Езэкилё 41 - Библия - Пэ Балтитко Романи чиб (Романэс) 2019

Барипэ́н Свэнтонэ́-Штэтоскиро

¹ Тэ́ньци лыджия́ ёв ман дрэ Кхангири́ и выгиндя́ пир сты́лбы шов куня́ буґлыпэ́н екхэ рига́тыр и шов куня́ буґлыпэ́н явирэ рига́тыр – дава́ сыс скиниякиро (шатракиро) буґлыпэ́н.

² Дрэ вудара́ сыс дэш куня́ буґлыпэ́н, пир вударитка рига́ сыс пандж куня́ екхэ рига́тыр и пандж куня́ явирэ рига́тыр; выгиндя́ длугипэ́н дрэ Кхангири́ – штардэша́ куня́, а буґлыпэ́н биш куня́.

³ Загия́ ёв андрэ́, выгиндя́ пир сты́лбы пашы́л вуда́р дуй куня́, и дро вуда́р шов куня́, а вударитко буґлыпэ́н – сыс эфта́ куня́.

⁴ Выгиндя́ дрэ лэ́стэ биш куня́ дро длугипэ́н и биш куня́ дро свэнтонэ́-штэтоскиро буґлыпэ́н, и пхэндя́ ма́нгэ: “Дава́ исын Свэ́нто-свэнтонэстыр штэ́то”

⁵ Выгиндя́ ёв дрэ Кхангирья́кири ва́нта шов куня́, а буґлыпэ́н дрэ шту́бы, савэ́ сыс пашылэды́р, трусця́л Кхангири́, пир штар куня́.

⁶ Сыс трия́нда тэ трин шту́бы (коморы) пэ рига́, шту́ба пашы́л шту́ба; ёнэ заджа́на дрэ ва́нта, сави́ сыс пашы́л Кхангири́ ваш шту́бы, трусця́л адя́кэ, со ёнэ сыс кхэтанэ́ кадалэ́ вантаса, нэ дрэ кхангирья́кири ва́нта ёнэ на заджанас.

⁷ Нэ Кхангири́ буты́р и буты́р буґлёлас трусця́л и упра́л штубэнца, савэ́ сыс пир рига́, дрэ Кхангири́ крэнглыпэн буґлёлас упрэ́, тэлатунэ́ этажостыр шту́бы ґаздэнаспэ дро упралатуно пир машкиратуно этажо.

⁸ И мэ дыкхцём Кхангирья́кирэ упралыпэ́н пир саро́ крэнглыпэн (окружность), шту́бы, савэ́ сыс пир рига́ пэ пхув, сыс пхэрдо́ дэсто́, шов пхэрдэ́ куня́.

⁹ Вантытко буґлыпэ́н дрэ шту́бы, савэ́ сыс пир рига́ и выджа́нас яври́, сыс пандж куня́ сыс откэрдо штэ́то, пашы́л шту́бы пир рига́ дрэ Кхангири́.

¹⁰ Дурипэн машки́р шту́бы сыс биш куня́, трусця́л сари́ Кхангири́.

¹¹ Вудара́ дрэ шту́бы, савэ́ сыс пир рига́, выджа́нас пэ откэрдо штэ́то: екх вуда́р – пэ паш-рати́тко, а яви́р вуда́р – пэ паш-дывэсы́тко риг; кадалэ́ откэрдэ-штэтоскиро буґлыпэ́н сыс пандж куня́ трусця́л.

¹² Кхангиритко буглыпэн анги́л форуны́ (пло́шча) пэ за́падно риг сыс эфтадэша́ куня́; сари́ дая́ Кхангиритко ва́нта сыс дрэ пандж куня́ буґлыпнаса, а ла́киро длугипэ́н сыс енядэша куня́.

¹³ Ёв выгиндя́ дрэ Кхангири́ шэл куня́ длугипэ́н – дро дова́ англатуно́ штэ́то, дро дова́ кхэр, со сыс прикэрдо, дрэ лэ́скирэ ва́нты сыс шэл куня́ длугипэ́н.

¹⁴ Кхангиритко буґлыпэ́н пир одоя риг, сави́ исын дыкхны, лыджа́ла кэ явритуны грэ́да, сави́ выджа́лас пэ васто́ко, сыс шэл куня́.

¹⁵ Дро саро́ Кхангирьякиро длугипэ́н анги́л форуны́ (пло́шча) пэ лэ́скири палатуны риг, штубэнца, савэ́ сыс пир рига́, екхэ и явирэ рига́тыр ёв выгиндя́ шэл куня́ кхэтанэ́ долэса, со сыс андра́л Кхангири́ и трэмэнца, савэ́ сыс дрэ грэ́да (дво́ро).

¹⁶ Вударэнгирэ сты́лбы, фэнштры ришоткэнца (кратэнца), шту́бы савэ́ сыс пир рига́ трусця́л, дрэ сарэ́ трин этажы анги́л проги сыс обчхудэ каштэса, пэтостыр (полостыр) кэ фэнштры; фэнштры сыс закэрдэ.

¹⁷ Вударитконэ упралыпнастыр, сыр андра́л Кхангири́, адя́кэ-паць и яври́, пир сари́ ва́нта трусця́л, андрэ́ и яври́ сыс вычхиндлэ́ формы каштэ́стыр.

¹⁸ Сыс кэрдэ́ херувимы и пальмы: пальма машки́р дуй херувимы; дро кажно херувимо сыс дуй муя́.

¹⁹ Екхэ рига́тыр дыкхэ́лас пэ пальма манушэ́скиро муй, а явирэ рига́тыр – шчэроскиро (левоскиро) муй, адя́кэ сыс кэрдо́ дрэ сари́ Кхангири́ трусця́л.

²⁰ Пэтостыр (полостыр) кэ вударитко упралыпэ́н сыс вычхиндлэ́ херувимы и пальмы, адя́кэ сыс и пир Кхангирья́кири ва́нта.

²¹ Дрэ Кхангири́ сыс штар вэнглытка вударэнгирэ сты́лбы, свэ́нто штэ́то выдыкхэлас адя́кэ, сыр мэ лэс дыкхцём.

²² Алта́рё сыс каштуно, лэ́скиро вучипэ́н – трин куня́, длугипэ́н – дуй куня́, лэ́скирэ вэ́нглы, дова́ пэ со ёв сыс тэрдо́; лэ́скирэ ва́нты – каштэ́стыр. И пхэндя́ ману́ш ма́нгэ: “Кадава́ исын сками́нд, саво́ сыс тэрдо́ анги́л Растэ-Дэвлэ́стэ.”

²³ Дрэ Кхангири́ и дро свэ́нто штэ́то сыс пир дуй вудара́.

²⁴ Дрэ далэ́ вудара́ сыс пир дуй пхаля пэ завесы (зачхудэ), далэ́ пхаля ґаздэнаспэ; дуй пхаля сыс пашо екх вуда́р, дуй пхаля сыс пашо яви́р вуда́р.

²⁵ Пэ лэ́ндэ, пэ Кхангирья́кирэ вудара́, сыс вычхиндлэ́ херувимы и пальмы, дасавэ́-паць, сыр пэ ва́нты, а анги́л трэ́мо яври́ сыс каштуно ґеристо (помосто).

²⁶ Фэнштры пальмэнца екхэ и явирэ рига́тыр сыс пашы́л трэ́мо и дрэ Кхангирья́кирэ шту́бы, савэ́ сыс пир рига́, пэ кашт, савэ́са сыс одо́й обчхудо.