Езэкилё 35 - Библия - Пэ Балтитко Романи чиб (Романэс) 2019

Ангилпхэныбэ́н Пал Бэ́рга Сеиро

¹ И сыс кэ мэ Ра́скирэ-Дэвлэ́скиро лав дасаво:

² “Манушэ́скиро чхава! Рисёв Тырэ́ мо́са кэ бэ́рга Сеиро, пхэн пэ ла́тэ ангилпхэныбэ́н.

³ Пхэн ла́кэ: ‘Адя́кэ ракирэ́ла Рай Дэвэ́л, Дэвэ́л: Акэ, Мэ выджава пэ ту́тэ, бэ́рга Сеиро, Мэ протырдава пэ ту́тэ Миро васт, Мэ кэра́ва тут чхучэ́ штэтоса, кай нико́н на дживэ́ла.

⁴ Мэ роспхагирава Тырэ́ фо́рья; ту кокори явэ́са чхучи́ и ґалёса, со Мэ сом Рай Дэвэ́л, Дэвэ́л.

⁵ Пал-дова́, со ту на пириячэса тэ холясос, ту отдэсас Израилёскирэ чхавэ́н дрэ вэргэ́нгирэ васта́, ко́ли явдя́ пэ лэ́ндэ дасави́ биба́хт, ко́ли явдя́ лэ́нгиро хасибэ́н.

⁶ Пал дава́ – ‘Тэ джива́в Мэ’, – ракирэ́ла Рай Дэвэ́л, Дэвэ́л, Мэ кэра́ва тут ратэ́са, рат явэ́ла тэ традэлпэ пал ту́тэ; ту нашты́ тэ дыкхэ́с, ко́ли чхувэласпэ рат, палдава́ рат и традэлапэ пал ту́тэ.

⁷ Мэ кэра́ва бэ́рга Сеиро чхучи́, биманушэнгиро маляса (степьяса), хасякира́ва пэ ла́тэ кажнонэс, кон тэ на проджалас, кон тэ на рисёлас.

⁸ Пхэрдякирава Мэ ла́кирэ вучэ́ штэ́ты домардэ́ манушэ́нца; пэ тырэ́ бэ́ргицы, пэ Тырэ́ долы, пэ сарэ́ Тырэ́ хор штэ́ты явэ́на тэ пэрэ́н домардэ́ куртала́са.

⁹ Мэ кэра́ва ту́тыр чхучи́ пхув, пэ сарэ́ бэрша́, со на явэ́на тэ дживэ́н дрэ Тырэ́ фо́рья, и ґалёна, со Мэ сом Рай Дэвэ́л, Дэвэ́л.

¹⁰ Пал-дова́, со ту ракирэсас: Кадалэ́ дуй народы, кадалэ́ дуй пхувья́ явэ́на Мирэ́, амэ заласа лэн, на подыкхаса, со Рай Дэвэ́л, Дэвэ́л сыс одо́й, –

¹¹ Пал дова́ – ‘Тэ джива́в Мэ’ – ракирэ́ла Рай Дэвэ́л, Дэвэ́л, – Мэ кэра́ва ту́са пир тыри́ холы́ кэ ёнэ, пир тыро́ зэвлыныпэ́н, саво́ ту сыкавэсас, пал-дова́ со холясосас пэ лэ́ндэ; Мэ сыкава́ва Пэс лэ́нгэ, ко́ли Мэ ява́ва пхарэ́с тэ сэндякирав тут.

¹² И ґалёса, со Мэ, Рай Дэвэ́л, Дэвэ́л, шундём сарэ́ тырэ́ налачхэ́ лава́, савэ́ ту ракирэсас пэ бэ́рги Израилёскирэ, ко́ли пхэнэсас: “Чхучэ́ (пуста) какана́! Отдынэ́, соб (кай) амэ тэ хас лэн!”

¹³ Тумэ́ шарэнаспэ анги́л Ма́ндэ тумарэ́ чиба́са (чибьяса), бут ракирэ́нас пэ Ма́ндэ: Мэ шунавас дава́.

¹⁴ Адя́кэ ракирэ́ла Рай Дэвэ́л, Дэвэ́л: “Ко́ли сари́ пхув явэ́ла тэ радынэ́лпэ, Мэ кэра́ва ту́тыр чхучи́ пхув.

¹⁵ Сыр ту радынэсаспэ, со чхучи́ яця́ Израилёскирэ-кхэрэ́скири пхув, адя́кэ и Мэ кэра́ва ту́са: ту явэ́са чхучи́, бэ́рга Сеиро, кхэтанэ́ сарэ́ Идумеяса, и сарэ́ ґалёна, со Мэ сом Рай Дэвэ́л, Дэвэ́л.’”