Galatenge 5 - Библия - Пэ Балтитко Романи чиб (Романэс) 2019

Ракхэ́н Пэ́скири Во́льныма

¹ Тэды, рикирэнпэ зоралэ́с сыр вольна мануша́, пал-дова́ со Христо́со мэкця́ пэ во́ля амэн и, соб (кай) тумэ́ нэвэ́стыр тэ на урьен писхарискиро ґа́мо.

² Шунэ́н! Мэ, сом Па́вли, пхэна́ва тумэ́нгэ, со, ко́ли тумэ́ обчхинэнапэ, на явэ́ла ни саво́ лачхипэ́н тумэ́нгэ Христосостыр.

³ И мэ допхэнава кажнонэ́ манушэ́скэ, со ёв (исын) банго́ (мусинэла) тэ рикирэ́л саро́ Зако́но.

⁴ Тумэ́ дуринэ Христосо́скирэ лачхипнастыр, ко́ли камэ́на тэ явэ́н приджиндлэ чачунэнца анги́л Дэвлэ́стэ пир Зако́но; тумэ́ ж отпынэ бахталыпнастыр.

⁵ Пал-дова́ со амэ пир Свэ́нто Ду́хо (Фа́но) ужакираса зоралэ́с, ке́ли Дэвэ́л приджиндя амэн чачунэнца пир патяибэ́н.

⁶ Пал-дова́ со, ке́ли амэ сам дро екхипэ́н Исусо́са Христосо́са, ни обчхиныбэн, ни наобчхыныбэн на мол ничы́, а саро́ смысло исын дро патяибэ́н, саво́ сыкавэ́ла пэс пир паты́в кэ яви́р мануша́.

⁷ Тумэ́ кэрдэ́ адя́кэ шука́р сы́рбы праста́ндынэ чачипна́са пир стадионо! Кон отрискирдя тумэн, соб (кай) тумэ́ тэ на кандэ́н чачипэ́н.

⁸ Кадасаво́ отрискирибэн нанэ Дэвлэ́стыр, Саво́ прикхардя тумэн.

⁹ Тыкны дрожджа (рошчына) ґаздэ́ла саро́ хумэр (тясто).

¹⁰ Мэ джино́м зоралэ́с, со тумэ́ адя́кэ думинэ́на, кон исын дро екхипэ́н Христосо́са, и кодолэ́скэ, кон ладжакирэла тумэн, явэ́ла ка́ра, на дыкхи́, кон бы ёв тэ на явэ́л.

¹¹ Нэ палсо́ ж мануша́ традэ́на ман, пшала́лэ, ко́ли мэ роспхэнава лав пал обчхиныбэн? Тэды бар, со исын пашто́ пэ дром анги́л манушэ́ндэ, тэ патя́н дро зракхибэ́н пир Христосо́скиро трушу́л, исын кэдыно криг.

¹² Мэ кама́м, соб (кай) мануша́, савэ́ ладжакирэна тумэн, аж тэ почхинэн пэ́скэ маса́.

¹³ Тумэ́, пшала́лэ, са́нас кхардэ́ тэ явэ́н вольна. Екх со, соб (кай) тумари́ вольныма тэ на дэл саштыпэн тэ кэрэ́н пир лочакирэ-налачхэ́ камибэна.

¹⁴ И саро́ Зако́но рикирлапэ пэ екх припхэныбэ́н: “Сыка́в паты́в пэ́скирэ пашатунэ́ манушэ́скэ, сыр кокоро́ пэ́скэ.”

¹⁵ А ко́ли тумэ́ кошэнапэ и ханапэ машки́р пэ́стэ, тэды ракхэ́нпэ, соб (кай) тумэ́ тэ на хасякирэ́н екх екхэ́с.

Ду́хо (Фа́но) и Манушы́тко Нату́ра

¹⁶ Нэ мэ пхэна́ва, дживэ́н пир Свэ́нто Ду́хо (Фа́но), и тумэ́ на явэ́на тэ кэрэ́н пир налачхэ́-лочакиро камибэн.

¹⁷ Пал-дова́ со лочакэ на трэй дова́, со Духоскэ трэй, и Духоскэ (Фаноскэ) трэй на дова́, со лочакэ трэй: кадалэ́ дуй камибэна исын вэ́рги екх екхэ́скэ; палдава́ тумэ́ на кэрэ́на дова́, со тумэн тырдэла,

¹⁸ нэ ко́ли Свэ́нто Ду́хо (Фа́но) лыджа́ла тумэн, то тумэ́ на сан тэл Зако́но.

¹⁹ Ѓа́да, со кэрэ́на мануша́ пир лочакирэ камибэна: ёнэ кэрэ́на биладжаипэ́н, дживэ́на джувле́нца би сэвлакиро, лыджа́на пэс сыр мурдала́ (жывотна);

²⁰ мангэ́напэ идолэ́нгэ, човаханякирэна, на сыкавэ́на паты́в явирэ манушэ́нгэ, кошэнапэ, зэвлынэна, замарэна манушэ́н, причхувэна зор тэ явэ́н фэдэды́р явирэ манушэ́ндыр, роспэрнапэ холя́са пэ групы, кандэ́на хоханэ́ сыклякирибэна,

²¹ жалинэна лачхипэ́н явирэ́нгэ, пьена сыр матыбнарья, гулинэна бирипирибнаскирэс и бут яви́р; пал кадасавэндэ мэ пхэна́ва анги́л, сыр и ракирдём англэды́р, со, кон адя́кэ кэрэ́ла, на дорэсэ́ла паш дро Дэвлэ́скиро Кралипэ́н.

²² А пир Свэ́нто Ду́хо (Фа́но) мануша́ дживэ́на патыва́са кэ яви́р мануша́, радыма́са, спокойнымаса, длугонэ вырикирибнаса, лачхэ́-илыткимаса, лачхипна́са, чачипна́са;

²³ ёнэ исын штыл (тиха), обрикирэна пэс, – кадасавэ́ манушэ́н притырдэла кэ пэ Зако́но.

²⁴ И адалэ́ мануша́, савэ́ исын Христосо́скирэ, примардэ пэ́скири манушы́тко грэхи́тко натура пэ трушу́л пэ́скирэ налачхэ́ камибнаса и грэхоскирэ тырдыпнаса.

²⁵ Ко́ли амэ дживаса пир Свэ́нто Ду́хо (Фа́но), амэ́нгэ трэй и тэ кэра́с пир Свэ́нто Ду́хо (Фа́но).

²⁶ На ява́са тэ рикирас вучэ́с накх, на ява́са тэ дас зор холякэ екх пэ екхэ́стэ, соб (кай) тэ на дас якхало екх екхэ́с.