Ióvo 11 - Библия - Пэ Балтитко Романи чиб (Романэс) 2019

Софаро зачхувэла Иовос тэ Приджинэл Грэхи

¹ Тэ́ньци Софаро Наамостыр отпхэндя́ лавэ́нца:

² “Ци нашты́ тэ отпхэнэс пэ бут пхучибэна? Ци бутэ́-ракирибнытконэ манушэ́нгэ яви́р мануша́ исын бангэ́ тэ пхэнэ́н, со лэ́скиро исын чачипэ́н?

³ Ци со тыро́ хохано́ ракирибэ́н зачхувэла манушэ́н тэ явэ́н дро рама́нё (миро)? Ци сыр ту сасапэ холямэс, тэды со ж нашты́ тэ ладжакирэн тут?

⁴ Пал-дова́ со ту ж пхэндя́н: “Мирэ́-патяибнаскиро сыклякирибэ́н исын бибангякири, и мэ сом бидошэ́нгиро дрэ тумарэ́ якха́.”

⁵ Нэ, соб (кай) Дэвэ́л тэ лэл тэ ракирэ́л и тэ откэрэл Пэ́скирэ ушта́ пэ ту́тэ;

⁶ и, соб (кай) Ёв тэ сыкавэ́л ту́кэ годыпнаскирэ чораханыбэна, сыр дава́ исын, со ёнэ дрэ дуй мо́лы пириджана дова́, со Тыри́ годы́ сашты́ тэ подуминэл. Джин, со Дэвэ́л отмэкэ́ла ту́кэ бут тырэ́ чорипна́стыр.

⁷ Ци могинэ́са ту тэ розґалёс саро́ хорипэ́н, Саво́ Дэвэ́л исын?

⁸ Ци могинэ́са ту тэ ґалёс Сарэзорьякирэ Дэвлэ́с кэ пхэрдыпэн?

⁹ Джиныбэ́н пал Дэвлэ́стэ исын длэнгэдыр пхувья́тыр и исын буґлэдыр морёстыр (дэрьявэстыр).

¹⁰ Ко́ли Ёв проджа́ла пашы́л, Ёв пхандэла дрэ зандирья́ (цэ́пи/ковы) и Ёв кхарэ́ла пэ сэ́ндо, кон могинэ́ла (сашты́) тэ тэрдёл проти Лэ́стэ?

¹¹ Пал-дова́ со Ёв джинэ́ла годякирэ манушэ́н; Ёв адя́кэ-паць дыкхэ́ла фуипэ́н тэды, ке́ли ману́ш нашты́ аж и тэ подуминэл;

¹² нэ бигодыпнаскиро ману́ш нашты́ тэ явэ́л годытко, ровнэс адя́кэ-паць сыр и ману́ш сашты́ тэ бияндёл дасаво сы́рбы кхуроро бусонэ (диконэ) ослицатыр.

¹³ Ко́ли ту рискирэса миштэ́с тыро́ ило́ и протырдэса пэ́скирэ васта́ кэ Ёв,

¹⁴ и чхувэ́са чорипэ́н дур пэ́скирэ вастэ́ндыр и ту на домэкэса, соб (кай) фуипэ́н тэ дживэ́н дрэ тырэ́ ша́тры,

¹⁵ тэды ту би кунипнаскиро могинэсас тэ ґаздэс пэ́скиро бидошэ́нгиро шэро́, и ту явэ́са набадякирибнытко, и ту на дарэсас нисостыр,

¹⁶ пал-дова́ со ту бистрэса пал тыри́ бари би́да, и пририкирэса пал ла́тэ сы́рбы пал паня́, со нашнэ́ криг,

¹⁷ и тыро́ джиибэ́н явэ́ла яснэдыр парнэ́ дывэсэ́стыр, мэк и сыс цямло ту́тэ дрэ якха́, на явэ́ла ясно сыр зло́ко (ра́нко).

¹⁸ И явэ́ла ту́тэ зорало́ патяибэ́н, пал-дова́ со ту́тэ явэ́ла наде́я, и кай ту на роздыкхэса паш пэ́стэ, явэ́са тэ откхинёс би дара́киро.

¹⁹ И явэ́са ту тэ пасёс, и ние́кх на явэ́ла тэ даракирэл тут, и бут мануша́ явэ́на тэ пхэнэ́н помия (плётки), соб (кай) тэ покэрэнпэ ту́кэ.

²⁰ Нэ фуе́-манушэ́нгиро дыкхибэ́н хасёла, и ёнэ на нашэ́на бидатыр, и лэ́нгири наде́я пириячэ́ла тэ дыхинэл сыр и лэ́нгиро джиибэ́н.”