Езэкилё 7 - Библия - Пэ Балтитко Романи чиб (Романэс) 2019

Сэ́ндо Уса Сыгэды́р Проти Израилё

¹ И сыс кэ мэ Ра́скирэ-Дэвлэ́скиро лав дасаво:

² “Ту, манушэ́скиро чхава, пхэн: “Адя́кэ ракирэ́ла Рай Дэвэ́л, Дэвэ́л. ‘Ко́нцо (яго́ро) исын Израилёскирэ пхувьякэ, ко́нцо (яго́ро) явдя́ пэ сарэ́ штар рига́.

³ Акэ, ко́нцо явдя́ ту́кэ. Бичхава́ва Мэ пэ ту́тэ Мири́ холы́, Мэ ява́ва тэ сэндякирав тут пир тырэ́ дрома́, и Мэ чхува́ва банг пэ ту́тэ пал сарэ́ тырэ́ джунгалыпэна.

⁴ И на потангинэла тут Мири́ якх, и Миро ило́ на ковлёла кэ ту. Мэ отда́ва палэ ту́кэ пир тырэ́ дрома́, и джунгалыпэна тырэ́ явэ́на ту́са, и ґалёна, со Мэ сом Рай Дэвэ́л, Дэвэ́л.’

⁵ “Адя́кэ ракирэ́ла Рай Дэвэ́л, Дэвэ́л: ‘Бари биба́хт екхджины, акэ, джа́ла биба́хт.

⁶ Ко́нцо (яго́ро) явдя́, явдя́ ко́нцо (яго́ро), ґаздыя́пэ пэ ту́тэ, акэ, явдя́.”

⁷ Явдя́ тыри́ кирки до́ля кэ ту, ману́ш, саво́ дживэ́ла пэ пхув! Явэ́ла часо (цы́ро), джа́ла пхаро́ дывэ́с, на явэ́ла тэ розмэкэлпэ ра́дыма пэ бэ́рги.

⁸ Акэ, сы́гэс Мэ чхува́ва пэ ту́тэ Миро холямипэн, и Мэ выпхэрдякирава пэ ту́тэ холы́ Мири́. Ява́ва Мэ тэ сэндякирав тут пир тырэ́ дрома́, Мэ чхува́ва банг пэ ту́тэ пал сарэ́ тырэ́ джунгалэ́ рэ́нды.

⁹ И на потангинэла тут Мири́ якх, и Миро ило́ на ковлёла кэ ту. Мэ отда́ва палэ ту́кэ пир тырэ́ дрома́, и чорипэна тырэ́ явэ́на ту́са, и тумэ́ ґалёна, со Мэ сом Рай Дэвэ́л, Дэвэ́л, Саво́ пхарэ́с сэндякирэ́ла.

¹⁰ Акэ, исын дывэ́с! Акэ, явдя́ ёв, выбария дэсто́, розбария пхутькирибэ́н.

¹¹ Ѓаздэлапэ нахратэс зор пэ чорипнэнгиро дэсто́. Ничи на ячэ́лапэ лэ́ндыр (Израилёстыр) и лэ́нгирэ барвалыпнастыр, лэ́ндыр кокорэндыр, лэ́нгирэ шуминыбнастыр, лэ́нгирэ гожыпнастыр.

¹² Явдя́ часо, подги́я дывэ́с. Кон киндя – на ра́дынпэ, кон бикиндя – на ров, пал-дова́ со холямипэн Дэвлэ́скиро исын пэ лэ́ндэ сарэ́ндэ.

¹³ Одова́, кон бикиндя, на рисёла кэ дова́, со ёв бикиндя, ко́ли ячэ́лапэ джидо́, пал-дова́ со пророкоскиро дыкхибэ́н ваш саро́ лэ́нгиро бутыпэн на отпарувэлапэ; и нико́н пэ́скирэ чорипнаса на зракхэ́ла пэ́скиро джиибэ́н.

¹⁴ Забашавэна дро ро́го (труба), саро́ кэдэлапэ, соб (кай) тэ джал пэ марибэ́н, нэ нико́н на явэ́ла пэ марибэ́н, пал-дова́ со Миро холямипэн исын пэ саро́ лэ́нгиро бутыпэн.

¹⁵ Пало́ кхэр-курта́ла, а дро кхэр-фуя́ и бокх. Кон исын пэ фэ́лда, одова́ мэрэ́ла куртала́тыр, а кон исын дрэ фо́ро, кодолэ́с схана бокх и фра́нсы.

¹⁶ А кон зракхэ́лапэ, одолэ́ нашэ́на, и явэ́на пэ бэ́рги сыр голумбы пэ до́ло. Сарэ́ ёнэ явэ́на тэ ровэ́н, кажно (сва́ко) пал пэ́скиро чорипэ́н.

¹⁷ Сарэ́ндэ обмэкэнапэ васта́, и чанга́ сарэ́ндэ издрана сыр пани́.

¹⁸ Тэ́ньци ёнэ урьенапэ дро балытко гуно праскаса, и учхакирэ́ла лэн трашаибэ́н, ладж явэ́ла пэ муя́ и ёнэ обчхинэна пэ́скирэ бала́.

¹⁹ Пэ́скиро руп вычхурдэна ёнэ пэ вули́ца (га́са), сувнака́й на явэ́ла лэ́нгэ трэй. Лэ́нгирэ руп и сувнака́й на зракхэна лэн дро дывэ́с, ко́ли явэ́ла Ра́скирэ-Дэвлэ́скиро холямипэн. Ёнэ на чаравэна лэ́нца лэ́скиро ди, и на пхэрдякирэна лэ́нца пэ́скиро пэр, пал-дова́ со руп и сувнака́й долыджинэ лэн кэ чорипэ́н.

²⁰ И сыс ёнэ пхутькирдэ́, со сыс лэ́ндэ руп и сувнака́й пэ урибэ́н, ёнэ кэрэ́нас лэ́ндыр вычхиндлэ́ муя́ пэ́скирэ джунгалэ́ дэвлорэ́нгэ. Пал дава́ Мэ кэра́ва адя́кэ, со руп и сувнака́й явэ́на сыр ґнэё.

²¹ Отда́ва Мэ руп и сувнака́й дрэ васта́ сыр дорэсыбэ́н чужонэ́ манушэ́нгэ, грэхитконэ́ манушэ́нгэ, со исын пэ пхув, ёнэ чорэна лэс, и явэ́ла руп, сувнака́й магирдэ́ лэ́ндыр.

²² И рисёва́ва Мэ лэ́ндыр Мирэ́ мо́са, и ёнэ магирэна Миро свэ́нто штэ́то. Явэ́на розмарибнарья тэ магирэ́н лэс.

²³ Кэр зандир (цэпо), пал-дова́ со пэ ада́я пхув чхувэ́лапэ рат, и дро фо́ро кэрэ́лапэ нахратыма (насильствы).

²⁴ Мэ яна́ва явирэ народо́стыр дасавэ́ манушэ́н, савэ́ исын най фуеды́р Наюдытконэ́ нацые́ндыр. Ёнэ залэна лэ́нгирэ кхэра́. И закончынэлапэ зоралэнгиро пхутькирибэ́н, и явэ́ла магирдо́ лэ́нгиро свэ́нто штэ́то.

²⁵ Джа́ла хасибэ́н: явэ́на тэ родэ́н рама́нё (миро), и на латхэ́на.

²⁶ Бари би́да явэ́ла пал бари би́да, шуныбэ́н пало́ шуныбэ́н. Явэ́на тэ мангэ́н дыкхибэ́н пророкостыр, на явэ́ла сыкляибэн рашастэ и лачхо́ лав годэ́ – пхурэндэ/пхурыдырэндэ.

²⁷ О кра́ли явэ́ла тэ тугинэл, тхагарис учхакирна бала́, манушэ́ндэ, со исын пэ пхув, явэ́на тэ издран васта́. Мэ кэра́ва лэ́нца пир лэ́нгирэ дрома́, Мэ ява́ва тэ сэндякирав лэн пир лэ́нгирэ сэнды, и ёнэ ґалёна, со Мэ сом Рай Дэвэ́л, Дэвэ́л.’”