Езэкилё 36 - Библия - Пэ Балтитко Романи чиб (Романэс) 2019

Дэвлэ́скиро Бахтякирибэ́н Исын Пэ Израилё

¹ “Ту, манушэ́скиро чхава, пхэн пир лав ангилпхэныбэ́н, пэ Израилёскирэ бэ́рги, пхэн: ‘Бэ́рги Израилёскирэ! Шунэ́н Ра́скирэ-Дэвлэ́скиро лав.

² Адя́кэ ракирэ́ла Рай Дэвэ́л, Дэвэ́л: “Ко́ли вэ́рго ракирэ́ла пал тумэ́ндэ: А! а! аґ гаратунэ вучэ́ штэ́ты дорэснэпэ амэ́нгэ.”

³ Пхэн пир лав ангилпхэныбэ́н, пхэн: “Адя́кэ ракирэ́ла Рай Дэвэ́л, Дэвэ́л: “Пал дова́, со ёнэ чхучакирэна тумэн, хан сарэ́ ригэ́ндыр, соб (кай) тэ отджан тумэ́ кэ яви́р народы, соб (кай) кошэнас и сэндякирэнас тумэн мануша́, –

⁴ пал дава́, Израилёскирэ бэ́рги, пошунэн Ра́скирэ-Дэвлэ́скиро лав: Адя́кэ ракирэ́ла Рай Дэвэ́л, Дэвэ́л пэ бэ́рги и бэ́ргицы, пэ долы, пэ роспхагирдэ́ и чхучэ́ кхэра́, пэ ячадэ фо́рья, савэ́ залынэ, и савэ́ндыр санпэ нароы, со дживэ́на пашы́л дая́ пхув.

⁵ Палдава́ адя́кэ ракирэ́ла Рай Дэвэ́л, Дэвэ́л: “Дрэ Мири́ зэвлыныпнаскири яг Мэ пхэндём лав пэ яви́р народы, пэ сари́ Идумея, пэ народы, савэ́ думинэнас тэ залэн Мири́ пхув пэ́скэ; илэ́скирэ радыма́са и налачхэ́ дыкхибнаса дро ди камэнас тэ залэн ла пэ́скэ.”

⁶ Пал дава́ пхэн пир лав ангилпхэныбэ́н пал Израилёскири бэ́рга, пхэн пэ бэ́рги, бэ́ргицы, фэ́лды и долы: “Адя́кэ ракирэ́ла Рай Дэвэ́л, Дэвэ́л: А́кэ, Мэ пхэндём дава́ дро Миро зэвлыныпэ́н, дрэ Мири́ холы́, пал-дова́, со санпэ тумэ́ндыр народы.”

⁷ Палдава́ адя́кэ ракирэ́ла Рай-Дэвэ́л: “Мэ ґаздыём Миро васт, совлахавас, со народы, савэ́ исын пашы́л тумэ́ндэ, кокорэ́ лыджа́на пэ́скири ладж.

⁸ А тумэ́, Израилёскири бэ́рга, розмэкэн тумарэ́ вэ́тки, и тумэ́ явэ́на тэ янэ́н тумарэ́ барьякирдэ́ (пло́ды) ваш Миро народо, Израилё, ёнэ сы́гэс явэ́на.

⁹ Акэ, Мэ рисёва́ва кэ тумэ́; пэ тумэ́ндэ явэ́на тэ барьякирэ́н, пэ тумэ́ндэ явэ́на тэ сеинэн.

¹⁰ И Мэ бичхава́ва, соб (кай) тэ дживэ́л тумэ́ндэ бут мануша́, саро́ Израилёскиро кхэр, саро́, и явэ́на тэ дживэ́н дрэ фо́рья, и газдэна роспхагирдэ́ кхэра́.

¹¹ И Мэ кэра́ва адя́кэ, со явэ́на бут мануша́, и мурдала́ кэ тумэ́; лэ́ндэ явэ́ла бут тыкнорэ; Мэ бичхава́ва тумэн одори́к, сыр сыс дава́ дро тумаро́ ґаратуно часо: Мэ ява́ва тэ кэра́в тумэ́нгэ лачхипэ́н буты́р, сыр дро тумаро́ ґаратунэ́ дывэса́, и тумэ́ ґалёна, со Мэ сом Рай Дэвэ́л, Дэвэ́л.

¹² Мэ яна́ва пэ тумэ́ндэ манушэ́н, Миро народо, Израилё, ёнэ залэна тут, пхув ту ячэса лэ́нгиро мэкно́ миштыпэ́н, ту бутэды́р на явэ́са тэ кэрэ́с лэ́ндыр бичхаворэнгирэ манушэ́н.”

¹³ Адя́кэ ракирэ́ла Рай Дэвэ́л, Дэвэ́л: “Пал-дова́, со ракирэ́на пал тумэ́ндэ: ‘Ту сан пхув, сави́ ха́ла манушэ́н, сави́ на дэ́ла чхаворэ́н пэ́скирэ народоскэ?’”

¹⁴ Пал дова́, ту на явэ́са тэ хас манушэ́н, ту на явэ́са тэ кэрэ́с, соб (кай) тэ явэ́л Тыро́ народо бичхаворэнгиро:

¹⁵ и ту на явэ́са тэ шунэ́с бутэды́р, сыр санпэ ту́тыр народы; кошыбэ́н манушэ́нгирэ родо́стыр Ту на вырикирэса; ту на явэ́са тэ кэрэ́с бутэды́р, соб (кай) тэ явэ́л тыро́ народо бичхаворэнгиро”, – ракирэ́ла Рай Дэвэ́л, Дэвэ́л.

Пал Израилёскиро Жужакирибэн

¹⁶ И сыс кэ мэ Ра́скирэ-Дэвлэ́скиро лав дасаво:

¹⁷ “Манушэ́скиро чхава! Ко́ли Израилёскиро кхэр дживэлас пэ пэ́скири пхув, ёв магирэлас ла пэ́скирэ джиибнаса, пэ́скирэ рэндонэнца; лэ́нгиро дром анги́л Миро муй сыс сы́рбы бы джувля́киро нажужыпэн, дро часо, ко́ли ёй жужакирэлпэ.

¹⁸ Мэ вычхудём Мири́ холы́ пэ лэ́ндэ пало́ рат, саво́ чхувэласпэ лэ́нца пэ кадая́ пхув, пал дова́, со ёнэ магирэнас пхув пэ́скирэ идолэнца.

¹⁹ Мэ рострадыём лэн пир народы, ёнэ исын роспхурдынэ пир пхувья́; Мэ сэндякиравас лэн пир лэ́нгирэ дрома́ и лэ́нгирэ рэ́нды (де́лы).

²⁰ И явнэ́ ёнэ кэ народы, гинэ́ кэ Наюды́тка на́цыи (народы) и залынэ сла́ва Мирэ́ свэнтонэ́ лавэ́стыр, пал дова́, со пал лэ́ндэ ракирэ́на: ‘Ёнэ исын Ра́скирэ-Дэвлэ́скиро народо, ёнэ выгинэ́ Лэ́скирэ пхувья́тыр.’

²¹ И потангиндём (пожалиндём) Мэ Миро свэ́нто лав, савэ́стыр отлыя сла́ва Израилёскиро кхэр Наюдытконэ́ нацые́ндыр (народонэндыр), карик ёнэ явнэ́.

²² Палдава́ пхэн Израилёскирэ кхэрэ́скэ: “Адя́кэ ракирэ́ла Рай Дэвэ́л, Дэвэ́л: ‘На ваш тумэ́нгэ Мэ кэра́ва дава́, Израилёскиро кхэр, а ваш Миро свэ́нто лав. Лэ́стыр тумэ́ отлынэ сла́ва машки́р народы, карик явнэ́ тумэ́.

²³ Мэ свэнцякирава Миро баро́ Лав, савэ́стэ нанэ сла́ва машки́р Наюдэ́ндэ. Машкир яви́р народы тумэ́ отлынэ сла́ва Лэ́стыр и ґалёна народы, со Мэ сом Рай Дэвэ́л, Дэвэ́л, – ракирэ́ла Рай Дэвэ́л, Дэвэ́л, ко́ли Мэ сыкава́ва, со Мэ сом свэ́нто, пэ тумэ́ндэ, анги́л лэ́нгирэ якха́.

²⁴ Мэ ла́ва тумэн Наюдытконэ́ нацые́ндыр (народэндыр), кэдава тумэн сарэ́ ригэ́ндыр, Мэ яна́ва тумэн пэ тумари́ пхув.

²⁵ И Мэ брызгинава тумэн жужэ́ пане́са, тумэ́ жужакирэнапэ сарэ́ тумарэ́ магирипнастыр, Мэ жужакирава тумэн сарэ́ тумарэ́ идолэндыр.

²⁶ Мэ да́ва тумэ́нгэ нэво́ ило́; нэво́ ди Мэ да́ва тумэ́нгэ; Мэ ла́ва тумарэ́ лочатыр (плотятыр) баруно ило́, и Мэ да́ва тумэ́нгэ джидо́ ило́.

²⁷ И Мэ чхува́ва дро тумэ́ндэ Миро ду́хо (фа́но), Мэ кэдава дова́, со тумэ́ явэ́на тэ псирэ́н пир Мирэ́ припхэныбэна́; тумэ́ явэ́на тэ кэрэ́н пир Мирэ́ лава́.

²⁸ И явэ́на тумэ́ тэ дживэ́н пэ пхув, сави́ Мэ дыём тумэ́нгэ, и тумэ́ явэ́на Миро народо, а Мэ ява́ва тумаро́ Дэвэ́л.

²⁹ И выракхава Мэ тумэн сарэ́ тумарэ́ налачхипнастыр, Мэ прикхарава маро́, и убарьякирава маро́, Мэ на дава́, соб (кай) тумэ́ тэ мэрэ́н бокха́тыр.

³⁰ Мэ выбарьякирава барьякирдэ́ (пло́ды) пэ кашта́ и барьякирибэн пэ фэ́лды, соб (кай) тэ на мэрэ́н бокха́тыр, соб (кай) тэ на кошэн тумэн народы.

³¹ Тэ́ньци пририпирэна тумэ́ пал захалэ тумарэ́ дрома́, пал налачхэ́ тумарэ́ рэ́нды, и явэ́ла джунгало́ (брытко) дро тумаро́ ило́ пал чорипэ́н и биладжакунэ́ рэ́нды, савэ́ тумэ́ кэрэ́нас.

³² ‘На ваш тумэ́нгэ Мэ кэра́ва дава́,’ – ракирэ́ла Рай Дэвэ́л, Дэвэ́л. – “Мэк тэ лолёл тумаро́ муй, мэк тэ ладжан тумэ́ тумарэ́ дромэндыр, Израилёскиро кхэр.”

³³ Адя́кэ ракирэ́ла Рай Дэвэ́л, Дэвэ́л: ‘Дро дова́ дывэ́с, ко́ли Мэ жужакирава тумэн сарэ́ тумарэ́ чорипна́стыр, Мэ бичхава́ва манушэ́н дрэ фо́рья, соб (кай) тэ дживэ́н одо́й, ко́ли ґаздэ́на роспхагирдэ́ кхэра́.

³⁴ И явэ́на тэ барьякирэ́н пэ пхув, сави́ сыс чхучи́, и кажно, кон одо́й джа́лас, дыкхэ́лас, со ёй сыс чхучи́.

³⁵ Тэ́ньци пхэнэ́на: “Кадая́ чхучи́ пхув кэрдя́пэ сыр Эдэмоскири у́нта (садо); со и дрэ кадалэ́ роспхагирдэ́, чхучэ́, обчордэ фо́рья дживэ́на мануша́?”

³⁶ И ґалёна Наюды́тка на́цыи (народы), савэ́ дживэ́на пашы́л тумэ́ндэ, со Мэ, Рай Дэвэ́л, ґазда́ва роспхагирдо, Мэ барьякирава пэ чхучо́ штэ́то, Мэ, Рай Дэвэ́л, пхэндём и кэрдём.

³⁷ Адя́кэ ракирэ́ла Рай Дэвэ́л: “Акэ, ишчо (инкэ́) Мэ сыкава́ва Миро камлыпэн кэ Израилёскиро кхэр дрэ дова́, со кэра́ва адя́кэ, соб (кай) тэ явэ́л адя́кэ бут манушэ́н сыр пэ бакрэнгири стада.

³⁸ Сыр бут исын дыибнытка бакрэ́ дро Ерусалимо, пэ свэ́нки, адя́кэ явэ́ла пхэрдо́ манушэ́нца дрэ чхучэ́ фо́рья, и ёнэ ґалёна, со Мэ сом Рай Дэвэ́л, Дэвэ́л.”