Filipiicenge 2 - Библия - Пэ Балтитко Романи чиб (Романэс) 2019

Христосо́скиро Кандыпэ́н и Барипэ́н

¹ И ко́ли ваш тумэ́нгэ исын вари-саво́ подрикирибэ́н дрэ Исусо́стэ, ко́ли исын вари-сави́ бахт тумарэ́ патыватыр кэ яви́р мануша́, ко́ли исын вари-саво́ илэ́скиро кхэтаныпэн пир Ду́хо, ко́ли исын вари-саво́ тангипэ́н и жалима,

² тэды пхэрдякирэн мири́ ра́дыма, соб (кай) тумэ́ тэ явэ́н кхэтанэ́, тэ явэ́н тумэ́ндэ екх дова́-паць выкэдыибэн, и дживэ́н екх екхэ́са дро ладо, и тэ кэрэ́н рэ́нды (де́лы) пир екх рэс (цэлё);

³ и тэ на кэрэ́н ничи́ пир холы́, ци пир пэ́скиро шарибэ́н, а тэ кандэ́н екх екхэ́с, тэ гинэн явирэ манушэ́н фэды́р пэ́стыр;

⁴ на екх пал пэ́стэ кажно ману́ш исын банго́ тэ дыкхэ́л, нэ и пал явирэндэ.

⁵ Палдава́ трэй, соб (кай) тэ явэ́л тумэ́ндэ доя́-паць годы́, сави́ исын дрэ Исусо́стэ Христосо́стэ;

⁶ Савэ́стэ сыс андратуно кхэтаныпэн Дэвлэ́са, нэ Ёв на гиндя Пэс тэ сыкавэ́л адасавэса-паць, сыр Дэвэ́л,

⁷ а Ёв чхудя́ дрэ риг Пэ́скири Дэвлыткима, Ёв яця́ сыр писха́ри, саво́ зджа́ла пэ манушэ́ндэ, и пир дыкхибэ́н – Ёв яця́ сыр ману́ш;

⁸ Ёв чхудя́ Пэс тэлэды́р, кандыя́ кэ мэрибэ́н, и мэрибэ́н пэ трушу́л.

⁹ Палдава́ адя́кэ-паць и Дэвэ́л ґаздыя́ Лэс и дыя́ Лэ́скэ лав вучэды́р сарэ́ лавэ́ндыр,

¹⁰ соб (кай) ваш Исусо́скиро лав, саро́, со исын пэ болыбэ́н, пэ пхув, и тэл пхув, тэ бандёл пэ чанга́,

¹¹ и, соб (кай) кажно чиб тэ ракирэ́л, со Рай Дэвэ́л, Ису́со Христо́со, исын Рай Дэвэ́л ваш Дэвлэ́скирэ-Дадэ́скири сла́ва.

Зяинэ́н Сыр Дуд дро Свэ́то

¹² И палдава́, мирэ́ дро́га, сыр тумэ́ саро́ часо, ке́ли мэ сом тумэ́нца, нэ буты́р сарэ́стыр какана́ дро дава́ часо, ке́ли ман нанэ тумэ́нца, причхувэ́н зор дара́са и издраныпнаса тэ кэрэ́н буты́ ваш пэ́скиро зракхибэ́н,

¹³ пал-дова́ со адава́ исын Дэвэ́л, Саво́ выкхарэла дрэ тумэ́ндэ во́ля и рэ́нды пир Пэ́скиро выкэдыибэн.

¹⁴ Саро́ кэрэ́н би холямэ́ ракирибнаскиро и би кунипнаскиро,

¹⁵ соб (кай) тумэ́нгэ ни дро со тэ на явэ́л банг и, соб (кай) тумэ́ тэ явэ́н жужэ́ (чыста) Дэвлэ́скирэ чхавэ́ и бидошакирэ машки́р манушэ́ндэ, савэ́ исын биладжаипнытка и розмэкнэ, кай тумэ́ зяинэна сыр чэргэня́ дро свэ́то,

¹⁶ ке́ли ракхэна джиибна́скиро лав ваш миро шарибэ́н дро Христосо́скиро дывэ́с, со мэ на ивья́ (на напра́снэс) псирдём и кэрдём буты́.

¹⁷ Нэ ко́ли ма́нгэ приявэлапэ тэ отдав пэ́скиро джиибэ́н сыр свэ́нто дыибэ́н пал тумаро́ патяибэ́н, то мэ сом радо, и мэ ява́ва тэ радынавпэ кхэтанэ́ сарэ́нца тумэ́нца.

¹⁸ И адя́кэ-паць тумэ́ радынэ́нпэ, и радынэ́нпэ ма́нца.

¹⁹ Нэ мэ радынава пэс дрэ Растэ – Дэвлэ́стэ Исусо́стэ тэ бичхавав сыг кэ тумэ́ Химас, соб (кай) и мэ, сыр мэ уджинава нэвипэн пал тумэ́ндэ, тэ явав адя́кэ-паць подрикирдо дро ду́хо (фа́но).

²⁰ Пал-дова́ со ма́ндэ нанэ никонэ́с адасавэс (нико́н адасаво́), сыр ёв исын, кон сарэ́ илэ́стыр пэкэлапэ (дэла туги) пал тумарэ́ рэ́нды (де́лы).

²¹ Сарэ́ пэкэнапэ (заботисона) пал пэ́стэ, а на пал дова́, со трэй Исусо́скэ Христосо́скэ.

²² Нэ сыр ёв (Хима) пэс сыкадя́, тумэ́ кокорэ́ джинэ́на, пал-дова́ со ёв сыс кхэтанэ́ ма́нца, сыр чхаво́ дадэ́са, дынариндя́ ваш бахталы́ зан (звесь).

²³ Палдава́ мэ кама́м тэ бичхавав лэс кэ тумэ́, сыр мэ ява́ва тэ джина́в, со явэ́ла дурэды́р ма́нца:

²⁴ нэ мэ древа́н патя́ва дрэ Растэ-Дэвлэ́стэ, со мэ и кокоро́ ява́ва кэ тумэ́;

²⁵ нэ мэ выкэдыём, со трэй тэ бичхавав кэ тумэ́ Епафродитос, пшалэ́с и мирэ́ малэс (другос) пир буты́, савэ́с тумэ́ бичхадэ́ тэ пэкэлпэ пал ма́ндэ;

²⁶ пал-дова́ со ёв древа́н мангдя́ тэ дыкхэ́л сарэ́н тумэн и пхарэ́с пиридживэлас пал дова́, со тумэ́ шундлэ́ пал лэ́скиро насвалыпэн;

²⁷ а ёв древа́н сыс насвало́, гин кэ мэрибэ́н, нэ Дэвэ́л потангиндя лэс, и на екхэ лэс, нэ адя́кэ-паць и ман, соб (кай) тэ на явэ́л ма́ндэ ту́га пэ ту́га.

²⁸ И палдава́ мэ сыгэды́р бичхадём лэс кэ тумэ́, соб (кай), ке́ли тумэ́ лэс нэвэ́стыр дыкхэ́на, тэ обрадынэнпэ, и мэ ява́ва на́бут тэ тугинав.

²⁹ Прилэ́н лэс палдава́ радыма́са дро екхипэ́н Ра́са-Дэвлэ́са и кэрэ́н паты́в адасавэ́ манушэ́нгэ, сыр ёв исын;

³⁰ пал-дова́ со ёв на тангиндя пэ́скиро джиибэ́н кэ мэрибэ́н и кэрдя́ буты́ би дара́киро ваш Христосо́скэ, соб (кай) тэ дэл васт ма́нгэ, сыр тумэ́ на могиндлэ́ дава́ тэ кэрэ́н.