́н, Ёв дэ́ла годы́ и ґалёла.

¹⁴ Ѓа́да, Ёв пхагирэ́ла, и дова́ ужэ на кэрэ́са нэвэ́стыр (зноко): Ёв пхандэла манушэ́с дро штарибэ́н и нанэ отмэкибэн пэ во́ля.

¹⁵ Ѓа́да, Ёв пририкирэла паня́, и ёнэ вышутёна: и Ёв бичхавэ́ла лэн англэ, и ёнэ рискирэна тэлэ́ пхув.

¹⁶ Дэвлэ́стэ исын зоралыпэ́н и годыпнаскиро джиныбэ́н, хохадэ мануша́ и хохаибнаскирэ исын дрэ Лэ́скири зор.

¹⁷ Ёв лыджа́ла годы́-дыибнаскирэн тэ кэрэ́н доша, Ёв кэрэ́ла сэндарьен дылынэнца.

¹⁸ Ёв лэ́ла криг зор кралье́ндыр, Ёв пхандэла кустыка пэ лэ́нгирэ трушула (чре́сло).

¹⁹ Ёв лыджа́ла раша́н тэ кэрэ́н доша, и равэла тэлэ́ зоралыпнаскирэн,

²⁰ Ёв лэ́ла криг чиб шука́р-ракирибнаскирэндыр (велеречывонэндыр) и кэрэ́ла адя́кэ, со пхурэ́ пириячэна лачхэ́с тэ розґалён;

²¹ Ёв вычхувэла накутякирибэн пэ тхагарье́ндэ и Ёв розвастакирэла зоралыпнаскирэн;

²² Ёв росчхакирэла хор котэра́ цямлыпнастыр и Ёв янэ́ла мэрибнаскири зэр (тень) пэ дуд;

²³ Ёв прибарьякирэла манушы́тка на́цыи и вымарэла лэн; Ёв росчхурдэла манушы́тка на́цыи и кэдэла лэн кхэтанэ́.

²⁴ Ёв лэ́ла криг годы́ манушэ́нгирэ шэралэндыр пэ пхув, и кэрэ́ла адя́кэ, со ёнэ псирэ́на адя́кэ, сыр пир бидромэскири чхучи́ пхув.

²⁵ Ёнэ псирэ́на, чилави вастэ́нца дро калыпэ́н, кай дуд нанэ, и Ёв кэрэ́ла адя́кэ, со ёнэ кунинэнапэ (шатынэнапэ) сыр матэ.