Galatenge 1 - Библия - Пэ Балтитко Романи чиб (Романэс) 2019

¹ Апостолостыр Павли́стыр, саво́ сыс выкэдыно на пир манушэ́ндэ и на пир манушы́тко годы́, а пир Исусо́стэ Христосо́стэ и Дэвлэ́стэ Дадэ́стэ, Саво́ ґаздыя́ Лэс мулэ́ндыр,

² и сарэ́ пшалэ́ндыр, кон исын ма́нца, Галатиякирэ кхангирьякэ.

³ Тэ явэ́л бахталыпэ́н и рама́нё (миро) тумэ́нгэ Дэвлэ́стыр Дадэ́стыр и амарэ́ Ра́стыр-Дэвлэ́стыр, Исусо́стыр Христосостыр,

⁴ Саво́ отдыя́ Пэс Кокоро́ пал амарэ́ грэ́хи, соб (кай) тэ зракхэ́л амэн далэ́ хоханэ́ свэто́стыр пир Дэвлэ́скирэ-Дадэ́скири во́ля,

⁵ тэ явэ́л сла́ва Дэвлэ́скэ Дадэ́скэ пэ сарэ́ бэрша́ и ве́ки. Ами́нь.

Екх Ева́нгелия

⁶ Мэ дивинавапэ, со тумэ́ адя́кэ сы́гэс рисёна Лэ́стыр, Саво́ кхардя́ тумэн пир Христосо́скиро бахталыпэ́н кэ яви́р бахталы́ зан (звесь),

⁷ сави́ нанэ яви́р Ева́нгелия, а дава́ исын вари-савэ́ яви́р мануша́, савэ́ дылнякирэна тумэн и камэ́на тэ пиририскирэн Христососкири Ева́нгелия.

⁸ Нэ ко́ли амэ, ци аж Янго́ло Болыбна́стыр явэ́лас и явэ́лас тэ роспхэнэл яви́р бахталы́ зан (звесь), нэ на дасави́, со амэ роспхэндям; мэк ёв тэ явэ́л прокошно́.

⁹ А сыр амэ пхэндям англэды́р, адя́кэ-паць и мэ какана́ пхэна́ва: ко́ли вари-кон роспхэнэ́ла вари-сави́ яви́р бахталы́ зан (звесь), и на дасави́, со амэ роспхэндям, мэк ёв тэ явэ́л прокошно́.

¹⁰ Нау́што мэ патякирава манушэ́н ци Дэвлэ́с? Ци мэ родава вари-со, соб (кай) мэ тэ явав лачхо́ манушэ́нгэ? Пал-дова́, со ко́ли мэ тэ явав лачхо́ манушэ́нгэ, тэды мэ на ява́ва Христосо́скиро писха́ри.

Сыр Па́вли Яця́ Апостолоса?

¹¹ Нэ соб (кай) тумэ́ тэ джинэ́н, пшала́лэ, со бахталы́ зан (звесь), сави́ мэ роспхэнава тумэ́нгэ, исын счхуды на пир манушы́тко годы́.

¹² Пал-дова́ со и мэ на прилыём ла манушэ́ндыр, и ние́кх ману́ш на сыклякирдя́ ман пал бахталы́ зан (звесь), а Екх Ису́со Христо́со сыкадя́ ма́нгэ, со тэ пхэна́в.

¹³ Тумэ́, хачи, шундлэ́ пал дова́, сыр мэ дживдём пир Юды́тко сыклякирибэ́н, сыр мэ пхагирдём ме́ра, ке́ли мэ традавас Дэвлэ́скирэ кхангирья́кирэ манушэ́н и причхудём зор тэ хасякира́в лэн;

¹⁴ и мэ со́мас славутнэдыр явирэ тэрнэ́ Юдэндыр мирэ́ бэршэса пир Юды́тко сыклякирибэ́н, ма́ндэ сыс буты́р илэ́скиро хачкирибэ́н пал амарэ́-дадэ́нгиро присыкляибэн.

¹⁵ А ке́ли сыс лачхо́ Дэвлэ́скэ, Саво́ выкэдыя́ ман тэды, ке́ли мэ ишчо (инкэ́) со́мас дрэ дакири лочови́ (утроба); и Саво́ прикхардя ман пир Пэ́скиро бахталыпэ́н,

¹⁶ и откэрдя Пэ́скирэ Чхавэ́с дрэ ма́ндэ, соб (кай) мэ могинавас тэ роспхэнав бахталы́ зан Наюдэ́нгэ, и тэды мэ на лыём тэ радинавпэ манушэ́нца,

¹⁷ и мэ на гиём дро Ерусалимо кэ одолэ́ мануша́, савэ́ ячнэ́ Апо́столы (Апостолэнца) англэды́р ма́ндыр, а мэ гиём дрэ Аравия, и тэды явдём палэ дро Дама́ско.

¹⁸ Тэ́ньци, пало́ (после) трин бэрш мэ гиём дро Ерусалимо тэ дыкхавпэ Пэтриса, и мэ яцёмпэ лэ́са дэшупандж дывэса́;

¹⁹ нэ мэ на дыкхцём ни савэ́ явирэ Апостолос, екхэ Яково́с, Ра́скирэ-Дэвлэ́скирэ пшалэ́с.

²⁰ А дова́, со мэ чхина́ва тумэ́нгэ, ґа́да, – анги́л Дэвлэ́стэ, мэ на хохавава.

²¹ Тэ́ньци мэ гиём пир Сириякирэ и Килиякирэ пхувья́.

²² Нэ патяибнаскирэ дрэ Христосо́стэ кхангирья́кирэ скэдыибна́стыр дрэ Юдэ́я на джиндлэ́ ман дро муй;

²³ екх, со ёнэ шундлэ́ пал ма́ндэ, сыс дова́, со одова́ ману́ш, кон традэлас лэн вари-ке́ли, роспхэнэ́ла бахталы́ зан (звесь), сави́ ёв, хачи, ґарэдыр хасякирэлас:

²⁴ и ёнэ сарэ́ славиндлэ Дэвлэ́с пал ма́ндэ.