Galatenge 3 - Библия - Пэ Балтитко Романи чиб (Романэс) 2019

Мойза́скиро Зако́но ци Патяибэ́н

¹ Нэ, Галаты, савэ́ тумэ́ бигодякирэ сан! Кон дава́ човаханякирдя тумэн, соб (кай) тумэ́ тэ на кандэ́н патяибэ́н; анги́л жа тумарэ́ якха́ Христо́со сыс сы́рбы сыкадо примардо пэ трушу́л?

² Екх рэ́ндо (де́ло), со мэ кама́м тэ уджинав тумэ́ндыр: ци тумэ́ дорэснэ́ (долынэ) Ду́хо (Фа́но) пир Законо́скирэ бутя́? Ци шуныбнастыр пир патяибэ́н?

³ Савэ тумэ́ сан бигодякирэ! Тумэ́ лынэ́ тэ дживэ́н нэвэ́стыр пир Ду́хо (Фа́но), а какана́ тумэ́ кончынэна пир пэ́скирэ-лочакири зор.

⁴ Ци тумэ́ пирилыджинэ ада́кицы ивья́ (напра́снэс)? Ко́ли тэ явэ́л дава́ чачунэ́с ивья́?

⁵ Дэвэ́л дыя́ Ду́хо (Фа́но) тумэ́нгэ и кэрдя́ ди́вы машки́р тумэ́ндэ, ци сыс дава́ пир Законо́скирэ бутя́, ци шуныбнастыр пир патяибэ́н?

⁶ Адя́кэ Авраа́мо патяндыя Дэвлэ́скэ и Дэвэ́л прилыя́ лэс чачунэса пал лэ́скиро патяибэ́н.

⁷ Палдава́, джинэ́н, со одолэ́, кон исын патяибнастыр, ёнэ исын Авраамо́скирэ чхавэ́.

⁸ И Свэ́нто Чхиныбэ́н анги́л дыкхця́, со Дэвэ́л приджинэла чачунэнца Наюдэн пир патяибэ́н, и анги́л роспхэндя́ бахталы́ зан (звесь) Авраамо́скэ: “Дэвэ́л бахтякирэ́ла сарэ́ манушэ́н пир ту́тэ.”

⁹ Палдава́, сарэ́, кон исын патяибнаскирэ, исын бахтякирдэ, сыр Ёв сыс.

¹⁰ А сарэ́, кон розгинэла пэ Законо́скирэ бутя́, исын прокошнэ, пал-дова́ со исын чхиндло́: “Кажно ману́ш, кон на рикирлапэ сарэскэ, соб (кай) саро́ тэ кэрэ́л, со исын чхиндло́ дрэ Свэнтонэ́-Чхиныбнаскири лылвари́, соб (кай) тэ явэ́л прокошно́!”

¹¹ а ни екхэ манушэ́с Дэвэ́л на приджинэла чачунэса анги́л Лэ́стэ, пал-дова́ со: “Чачуно́ ману́ш дживэ́ла пир патяибэ́н.”

¹² Дро Зако́но нанэ ни саво́ кхэтаныпэн патяибна́са, екх со дова́: “Кон сполнинэла саро́ Зако́но, одова́ явэ́ла тэ дживэ́л.”

¹³ Христо́со выкиндя амэн Законо́скирэ прокошыбнастыр, ке́ли Ёв лыя́ Законоскиро прокошыбэ́н пэ Пэ́стэ, сыр исын чхиндло́ дро Зако́но: “Кажно ману́ш, кон исын убладо пэ кашт, тэ явэ́л тэл Дэвлэ́скиро прокошыбэ́н”,

¹⁴ соб (кай) Авраамо́скиро бахтякирибэ́н тэ явэ́л пэ Наюдэ́ндэ пир патяибэ́н дрэ Исусо́стэ Христосо́стэ ваш дова́, соб (кай) амэ могинасас тэ дорэсас (тэ долас) Ду́хо (Фа́но), пал Саво́ Дэвэ́л дыя́ лав пир патяибэ́н.

Зако́но и Дыно́ Лав

¹⁵ Пшала́лэ! Мэ ракира́ва пир манушы́тко годы́: ние́кх ману́ш дуендыр на отпарувэла ци дочхувэла вари-со кэ подчхиндло завето, саво́ анги́л сыс счхудо машки́р дуендэ.

¹⁶ Нэ Дэвэ́л дыя́ Лэ́скиро лав Авраамо́скэ и лэ́скирэ-чхавэ́нгирэ чхавэ́нгэ: дро Свэ́нто Чхиныбэ́н ракирлапэ на пал “сэмэнцэндэ” сы́рбы пал бутэ́ манушэ́ндэ, а пал екхэ “сэмэнцатэ”, пал Христосо́стэ.

¹⁷ Мэ пхэна́ва какана́: Зако́но, саво́ сыс дыно́ штаршэла́ трия́нда бэрш коригэды́р (позжэды́р), на отпарувэла завето, саво́ Дэвэ́л дудвалякирдя (утвердиндя), и лэ́скиро дыно́ лав на хасякирэ́ла зор.

¹⁸ Ко́ли мэкно́ миштыпэ́н исын пир Зако́но, тэды нанэ буты́р пир дыно́ лав, а Дэвэ́л дыя́ лэс Авраамо́скэ пир дыно́ лав.

¹⁹ Ваш со тэды сыс дыно́ Зако́но? Ёв сыс дочхудо, соб (кай) тэ сыкавэ́л, со дасаво чорипэ́н исын, пака на явэ́ла Авраамо́скирэ-родоскири сэмэ́нца, ваш конэ́скэ сыс дыно́ лав; Янго́лы пиридынэ Зако́но пир машкиратунэстэ (посредникостэ) – Мойзастэ.

²⁰ Нэ Дэвлэ́скэ на трэиндя́ машкиратуно, ке́ли Ёв дыя́ лав Авраамо́скэ екх пэ екх.

Ваш со исын Зако́но

²¹ Со ж тэды Зако́но исын проти Дэвлэ́скирэ дынэ́ лава́? Сарэ́са над! Пал-дова́ со, ко́ли тэ явэ́л дасаво Зако́но, саво́ могинэлас тэ дэл ве́чно джиибэ́н, тэды амэ могинасас тэ дорэсас чачипэ́н Законо́стыр;

²² нэ Свэ́нто Чхиныбэ́н ракирэ́ла, со сарэ́ мануша́ исын тэл грэхоскири зор, палдава́ бахталыпэ́н, пал саво́ Дэвэ́л дыя́ лав, пир патяибэ́н дрэ Исусо́стэ Христосо́стэ, тэ явэ́л дыно́ одолэ́нгэ, савэ́ патя́на.

²³ Нэ анги́л патяибэ́н дрэ Исусо́стэ Христосо́стэ, амэ са́мас сы́рбы запхандлэ тэл Законоскиро ракхибэн ваш дова́, соб (кай) тэ ужакирас, ке́ли откэрэлапэ патяибэ́н.

²⁴ Палдава́ Зако́но дыкхця́ пал амэ́ндэ и сыс сы́рбы сыкляибнари (воспитателё), саво́ лыджия́ амэн кэ Христо́со ваш дова́, соб (кай) Дэвэ́л тэ приджинэл амэн чачунэнца пир патяибэ́н.

²⁵ А ке́ли явдя́ Христо́со, амэ́нгэ какана́ буты́р на трэй сыкляибнари тэ дыкхэ́л пал амэ́ндэ;

²⁶ пал-дова́ со амэ сарэ́ сам Дэвлэ́скирэ чхавэ́ пир патяибэ́н, дро екхипэ́н Исусо́са Христосо́са.

²⁷ И сарэ́ тумэ́, савэ́ болдэпэ дро екхипэ́н Исусо́са Христосо́са, тумэ́ сы́рбы кхэтанякирдэпэ Христосо́са пир Свэ́нто Ду́хо (Фа́но).

²⁸ Нанэ ни Юдос, ни Грекос; нанэ ни писхари́с, ни вольнонэ манушэ́с; нанэ ни муршэ́с, ни джувля́; пал-дова́ со тумэ́ сарэ́ сан екх дро екхипэ́н Исусо́са Христосо́са.

²⁹ А ко́ли тумэ́ сан Христосо́скирэ, тэды тумэ́ сан Авраамо́скирэ родо́стыр; мануша́, савэ́ дорэсэ́на дова́, пал со Дэвэ́л дыя́ лав.