Езэкилё 42 - Библия - Пэ Балтитко Романи чиб (Романэс) 2019

Раша́нгирэ Шту́бы

¹ Тэ́ньци вылыджия́ ёв, адава́-паць ману́ш, ман пэ грэ́да, сави́ сыс яври́ паш-ратитконэ́ дромэ́стыр, яндя́ ман кэ шту́бы, савэ́ сыс анги́л форуны́ (пло́шча), анги́л кхэр Кхангирья́киро пэ паш-рати́тко (северно) риг.

² Кэ дова́ штэ́то, саво́ пашо паш-рати́тко вуда́р сыс дро длугипэ́н шэл куня́, а дро буглыпэн – пандждэша́ куня́.

³ Анги́л андратуны́ грэ́да (дво́ро), сави́ сыс биш куня́, анги́л гэристо (помосто) сыс кэрдэ́ барэстыр, саво́ сыс пэ одоя грэ́да, сави́ выджа́лас яври́, сыс трэ́мо анги́л трэ́мо дрэ трин этажы.

⁴ Анги́л шту́бы сыс загиибэ́н, лэ́скиро буґлыпэ́н сыс дэш куня́, а андрэ́ – дрэ екх кунь; лэ́нгирэ вудара́ выджа́нас пэ паш-рати́тко риг.

⁵ Упралатунэ шту́бы на сыс дасавэ́ буґлэ, сыр тэлатунэ́ и машкиратунэ, пал-дова́, со одо́й сыс трэмы.

⁶ Ёнэ сыс кэрдэ́ дрэ трин этажы, нэ дасавэ́-паць сты́лбы, савэ́ сыс пэ грэ́да, лэ́ндэ нанэ; пал-дова́ со ёнэ на сыс дасавэ́ буґлэ, сыр тэлатунэ́ и машкиратунэ шту́бы.

⁷ Ва́нта анги́л кадалэ́ шту́бы явритунэ грэдатыр (дворостыр), сави́ сыс яври́, сыс дро буґлыпэ́н пандждэша́ куня́.

⁸ Пал-дова́, со штубэнгиро длугипэ́н, савэ́ сыс пэ грэ́да, со выджа́нас яври́, сыс пандждэша́ куня́; акэ, анги́л Кхангири́ сыс шэл куня́.

⁹ Тэлэ́ сыс загиибэ́н андрэ́ далэ́ шту́бы васточнонэ рига́тыр, ко́ли тэ подджан кэ ёнэ грэдатыр, сави́ сыс яври́.

¹⁰ Кэ вантакиро буглыпэн, сави́ сыс пэ грэ́да, кэ васто́ко анги́л га́са, анги́л кхэр сыс шту́бы.

¹¹ Дроморо анги́л лэ́ндэ сыс дасаво сыр пашы́л кодолэ́ шту́бы, савэ́ выджа́нас пэ паш-рати́тко риг, дасаво длугипэ́н сыр лэ́ндэ, дасаво буґлыпэ́н, сарэ́ лэ́нгирэ выгиибэна, саро́ лэ́нгиро укэдыибэн, лэ́нгирэ вудара́ сыс дасавэ́, сыр лэ́ндэ.

¹² Кадасавэ́ вудара́ сыс сыр дрэ шту́бы, савэ́ выджа́нас пэ паш-дывэсы́тко (южно) риг, ваш дова́, соб (кай) тэ заджас дрэ лэ́ндэ, сыс вуда́р пашы́л дром, саво́ джа́лас пир ва́нта пэ васто́ко.

¹³ И пхэндя́ ёв ма́нгэ: “Шту́бы пэ паш-рати́тко (северно) и пэ паш-дывэсы́тко (южно) рига́, савэ́ сыс анги́л англатуно́ штэ́то, исын свэ́нта шту́бы, кай рашая́ исын, савэ́ явэ́на кэ Рай Дэвэ́л, Дэвэ́л, и кай ёнэ ханас свэ́нта дыибэна́ (жэртвы), одо́й ёнэ чхувэ́на свэ́нта дыибэна́, и янэ́на маруно́ свэ́нто дыибэ́н, и дыибэ́н пало́ грэ́хо, и дыибэ́н пал чорипэ́н, пал-дова́ со кадава́ исын свэ́нто штэ́то.

¹⁴ Ко́ли заджа́на одори́к рашая́, лэ́нгэ трэиндя́ тэ ячавэн (ячкирэн) одо́й пэ́скиро урибэ́н, дро саво́ ёнэ дынаринэ́нас (служынэ́нас), а тэ́ньчи (позжэ) тэ выджа́н далэ́-свэнтонэ́ штэто́стыр пэ грэ́да (дво́ро), со сыс яври́; пал-дова́, со кадава́ урибэ́н исын свэ́нто, лэ́нгэ трэиндя́ тэ урьен яви́р урибэ́н, а тэ́ньчи тэ выджа́н кэ мануша́.

¹⁵ Ко́ли ёв выгиндя́ андратуны́ Кхангири́, ёв вылыджия́ ман пир по́рта, сави́ выджа́лас пэ васто́ко, и ёв лыя́ тэ выгинэл ла трусця́л (кругом).

¹⁶ Ёв выгиндя́ васточно риг мериндытконэ дэстэса, и выгиндя́ ёв дэстэса пандж шэла́ дэстэ́.

¹⁷ Пэ паш-рати́тко (северно) риг выгиндя́ ёв далэ́ мериндытконэ дэстэса панджшэла́ дэстэ́.

¹⁸ Дрэ паш-дывэсы́тко риг выгиндя́ ёв мериндытконэ дэстэса панджшэла́ дэстэ́.

¹⁹ Порисия ёв кэ за́падно риг и выгиндя́ мериндытконэ дэстэса панджшэла́ дэстэ́.

²⁰ Сарэ́ штарэ́ ригэ́ндыр вымериндя ла; трусця́л (кругом) сыс ва́нта, ла́киро длугипэ́н – панджшэла́ дэстэ́, ла́киро буґлыпэ́н, – сыс пандж шэла́ дэстэ́, соб (кай) тэ на явэ́л свэ́нто штэ́то кхэтанэ́ насвэнтонэ штэтоса.