Filipiicenge 3 - Библия - Пэ Балтитко Романи чиб (Романэс) 2019

Чачуно́ Патяибэ́н

¹ Какана́, пшала́лэ мирэ́, радынэ́нпэ дро екхипэ́н Ра́са-Дэвлэ́са: ма́нгэ нанэ пхаро́ тэ чхинав тумэ́нгэ пал дава́-паць, нэ ваш тумэ́нгэ дава́ исын сыкляибэн.

² Ракхэ́нпэ манушэ́ндыр, савэ́ кэрэ́на биба́хт, сыр джукэла, ракхэ́нпэ холямэ́ манушэ́ндыр, ракхэ́нпэ хоханэ́ обчхиныбнастыр.

³ Пал-дова́ со обчхиныбэн дава́ исын амэ тумэ́нца, савэ́ мангэ́напэ Дэвлэ́скэ Лэ́скирэ Духо́са, и шарасапэ дро екхипэ́н Исусо́са Христосо́са, и амэ на древа́н патя́са дрэ лоч (плоть),

⁴ мэк и мэ адя́кэ-паць древа́н патя́ва дрэ лоч; а ко́ли вари-кон яви́р камэ́ла тэ патял древа́н дрэ лоч, тэды ма́ндэ исын буты́р саштыпэн:

⁵ мэ со́мас обчхиндло пэ охто́то (бидуе́нгиро дэ́што) дывэ́с, сыр бияндыём, мэ сом Израилёскирэ родо́стыр, и мэ сом Вениамино́скирэ родыцо́стыр, Юдо Юдэндыр, и мэ сом Фарисеё пир сыклякирибэ́н;

⁶ мэ со́мас баро́ вэ́рго и хачкирдэ́ илэ́са традыём Христососкири Кхангири́ и пир Законоскиро чачипэ́н мэ сом бидошакиро;

⁷ нэ со ваш ма́нгэ сыс льго́та, мэ лыём тэ гинав пал хасибэ́н ваш Христосо́скэ.

⁸ И мэ гинава саро́ яви́р пал хасибэ́н ваш дова́, соб (кай) бутэды́р тэ уджинав мирэ́ Рас-Дэвлэ́с, Исусо́с Христосо́с, ваш Лэ́скэ мэ сарэ́стыр отпхэндёмпэ, мэ саро́ гинава пал шума (смети), соб (кай) ма́нгэ екх тэ явав дро екхипэ́н Христосо́са;

⁹ и тэ явав сарэ́са дро екхипэ́н Лэ́са на пэ́скирэ чачипна́са; саво́ исын Законо́стыр, нэ чачипна́са, саво́ исын пир патяибэ́н дро Христосо́стэ, чачипна́са, саво́ исын Дэвлэ́стыр пир патяибэ́н,

¹⁰ соб (кай) тэ уджинав Лэс и Лэ́скирэ отджидякирибнаскири зор, и тэ явав кхэтанэ́ дрэ Лэ́скирэ мэ́ньки, и тэ мэрав, сыр Ёв.

¹¹ Соб (кай) фэ́ни (то́ка) тэ дорэсав отджидякирибэн мулэ́ндыр кэ джиибэ́н.

Прастаибэ́н кэ Рэс (Цэ́лё)

¹² Нэ пал-дова́, со мэ ничы́ саро́ дава́ на дорэсцём, и мэ на сом какана́ бидошакиро, нэ мэ причхувава зор тэ латхав, ци на латхава и мэ дова́, пал со и латхя́ ман Ису́со Христо́со ваш Пэ́скэ.

¹³ Пшала́лэ, мэ гинава, со кокоро́ мэ на латхём, нэ екх, со мэ бистрава дова́, со яця́пэ палэ, и мэ джа́ва анги́л,

¹⁴ мэ прастава кэ цэлё, кэ най вучэды́р паты́в, ваш сави́ Дэвэ́л кхардя́ ман пир Христосо́стэ Исусо́стэ.

¹⁵ И ада́кицы, пэ кицы́ амэ́ндыр исын бидошакирэ мануша́, лэ́нгэ адя́кэ трэй тэ думинэн, а ко́ли тумэ́ пал дава́ пэ яви́р думинэ́на, то и дава́ Дэвэ́л отчхакирэла тумэ́нгэ.

¹⁶ Нэ дова́, со амэ прилыям, адя́кэ и амэ ява́са тэ думинас и тэ джива́с.

¹⁷ Пшала́лэ, причхувэ́н зор тэ кэрэ́н адя́кэ-паць сыр мэ, и дыкхэ́н пэ одолэ́ манушэ́ндэ, савэ́ кэрэ́на дова́-паць, сыр и тумэ́ думинэ́на пал амэ́ндэ;

¹⁸ пал-дова́ со бут мануша́, пал савэ́ндэ мэ частэс ракирдём тумэ́нгэ, а какана́ и ясвэ́нца мэ ракира́ва, кэрэ́на сыр вэ́рги Христосо́скирэ мэрибна́скэ пэ трушу́л:

¹⁹ ёнэ исын тэрдэ́ пэ дром кэ хасибэ́н, лэ́нгиро дэвэл исын кужум (жэлудко), и лэ́нгири сла́ва исын дрэ ладж, ёнэ думинэ́на екх пал далэ́ свэто́скирэ рэ́нды:

²⁰ пал-дова́ со амэ сам джиибнарья тхэмэстыр (штэто́стыр), саво́ исын дро Болыбна́скиро Раё, одотхы́р амэ ужакираса и амарэ́ Зракхибнарис Рас-Дэвлэ́с, Исусо́с Христосо́с,

²¹ Саво́ парувэла амарэ́ хасибны́тка маса́ адя́кэ, со ёв явэ́ла тэ зджал пэ Лэ́скирэ маса́ зорья́са, савья́са Ёв чхудя́ тэлэ́ саро́ анги́л Пэ́стэ.