Езэкилё 5 - Библия - Пэ Балтитко Романи чиб (Романэс) 2019

Курта́ла Явэ́ла пэ Ерусалимо

¹ А ту, манушэ́скиро чхава, лэ пэ́скэ востро (чолалы) курта́ла, лы́джа ла́са пир тыро́ шэро́ и пир тырэ́ чхора (брода) сыр мурадлуны (бритва), лэ пэ́скэ ублады́тка (весы), и роскэр бала́ пэ части (частыра).

² Три́то часть (частыр) хачкир яга́са машки́р фо́ро, сыр пхэрдякирэнапэ дывэса́, сыр вэ́рги облынэ трусця́л (ротаса) фо́ро, три́то частыр лэ и почингир куртала́са пашы́л фо́ро, и росчхурдэ три́то частыр пир балва́л. А Мэ вытырдава курта́ла пал лэ́ндэ.

³ Лэ далэ́стыр нэвэ́с на́бут, запхандэ лэн дрэ бринда пэ́скрэ урибнаскири.

⁴ А тэ́ньчи лэ ишчо (инкэ́) да лэ́стыр, со исын дрэ урибэ́н, и чхурдэ дрэ яг, схачкир кадава́ дрэ яг. Одотхы́р выджа́ла яг пэ саро́ Израилёскиро кхэр”

⁵ Адя́кэ ракирэ́ла Рай Дэвэ́л, Дэвэ́л, Сарэзорья́киро: “Кадава́ исын Ерусалимо! Мэ чхудём лэс машки́р народы, а пашы́л лэ́стэ-пхувья́.

⁶ А Ерусалимо кэрдя́ Мирэ́ припхэныбнэнца фуеды́р Наюдытконэ́ нацые́ндыр. Ёв кэрдя́ Мирэ́ закононэнца накучэдыр, со́са пхувья́, савэ́ исын пашы́л лэ́стэ. Ёнэ отпхэндлэпэ Мирэ́ упхэныбнэндыр, ёнэ на дживэ́нас пир Мирэ́ стату́ты.”

⁷ Палдава́ адя́кэ ракирэ́ла Рай Дэвэ́л, Дэвэ́л: “Пал дова́, со тумэ́ кэрэ́нас тумарэ́ грэ́хи буты́р сыр Наюды́тка на́цыи, савэ́ дживэ́нас пашы́л тумэ́ндэ; и на кэрэ́на сыр исын припхэндло дрэ Мирэ́ припхэныбэна́, на дживэ́на пир Мирэ́ зако́ны, и тумэ́ на дживэ́на пир зако́ны, савэ́ исын машкира́л Наюды́тка на́цыи, савэ́ исын трусця́л тумэ́ндэ,

⁸ палдава́ адя́кэ ракирэ́ла Рай Дэвэ́л, Дэвэ́л: “Акэ, чачэс, Мэ выджава пэ ту́тэ, Мэ Кокоро́, и кэра́ва машки́р ту́тэ сэ́ндо анги́л якха́ Наюдытконэ́-нацыенгирэ.

⁹ И Мэ кэра́ва ту́са дова́, со Мэ николи на кэравас, и со буты́р Мэ на ява́ва тэ кэра́в пал сарэ́ тырэ́ джунгалэ́ (брыдка) рэ́нды.

¹⁰ Пал дова́ дада́ явэ́на тэ хан машки́р ту́тэ чхавэ́н, а чхавэ́ явэ́на тэ хан дадэн. А Мэ ява́ва тэ сэндякирав тут, а тыро́ ячаибэ́н роспхурдава пир сарэ́ балваля.

¹¹ Палдова́, – “Тэ джива́в Мэ, – ракирэ́ла Рай Дэвэ́л, Дэвэ́л. – “Пал дова́, со ту магирдян Миро свэ́нто штэ́то сарэ́ пэ́скирэ джунгалыпнаса, и сарэ́ тырэ́ накуч рэндэ́нца Мэ кэра́ва тут тыкнэса, и на потангинэла тут Мири́ якх, и Миро ило́ на ковлёла пэ ту́тэ.

¹² Три́то паш ту́тэ мэрэ́ла фуендыр (язвэндыр) и хасёла бокха́тыр машки́р ту́тэ; три́то паш явэ́ла за-марды куртала́са пашы́л тыро́ фо́ро, а три́то паш Мэ роспхурдава пир сарэ́ балваля и Мэ вытырдава (дорэсава) пал лэ́ндэ курта́ла тэ традавпэ.

¹³ И пириячэ́ла Мири́ холы́, и штылёла Миро холякирибэ́н пэ лэ́ндэ, и явэ́ла Ма́нгэ пир ило́, и ґалёна, со Мэ, Рай Дэвэ́л, Дэвэ́л, ракиравас дро Пэ́скиро зэвлыныпэ́н, ко́ли кончынэлапэ Мири́ хор холы́ пэ лэ́ндэ.

¹⁴ И мэ кэра́ва адя́кэ, со ту явэ́са чхучи́ пхув и ладж, обракирибнаса машки́р народы, савэ́ исын пашы́л ту́тэ, анги́л якха́ кажнонэскирэ, кон явэ́ла тэ проджал пашы́л.

¹⁵ И явэ́са ту сабнаса, и ладжаса, сыкаибнаса, и явэ́на тэ дивинэнпэ дара́са пэ ту́тэ народы, савэ́ исын пашы́л ту́тэ, ко́ли Мэ ява́ва тэ сэндякирав тут барэ́ холя́са и мэнькаса. Мэ, Рай Дэвэ́л, Дэвэ́л, пхэндём дава́.

¹⁶ И ко́ли бичхава́ва Мэ пэ тумэ́ндэ барэ́ бокха, савэ́ явэ́на тэ хасякирэ́н тумэн, сыр мижэх матля, и ко́ли бичхава́ва лэн пэ тумаро́ хасибэ́н кэра́ва машки́р тумэ́ндэ бокх ишчо (инкэ́) зоралэды́р, Мэ отлава тумэ́ндыр маруно́ запасо,

¹⁷ то бичхава́ва пэ тумэ́ндэ бокх, захалэ, рискирибна́скирэ мурдалэ́н (зверен); ёнэ отлэна тумэ́ндыр чхаворэ́н. Мэрибнытка фра́нсы / фуя́ (язвы) и рат пэрэ́на пэ ту́тэ, курта́ла явэ́ла пэ тумэ́ндэ. Мэ, Рай Дэвэ́л, Дэвэ́л, пхэндём дава́.”