Filipiicenge 1 - Библия - Пэ Балтитко Романи чиб (Романэс) 2019

¹ Павли́стыр и Химастыр (Тимафеёстыр), Исусо́скирэ Христосо́скирэ писхарьендыр, кэ сарэ́ свэ́нта мануша́ дрэ Филипы, кон патя́ла дрэ Исусо́стэ Христосо́стэ сарэ́ епископэнца (кхангирья́кирэ барыдырэ́нца) и диаконэнца;

² мэк тэ явэ́л бахталыпэ́н и рама́нё (миро) тумэ́нгэ амарэ́ Дэвлэ́стыр Дадэ́стыр и Ра́стыр-Дэвлэ́стыр, Исусо́стыр Христосостыр.

Павли́скиро Мангипэ́н (Па́тери) пал Патяибнаскирэ́ндэ

³ Мэ парикирава мирэ́ Дэвлэ́скэ, ке́ли кажно мо́ло рипирава пал тумэ́ндэ,

⁴ саро́ часо дро миро мангипэ́н Дэвлэ́скэ, барэ́ радыма́са мэ мангавапэ Дэвлэ́скэ пал тумэ́ндэ,

⁵ пал-дова́ со тумэ́ роспхэнэнас бахталы́ зан (звесь) пэрвонэ́ дывэсэ́стыр и адя́кэ-паць кэ ададывэсатуно дывэ́с,

⁶ мэ патя́ва зоралэ́с дро дова́, со Дэвэ́л, Кон лыя́ тэ кэрэ́л дрэ тумэ́ндэ дава́ лачхо́ рэ́ндо, явэ́ла тэ кэрэ́л кэ/жы́ко дова́ Дывэ́с, ке́ли нэвэ́стыр явэ́ла Ису́со Христо́со:

⁷ чачэс, дава́ трэй ма́нгэ тэ мыслинав пал сарэ́ндэ тумэ́ндэ, пал-дова́ со тумэ́ сан дро миро ило́ и какана́ дро штарибэ́н (бэшыбэн), адя́кэ-паць, ке́ли мэ затэрдёвава пал сарэ́ндэ тумэ́ндэ и допхэнава патяибэ́н пал бахталы́ зан (звесь), сарэ́н тумэ́ндэ, савэ́ сан кхэтанэ́ ма́нца дро Дэвлэ́скиро бахталыпэ́н.

⁸ Дэвэ́л исын якхи́тко ма́нгэ, со тумэ́ сан древа́н дро́га ма́нгэ сарэ́ тумэ́, Исусо́скирэ Христосо́скирэ ласкаса.

⁹ И мэ мангавапэ Дэвлэ́скэ пал дова́, соб (кай) тумари́ паты́в кэ яви́р мануша́ уса́ буты́р и буты́р тэ барьёл пир джиныбэ́н и кажно хор ґалыибэ́н,

¹⁰ соб (кай) тумэ́ могинэ́нас тэ розлэн (тэ розгалён), со исын фэды́р ваш тумэ́нгэ, соб (кай) тумэ́ тэ явэ́н жужэ́ и бибангипнаскирэ дро Дывэ́с, ке́ли Христо́со явэ́ла,

¹¹ соб (кай) тумаро́ джиибэ́н тэ явэ́л пхэрдо́ чачипна́са, саво́ исын пир Исусо́стэ Христосо́стэ, ваш Дэвлэ́скири сла́ва и шарибэ́н.

Тэ Дживэ́л ваш Павли́скэ Значынэ́ла тэ Явэ́л Сыр Христо́со

¹² Пшала́лэ, мэ кама́м, соб (кай) тумэ́ тэ джинэ́н, со саро́, со кэрдя́пэ ма́нца, и со помогиндя ма́нгэ мишто́ тэ роспхэнав бахталы́ зан,

¹³ адя́кэ, со яця́ джиндло́ халадэнгэ дрэ претория и явирэ́нгэ, со мэ сом бэшто́ дро штарибэ́н пал патяибэ́н дро Исусо́стэ Христосо́стэ,

¹⁴ со барэды́р паш пшалэ́ндыр пир Растэ-Дэвлэ́стэ, пир дава́, со мэ сом бэшто́ дро штарибэ́н пал патяибэ́н, ячнэ́ зоралэды́р дро патяибэ́н дрэ амарэ́ Растэ-Дэвлэ́стэ и тэ ракирэ́н Дэвлэ́скиро лав би дара́киро.

¹⁵ Чачо́, со вари-савэ́ лэ́ндыр роспхэнэна Христосо́скиро лав пир зэвлыныпэ́н и пир дова́, со выпробинэна екх екхэ́с, нэ яви́р роспхэнэна лав пал Христосо́стэ патыва́са.

¹⁶ Екх мануша́ роспхэнэна Христосо́скиро лав далэ́стыр, со ёнэ спробинэна зорья дро лав екх екхэ́са, а на илэ́стыр, ёнэ камэ́на тэ кэрэ́н, соб (кай) тэ явэ́л ма́нгэ пхарэдыр дро штарибэ́н.

¹⁷ Нэ яви́р мануша́ роспхэнэна лав пир ла́ска; ёнэ джинэ́на, со мэ сом чхудо тэ затэрдёвав пал бахталы́ зан.

¹⁸ Нэ со исын далэ́стыр? Сы́рбы тэ на роспхэнэ́н Христосо́скиро лав дуемуиткэс (притворнэс) ци сарэ́ илэ́стыр, мэ и далэскэ сом радо и мэ адя́кэ-паць ява́ва тэ радынавпэ;

¹⁹ пал-дова́ со мэ джино́м, со дава́ явэ́ла ма́нгэ дыно́ ваш зракхибэ́н пир тумаро́ мангипэ́н и подрикирибэ́н Исусо́скирэ-Христосо́скирэ Духо́стыр.

²⁰ Мэ джино́м зоралэ́с и мэ патя́ва, со ма́нгэ ни дро со на явэ́ла ладжаво, а мэ, сыр ґарэдыр, адя́кэ-паць и какана́ би дара́киро, ява́ва тэ барьякирав паты́в Христосо́скэ мирэ́ джиибнаса, ци ява́ва мэ джидо́, ци муло́.

²¹ Палдава́ со джиибэ́н ваш ма́нгэ исын Христо́со, и мэрибэ́н дава́ исын буты́р джиибэ́н Христосо́са;

²² нэ ко́ли ма́нгэ тэ джива́в дрэ лоч (плоть), дова́ дэ́ла ра́дыма пал мири́ буты́, тэды мэ на джино́м, со фэды́р ма́нгэ тэ выкэдав.

²³ Ман тырдэла и екх и яви́р: ма́ндэ исын выкэдыибэн тэ розячавпэ джиибнаса и тэ явав кхэтанэ́ Христосо́са, пал-дова́ со дава́ исын фэды́р сарэ́стыр,

²⁴ нэ тэ ячавпэ джидо́, дава́ исын буты́р трэй ваш тумэ́нгэ;

²⁵ и мэ чачэс, джино́м дава́, со мэ ячавапэ и мэ ява́ва сарэ́нца тумэ́нца кхэтанэ́ ваш тумари́ бахт и ра́дыма дро патяибэ́н;

²⁶ соб (кай) тумаро́ шарибэ́н дро екхипэ́н Христосо́са тэ барьёл пир ма́ндэ, ке́ли мэ ява́ва яви́р мо́ло кэ тумэ́.

²⁷ Дживэ́н гожэс адя́кэ, соб (кай) тэ явэ́н лачхэ́ Христосо́скирэ – бахталэ́ занякэ (звесякэ), соб (кай) мэ, ке́ли ява́ва и дыкха́ва тумэн, ци на ява́ва, нэ соб (кай) тэ шунав тумэ́ндэ, со тумэ́ сан тэрдэ́ зоралэ́с дро екх ду́хо (фа́но), со тумэ́ марэнапэ кхэтанэ́ пал патяибэ́н дрэ бахталы́ зан (звесь),

²⁸ и соб (кай) тумэ́ тэ на дарэ́н ни дро со манушэ́ндыр, савэ́ исын сцял (проти) тумэ́ндэ, дава́ ваш лэ́нгэ исын дыно́ сыкаибэ́н кэ хасибэ́н, а ваш тумэ́нгэ кэ зракхибэ́н, и дава́ саро́ исын Дэвлэ́стыр;

²⁹ пал-дова́ со тумэ́нгэ сыс дыно́ ваш Христосо́скэ на со тэ патя́н дрэ Лэ́стэ, нэ и тэ пиридживэн мэ́ньки пал Лэ́стэ,

³⁰ дасавэ́-паць пхарипнаса, саво́ тумэ́ вари-ке́ли дыкхнэ́ дрэ ма́ндэ, и какана́ тумэ́ шунэ́на пал ма́ндэ.