Езэкилё 46 - Библия - Пэ Балтитко Романи чиб (Романэс) 2019

Сыр Трэй тэ Дэн Паты́в Дэвлэ́скэ

¹ Адя́кэ ракирэ́ла Рай Дэвэ́л, Дэвэ́л: “Андратунэ-грэдакири по́рта, сави́ выджа́ла пэ васто́ко, мэк тэ явэ́л закэрды (запхандлы), ке́ли джа́на шов бутитка дывэса́, а дро дывэ́с са́вато (субо́та), дро дывэ́с, ке́ли лыяпэ нэво́ чхон, мэк тэ явэ́л откэрды (отпхандлы).

² О тхага́ри заджа́ла пир портакиро трэ́мо, со выджа́ла яври́, ёв явэ́ла тэрдо́ пашы́л кадалэ́ портытка сты́лбы. Э рашая́ кэрэ́на лэ́скиро цэ́ло схачкирибнытко и лэ́скиро парикирибнытко свэ́нто дыибэ́н. Пашы́л портакиро прого ёв дэ́ла паты́в Ра́скэ-Дэвлэ́скэ и выджа́ла, а по́рта мэк тэ на закэрэн (на запхандэн) бэльвэле́.

³ И адя́кэ-паць народо пхувья́тыр явэ́ла тэ дэл паты́в (тэ клонинэлпэ) анги́л Растэ-Дэвлэ́стэ пашы́л загиибэ́н дрэ по́рта, дрэ са́ваты (суботы), дрэ нэвэ чхона́.

⁴ Акэ, исын схачкирибэ́н, саво́ тхага́ри янэ́ла Ра́скэ-Дэвлэ́скэ дро дывэ́с са́вато: шов бакрорэ бидошакирэ, и екх бидошакиро бакро.

⁵ Маруно́ свэ́нто дыибэ́н банго́ тэ явэ́л эфа пал бакрэстэ, пэ бакрорэстэ явэ́ла дасаво маруно́ свэ́нто дыибэ́н, кицы́ дэ́ла лэ́скиро васт, гино оливи́тко дзэт (елеё) явэ́ла пэ эфа.

⁶ Дро нэвэ чхонытко дывэ́с ёв янэ́ла гурувэнгирэс гуртостыр, бидошакирэ гуруво́рэс; шов бакрорэ, бидошакирэ бакрорэс.

⁷ Ёв янэ́ла маруно́ свэ́нто дыибэ́н екх эфа пэ гуруворэстэ, эфа пэ бакрэстэ, а пэ бакрорэндэ-кицы́ дэ́ла лэ́скиро васт, гино оливи́тко дзэт пэ эфа.

⁸ Ке́ли явэ́ла тхага́ри, ёв исын банго́ тэ и заджа́л пир портакиро трэ́мо, банго́ тэ выджа́л далэ́-паць дромэ́са.

⁹ А ке́ли народо пхувья́тыр явэ́ла пэ свэ́нки анги́л Ра́скирэ-Дэвлэ́скиро муй, одолэ́скэ, кон загия́ пир паш-рати́тко (северно) по́рта, соб (кай) тэ дэл паты́в Дэвлэ́скэ, трэй тэ выджа́л паш-дывэсытконэ́ портаса, а одолэ́скэ, саво́ загия́ пир паш-дывэсы́тко (южно) по́рта, трэй тэ выджа́л паш-ратитконэ́ портаса; нашты́ лэ́скэ тэ выджа́л долэ́-паць портаса, савья́са ёв загия́, ёв исын банго́ тэ выджа́л пир яви́р по́рта.

¹⁰ О тхага́ри исын банго́ тэ явэ́л машки́р лэ́ндэ: ке́ли ёнэ заджа́на, заджа́ла и ёв, ке́ли ёнэ выджа́на, выджа́ла и ёв.

¹¹ Пэ свэ́нки, и дрэ упхэндлэ бахталэ́ дывэса́ маруно́ свэ́нто дыибэ́н лэ́стыр банго́ тэ явэ́л кадасаво́: эфа пал гуруворэстэ, эфа пал бакрэстэ, а пэ бакрорэндэ-кицы́ дэ́ла лэ́скиро васт, и оливи́тко дзэт пиро́ гино пэ эфа.

¹² А ке́ли тхага́ри пэ́скирэ илэ́стыр закамэ́ла тэ янэл цэ́ло схачкирибнытко ци парикирибнытко свэ́нто дыибэ́н (жэ́ртва) Ра́скэ-Дэвлэ́скэ, стрэгарья (стражники) исын бангэ́ тэ откэрэн (тэ псиравэн) лэ́скэ по́рта, сави́ выджа́ла пэ васто́ко, и ёв кэрэ́ла пэ́скиро цэ́ло схачкирибэ́н, пэ́скиро парикирибнытко свэ́нто дыибэ́н адя́кэ, сыр кэрдэ́ дрэ са́ваты, а тэ́ньчи ёв выджа́ла, и ке́ли выджа́ла, то по́рта закэрлапэ (запхандэлапэ).

¹³ Кажно дывэ́с янэ́н (тумэ́ рашая́) Ра́скэ-Дэвлэ́скэ сыр цэ́ло схачкирибнытко свэ́нто дыибэ́н екхэ-бэршэскирэ – бидошакирэ бакрорэс, янэ́н лэс кажно зло́ко (ра́нко).

¹⁴ А марунэ яныбнастыр причхувэ́н кэ ёв кажно зло́ко шо́вто ме́ра эфатыр оливи́тко дзэт три́то ме́ра гиностыр, соб (кай) тэ явэ́л дава́ кхэтанэ́ яржэса; кадасаво́ исын ве́чно припхэныбэ́н пал маруно́ яныбэ́н Ра́скэ-Дэвлэ́скэ пэ сарэ́ бэрша́.

¹⁵ Адя́кэ мэк тэ янэ́н дро цэ́ло схачкирибнытко бакрорэс, маруно́ яныбэ́н и оливи́тко дзэт кажно зло́ко (ра́нко) саро́ часо.”

¹⁶ Адя́кэ ракирэ́ла Рай Дэвэ́л, Дэвэ́л: “Ке́ли о тхага́ри дэ́ла да́ро вари-конэ́скэ пэ́скирэ чхаворэндыр, дава́ явэ́ла ваш мэкно́ миштыпэ́н лэ́скирэ чхаворэнгэ (биятэнгэ), дава́ явэ́ла лэ́нгиро мэкно́ миштыпэ́н.

¹⁷ Ке́ли ж ёв дэ́ла пэ́скирэ миштыпна́стыр да́ро вари-конэ́скэ пэ́скирэ писхарьендыр, то дава́ да́ро явэ́ла писхарискиро, а ке́ли явэ́ла во́льно бэрш, то да́ро рисёла палэ кэ тхага́ри. Фэ́ни (то́ка) палэ кэ лэ́скирэ чхавэ́ банго́ исын тэ пириджал лэ́скиро мэкно́ миштыпэ́н.

¹⁸ Нашты́, соб (кай) тэ лэл тхага́ри народоскирэ-мэкнэ́ миштыпна́стыр, ко́ли ёв отлэла лэ́ндыр; ёв исын банго́ тэ дэл пэ́скирэ мэкнэ́ миштыпна́стыр пэ́скирэ чхаворэнгэ (биятэнгэ), соб (кай) нико́н мирэ́ народо́стыр тэ на явэ́л вытрадыно пэ́скирэ миштыпна́стыр.”

¹⁹ Тэ́ньци лыджия́ ёв ман загиибнаса, саво́ сыс пашы́л по́рта, кэ свэ́нта шту́бы ваш рашангэ, савэ́ выджа́нас пэ паш-рати́тко (северно) риг, акэ, одо́й исын екх штэ́то, саво́ выджа́ла пэ за́падно яго́ро (краё).

²⁰ И пхэндя́ ма́нгэ: “Адава́ исын штэ́то, кай рашая́ исын бангэ́ тэ кэравэн свэ́нто дыибэ́н (жэ́ртва) пал чорипэ́н, и свэ́нто дыибэ́н пал грэ́хо, и кай исын бангэ́ тэ пэкэн маруно́ свэ́нто дыибэ́н и нашты́ тэ янэс лэс пэ грэ́да (дво́ро), сави́ сыс яври́, ваш дова́, соб (кай) народо тэ явэ́л свэ́нто.”

²¹ И вылыджия́ ёв ман пэ грэ́да, сави́ сыс яври́, пролыджия ман пир штар грэдытка вэ́нглы, акэ, дро кажно грэдытко вэнгло сыс ишчо (инкэ́) пир екх грэ́да.

²² Дрэ сарэ́ штар грэдытка вэ́нглы сыс зачхакирдэ грэды, длугипэ́н лэ́нгиро сыс штардэша́ куня́, а буґлыпэ́н триндэша, екх барипэ́н (ме́ра) ваш сарэ́ штар вэ́нглы.

²³ Трусця́л (кругом) лэ́ндэ сарэ́ндэ – ва́нты, а пашы́л ва́нты, кэрдэ́ трусця́л кэраибнытка штэ́ты (очаги).

²⁴ И пхэндя́ ёв ма́нгэ: “Акэ исын кэраибнытка шту́бы, кай Кхангирья́кирэ (Храмоскирэ) дына́рья кэравэна свэ́нта дыибэна́ (жэртвы) народо́стыр.”