Galatenge 4 - Библия - Пэ Балтитко Романи чиб (Романэс) 2019

¹ И мэ ишчо (инкэ́) пхэна́ва: пака дадэ́скиро чхаво́, савэ́скэ дад мэкэ́ла пэ́скиро миштыпэ́н, исын тыкно́, кэ ёв отлыджанапэ адя́кэ-паць сыр и кэ дадэ́скиро писха́ри, мэк ёв исын сы́рбы хула́й пэ саро́ миштыпэ́н;

² нэ пака ёв барьёла, пашы́л лэ́стэ псирэ́на ра́зна хулаибнытка и кхэрэ́скирэ барыдыра́ кэ/жы́ко кэ долэ́ бэрша́, савэ́ дад упхэнэла.

³ Адя́кэ-паць и амэ сам, ке́ли амэ са́мас сы́рбы бияторэ пир патяибэ́н, тэды амэ са́мас сыр писха́рья анги́л далэ́ свэто́скирэ – духоскири зор;

⁴ а ке́ли явдя́ часо, саво́ Дэвэ́л выкэдыя́, Ёв бичхадя́ Пэ́скирэ Екхэ Чхавэ́с, Савэс джувлы́ бияндя́ и Саво́ дживдя́ тэл Юды́тко Зако́но,

⁵ ваш дова́, соб (кай) Ёв могинэлас тэ выкинэл одолэ́н, савэ́ исын писха́рья анги́л Зако́но, соб (кай) амэ могинасас тэ ячас Дэвлэ́скирэ чхавэ́нца.

⁶ Нэ пал-дова́, со тумэ́ сан Лэ́скирэ чхавэ́, Дэвэ́л бичхадя́ Лэ́скирэ-Чхавэ́скиро Ду́хо (Фа́но) дро амаро́ ило́, Саво́ дэ́ла го́дла: “Авва! Да́до!”

⁷ Палдава́ ту на сан какана́ буты́р писха́ри, а чхаво́, а ко́ли чхаво́, тэды Дэвэ́л дэ́ла ту́кэ саро́, со исын Лэ́стэ ваш чхавэ́нгэ.

Павли́скирэ Мы́сли пал Галатэ́ндэ

⁸ А тэды, ґарэдыр (вагэдыр), ке́ли тумэ́ на джиндлэ́ Дэвлэ́с, тумэ́ са́нас писха́рья анги́л одолэ́ дэвлорэндэ, савэ́ сарэ́са нанэ натуралэ дэвэла́;

⁹ а какана́ тумэ́ приджиндлэ Дэвлэ́с, а фэды́р тэ пхэнас, со Дэвэ́л приджиндя тумэн; сыр дава́ тумэ́ нэвэ́стыр рисинэ́ кэ бизорья́кирэ и бэда ду́хи, савэ́нгэ свэ́то поклонинэлапэ, сы́рбы тумэ́ камэ́на тэ ячэн нэвэ́стыр писхарье́нца анги́л кадалэ́ ду́хи.

¹⁰ Тумэ́ ракхунэс (дрэ дуй якха́) придыкхэнапэ кэ дывэса́, чхона́, часы и бэрша́.

¹¹ Мэ дарава, со ци на ивья́ (напра́снэс) мэ кэрдём буты́ машки́р тумэ́ндэ.

¹² Пшала́лэ! Мэ манга́ва тумэн, соб (кай) тумэ́ тэ явэ́н дасавэ́, сыр мэ сом, пал-дова́ со мэ сом дасаво, сыр тумэ́ сан: тумэ́ на кэрдэ́ ма́нгэ ни саво́ чорипэ́н.

¹³ Нэ тумэ́ джинэ́на, со мэ со́мас насвало́, ке́ли мэ роспхэндём бахталы́ зан (звесь) тумэ́нгэ дро пэ́рво мо́ло,

¹⁴ а тумэ́ на гиндлэ́ ман фуеды́р пэ́стыр, на рисинэ́ ма́ндыр, ке́ли дыкхнэ́ миро бизоралыпэн, а тумэ́ прилынэ́ ман сыр Дэвлэ́скирэ Янголо́с, сыр Исусо́с Христосо́с.

¹⁵ Савэ ж бахталэ́ тумэ́ са́нас! И мэ пхэна́ва сыр якхи́тко (свидетелё), со ко́ли тэ явэ́л трэ́бима, тумэ́ вылэнас пэ́скирэ якха́ и отдэнас лэн ма́нгэ.

¹⁶ Со ж, ци мэ яцём вэргоса тумэ́нгэ, ко́ли мэ пхэндём чачипэ́н тумэ́нгэ?

¹⁷ Лэ́ндэ исын илэ́скиро хачкирибэ́н пал тумэ́ндэ, нэ дава́ ёнэ кэрэ́на на сарэ́ илэ́стыр, а ёнэ камэ́на тэ пиритырдэн тумэн кэ пэ, соб (кай) тумэ́ндэ тэ явэ́л дасаво илэ́скиро хачкирибэ́н пал лэ́ндэ.

¹⁸ Дава́ исын мишто́ ўса́ды (сак), соб (кай) тэ явэ́л илэ́скиро хачкирибэ́н пал чачипэ́н, а на фэ́ни тэды, ке́ли мэ сом тумэ́нца,

¹⁹ мирэ́ чхаворэнца, ваш конэ́скэ мэ кэрдём буты́ дасавэ́ дукхэнца, со исын джувля́тэ, ке́ли ёй биянэ́ла тыкнорэс, пака дро тумаро́ джиибэ́н на явэ́ла бицяло́ Христосо́скиро бахтякирибэ́н:

²⁰ мэ камамас тэ явав кэ тумэ́ и тэ парував мири́ зан, пал-дова́ со мэ на джиндём, со сыс тумэ́нца.

Пхэныбэ́н пал Агарья́тэ и Сара́тэ

²¹ Пхэнэ́н тумэ́ ма́нгэ, савэ́ древа́н камэ́на тэ кандэ́н Зако́но: ци шунэ́на тумэ́, со Зако́но ракирэ́ла?

²² Пал-дова́ со исын чхиндло́, со Авраамостэ сыс дуй чхавэ́, екх писхарицатэ, екх вольнонэ джувля́тэ.

²³ Нэ одова́, саво́ сыс писхарицатэ, бия́ндыя, сыр и сарэ́ бияндёна, а кодова́, саво́ сыс вольнонэ джувля́тэ, бия́ндыя пир Дэвлэ́скиро дыно́ лав.

²⁴ Кадалэ́ дуй чачипэна́ исын сы́рбы сыкаибэ́н: пал-дова́ со исын дуй заветы – екх пэ Бэ́рга Синаё, пир саво́ бияндёна писха́рья и саво́ упхэнэла пэ Агарьятэ.

²⁵ Палдава́ Агарь значинэла Бэ́рга Синаё дрэ Аравия и исын сы́рбы аканатуно Ерусалимо, саво́ исын дро писхарибэн пэ́скирэ манушэ́нца,

²⁶ а Ерусалимо, саво́ исын дро Болыбна́скиро Раё исын во́льно, – дава́ фо́ро исын амари́ дай.

²⁷ Пал-дова́ со исын чхиндло́: “Ра́дынпэ, джувлие бичхавэнгири, конэ́стэ на сыс никели чхаворэ́; дэ го́дла радыма́са и выпхэн лошалэс (весёлэс), сави́ на джинэ́ла бияныпнытка дукха́; пал-дова́ со джувля́тэ, савья́ ром мэкця́, явэ́на бутэды́р чхаворэ́, сыр кодолятэ джувля́тэ, савьятэ исын ром.”

²⁸ Нэ тумэ́, пшала́лэ, адя́кэ-паць сыр и амэ сам, сан Дэвлэ́скирэ чхаворэ́ пир дыно́ лав, адя́кэ-паць сыр и Исаа́ко сыс.

²⁹ Сыр сыс и тэды, ке́ли чхаворо́, саво́ бия́ндыя пир лочакиро камибэн, традыя́ яври́ одолэ́с, саво́ бия́ндыя Дэвлэ́скирэ Духо́стыр.

³⁰ Нэ со ракирэ́ла Свэ́нто Чхиныбэ́н? “Вытрадэ писхарица ла́кирэ чхавэ́са, пал-дова́ со писхарицакирэ чхавэ́скэ на явэ́ла паш Дадэ́скирэ мэкнэ́ миштыпна́стыр кхэтанэ́ вольнонэ – джувлякирэ чхавэ́са.”

³¹ Палдава́, пшала́лэ, амэ на сам писхарицакирэ чхаворэ́, а амэ сам вольнонэ-джувлякирэ чхаворэ́.