Езэкилё 48 - Библия - Пэ Балтитко Романи чиб (Романэс) 2019

Пхувья́кирэ Ме́жы

¹ Акэ, сыр кхарэнпэ ро́дыцы (чанга́/колены). Пэ паш-рати́тко риг пиро́ дром Хетлоностыр, саво́ лыджа́ла дрэ Емафо, Гацар Еноно, паш-ратитконэ́ межатыр Дамаскостыр пиро́ дром кэ Емафо, сари́ дая́ пхув вастоко́стыр кэ мо́рё (дэрья́в), исын екх пхувья́кири паш Даноскэ.

² Пашы́л Даноскири ме́жа васточнонэ рига́тыр кэ за́падно яго́ро (краё) исын екх Асироскиро паш.

³ Пашы́л Асироскири ме́жа васточнонэ рига́тыр кэ за́падно яго́ро исын екх Нефалимоскири паш.

⁴ Пашы́л Нефалимоскири ме́жа васточнонэ рига́тыр кэ за́падно яго́ро исын екх Манасия́скиро паш.

⁵ Пашы́л Манасияскири ме́жа, васточнонэ рига́тыр кэ за́падно яго́ро исын екх Ефремо́скири паш.

⁶ Пашы́л Ефремо́скири ме́жа васточнонэ рига́тыр кэ за́падно яго́ро исын екх Рувимоскири паш.

⁷ Пашы́л Рувимоскири ме́жа, васточнонэ рига́тыр кэ за́падно яго́ро исын екх Юдаскири паш.

⁸ Пашы́л Юдаскири ме́жа васточнонэ рига́тыр кэ за́падно яго́ро исын свэнтонэ́ – пхувья́киро котэ́р. Лэ́скиро буґлыпэ́н исын биш тэ пандж тысёнцы дэстэ́, а длугипэ́н кадасаво́, сыр явирэ-пашэнгиро длугипэ́н, васточнонэ рига́тыр кэ за́падно яго́ро машки́р лэ́стэ явэ́ла свэ́нто штэ́то.

⁹ Пхувья́киро котэ́р, саво́ тумэ́ отдэна Ра́скэ-Дэвлэ́скэ, сыр свэ́нто штэ́то, явэ́ла дро длугипэ́н биш тэ пандж тысёнцы дэстэ́, а лэ́скиро буґлыпэ́н явэ́ла дэш тысёнцы дэстэ́.

¹⁰ Кадава́ свэ́нто пхувья́киро котэ́р исын банго́ тэ явэ́л раша́нгиро, кэ паш-рати́тко риг биш тэ пандж тысёнцы дэстэ́ дро длугипэ́н, кэ мо́рё (дэрья́в) дро буґлыпэ́н дэш тысёнцы, кэ васто́ко дро буґлыпэ́н дэш тысёнцы, а кэ паш-дывэсы́тко риг дро длугипэ́н биш тэ пандж тысёнцы, машки́р лэ́стэ явэ́ла свэ́нто штэ́то Ра́скирэ-Дэвлэ́скиро.

¹¹ Кадава́ отдэ́н рашангэ Садокоскирэ чхавэ́ндыр, савэ́ сыс тэрдэ́ пэ Мири́ стрэ́га (стража), савэ́ дро часо, ко́ли дурьёнас Ма́ндыр Израилёскирэ чхавэ́, на гинэ́ криг Ма́ндыр, сыр гинэ́ криг яви́р Леви́ты.

¹² Кадава́ пхувья́киро котэ́р свэнтонэ́ котэрэстыр явэ́ла лэ́нгиро, Свэ́нто-свэнтонэстыр пашы́л Левитэнгиро яго́ро.

¹³ Леви́ты лэ́на пашо раша́нгиро яго́ро (краё) паш дрэ биш тэ пандж тысёнцы дэстэ́ дро длугипэ́н и дэш тысёнцы дэстэ́ дро буґлыпэ́н; саро́ длугипэ́н исын биш тэ пандж тысёнцы, а буґлыпэ́н – дэш тысёнцы дэстэ́.

¹⁴ Кадалэ́ пхувья́кирэ котэрэстыр нашты́ лэ́нгэ тэ бикнэн, нашты́ тэ парувэн, саро́ пэ́рво пхувья́тыр на пириджала кэ явирэ пал-дова́, со дава́ исын свэ́нто Ра́скирэ-Дэвлэ́скиро.

¹⁵ А яви́р пандж тысёнцы, со ячнэ́пэ дро буґлыпэ́н биш тэ пандж тысёнцы дро длугипэ́н – ваш фо́ро, ваш сарэ́нгэ, соб (кай) тэ дживэ́н одо́й, соб (кай) тэ явэ́н фо́ро машкира́л.

¹⁶ Акэ, саво́ явэ́ла форо́скиро барипэ́н: паш-ратитконэ́ рига́ штар тысёнцы тэ панджшэл дэстэ́, и паш-дывэсы́тко риг явэ́ла штар тысёнцы тэ панджшэл, васточно риг – штар тысёнцы панджшэла́, за́падно риг – штар тысёнцы панджшэла́ дэстэ́.

¹⁷ Штэ́ты пашо фо́ро – кэ паш-рати́тко риг дуй шэла́ тэ пандждэша́ кэ васто́ко дуй шэла́ тэ панджшэла́, кэ паш-дывэсы́тко риг дуй шэла́ тэ пандждэша́, кэ за́падно дуй шэла́ тэ пандждэша́ дэстэ́.

¹⁸ Дова́, со ячэ́лапэ длугипнастыр анги́л свэ́нто штэ́то – дэш тысёнцы кэ васто́ко и дэш тысёнцы кэ западо, анги́л свэ́нто штэ́то, дова́, со барьёла пэ дая́ пхув – саро́ дава́ ваш дова́, соб (кай) тэ чалякирэс бутярнэн, кон кэрэ́ла буты́ дро фо́ро.

¹⁹ Сарэ́ Израилёскирэ ро́дыцы сашты́ (могинэ́на) тэ кэрэ́н буты́ дро фо́ро.

²⁰ Саро́ отдыно́ штэ́то дро биш тэ пандж тысёнцы дэстэ́ длугипнаса, буґлыпнаса биш тэ пандж тысёнцы дэстэ́, штарвэнглытко котэ́р, отдэ́н дро свэ́нто котэ́р, кхэтанэ́ форо́скирэ миштыпнаса.

Тхагарискиро Котэ́р

²¹ А саро́, со ячэ́лапэ-тхагарискэ: свэнтонэ́-котэрэскиро рига́тыр, форо́скирэ-миштыпнаскирэ рига́тыр анги́л биш тэ пандж тысёнцы дэстэ́ кэ котэрэскиро васточно ме́жа и пэ западо анги́л биш тэ пандж тысёнцы лашыл за́падно ме́жа пхувья́кири паш ваш тхагарискэ, палдава́ свэ́нто котэ́р пхув и свэ́нто штэ́то явэ́на машки́р лэ́стэ.

²² Нэ одова́, со ячэ́лапэ Левитэ́нгирэ миштыпна́стыр и форо́скирэ миштыпна́стыр машкира́л, явэ́ла адя́кэ-паць ваш тхагарискэ а штэ́то машки́р Юдаскири ме́жа и машки́р Вениаминоскири ме́жа явэ́ла тхагарискирэ миштыпнаса.

²³ А саро́ явирэ родыцэндыр васточнонэ рига́тыр кэ за́падно риг-екх паш Вениаминоскэ.

²⁴ Пашы́л Вениаминоскири ме́жа, васточнонэ рига́тыр кэ за́падно риг екх паш Симёноскэ.

²⁵ Пашы́л Симёноскири ме́жа васточнонэ рига́тыр кэ за́падно риг-екх паш Исахароскэ.

²⁶ Пашы́л Исахороскири ме́жа васточнонэ рига́тыр кэ за́падно риг-екх паш Завулоноскэ.

²⁷ Пашы́л Завулоноскири ме́жа, васточнонэ рига́тыр кэ за́падно риг-екх паш Гадоскэ.

²⁸ А пашы́л Гадоскири ме́жа пэ паш-рати́тко риг джа́ла паш-рати́тко ме́жа Тамаростыр кэ пани́, кай чингардэнапэ пашо Кадисо, ручаёстыр кэ Баро́ Мо́рё (дэрья́в).

²⁹ Акэ, исын пхув, сави́ тумэ́ пир жре́биё роскэдэна Израилёскирэ родыцэнгэ, акэ исын лэ́нгирэ паша́ ракирэ́ла Рай Дэвэ́л, Дэвэ́л.

³⁰ Акэ, исын форитка выгиныбэна: паш-ратитконэ́ рига́тыр исын выгиныбэн штар тысёнцы тэ панджшэла́ дэстэ́.

³¹ Форитко по́рта кхарэлпэ, пир Израилёскирэ родыцэнгирэ лава́: кэ паш-рати́тко риг исын трин по́рты: екх Рувимоскири по́рта, екх Юдаскири по́рта, екх Левиёскири по́рта.

³² Васточнонэ рига́тыр исын выгиныбэн пэ штар тысёнцы пандждэша́ дэстэ́, и трин по́рты: екх Ёзаскири по́рта, екх Вениаминоскири по́рта, екх Даноскири по́рта.

³³ Паш-дывэсытконэ́ рига́тыр исын выгиныбэн пэ штар тысёнцы пандждэша́ дэстэ́ и трин по́рты: екх Симеоноскири по́рта, екх Исахороскири по́рта, екх Завулоноскири по́рта.

³⁴ Морёстыр исын выгиныбэн пэ штар тысёнцы пандждэша́, дэстэ́ ада́й исын трин по́рты: екх Гадоскири по́рта, екх Асироскири по́рта, екх Нефалимоскири по́рта.

³⁵ Саро́ трусця́л (кругом) исын дэшуохто тысёнцы дэстэ́. А форитко лав долэ́ дывэсэ́стыр явэ́ла: “О Рай Дэвэ́л исын одо́й”!