Езэкилё 32 - Библия - Пэ Балтитко Романи чиб (Романэс) 2019

Лав Пал Египто́скиро Хасибэ́н

¹ Дро дэшуявир бэрш, дро дэшуявир чхон, пэ пэ́рво чхонытко дывэ́с сыс кэ мэ Ра́скирэ-Дэвлэ́скиро лав дасаво:

² “Манушэ́скиро чхава! Ров пал фараоностэ, Египто́скирэ крали́стэ, пхэн лэ́скэ: ‘Ту сан сыр тэрно́ шчэр (ле́во) машки́р народы, сыр дарано мурда́л (зверё) дро мо́рё (дэрья́в), ту чхурдэсапэ дрэ тырэ́ рэ́ки (лэня́), ґаздэса пани́ тырэ́ ґэрэ́нца.”

³ Адя́кэ ракирэ́ла Рай Дэвэ́л, Дэвэ́л: “Мэ зачхурдава пэ ту́тэ Мири́ кхуды́ (сеть) дрэ бутэ́-народонэнгиро скэдыибэ́н, ёнэ вытырдэна тут ла́са.

⁴ И вычхурдава Мэ тут пэ пхув, чхурдава Мэ тут пэ откэрды фэ́лда, и явэ́на тэ бэшэ́н пэ ту́тэ ра́зна болыбны́тка чирикля́, явэ́на тэ хан тут рискирбнаскирэ мурдала́ (звери) сарэ́ пхувья́тыр.

⁵ И росчхурдава Мэ тыро́ мас пир бэ́рги, и долы, и пхэрдякирава Мэ тырэ́ долы трупэнца.

⁶ Пхувьякэ, кай ту плавинэсас (дэсас плима), Мэ да́ва, соб (кай) тэ пьел Тыро́ рат кэ /жы́ко ла́кирэ бэ́рги, сарэ́ ровы одо́й явэ́на пхэрдэ́ ту́са.

⁷ Ко́ли ту мурдёса, Мэ закэрава болыбэ́н, Мэ мурдякирава лэ́нгирэ чэргэня́, Мэ закэрава кхам облокоса, чхон на явэ́ла тэ хачол.

⁸ Сарэ́ дуда (светилы), со хачона пэ болыбэ́н, Мэ мурдякирава, Мэ яна́ва рат пэ тыри́ пхув,’ – ракирэ́ла Рай Дэвэ́л, Дэвэ́л

⁹ Зачилавава Мэ ило́ бутэ́-народонэнгиро, ко́ли роспхэнава пал тыро́ пэрибэн машки́р народы, пир пхувья́, савэ́ ту на джинэсас.

¹⁰ И пиритрашавава Мэ ту́са бут народы; лэ́нгирэ кра́лья издрана дрэ дар пал ту́тэ, ко́ли ґазда́ва Мэ Мири́ курта́ла анги́л лэ́нгиро муй, явэ́ла тэ издрал кажно лэ́ндыр кажно мэнта (минута) пал пэ́скиро ди дрэ тырэ́-пэрибнаскиро дывэ́с.

¹¹ Адя́кэ ракирэ́ла Рай Дэвэ́л, Дэвэ́л: “Вавилоно́скирэ-крали́скири курта́ла явэ́ла пэ ту́тэ.

¹² Зоралэ́ манушэ́нгирэ куртала́тыр пэрэ́ла Тыро́ народо, сарэ́ ёнэ исын древа́н захалэ; ёнэ хасякирэна Египто́скиро пхутькирибэ́н; и хасёла саро́ лэ́скиро бутыпэн.

¹³ И Мэ хасякира́ва сарэ́ Лэ́скирэ кхэритконэ́ мурдалэ́н (ското), пашы́л баро́ пани́; на ґаздэ́ла бла́та бутэды́р дро пани́ манушэскири ґэро́й, на ґаздэ́ла бла́та дро пани́ гурувэнгиро копыто (най/кхурвал).

¹⁴ Тэ́ньци дава́ Мэ штылыпэн лэ́нгирэ панескэ, кэра́ва адя́кэ, со потхадэна лэ́нгирэ рэ́ки (лэня́), сыр ксил, – ракирэ́ла Рай Дэвэ́л, Дэвэ́л.

¹⁵ Ке́ли Мэ кэра́ва Египто́скири пхув чхучэ́ пхувья́са, ко́ли нашавэла пхув саро́, со пхэрдякирэла ла, ке́ли хасякира́ва сарэ́н, кон дживэ́ла пэ пхув, тэ́ньчи ёнэ ґалёна, со Мэ сом Рай Дэвэ́л.’

¹⁶ Акэ, исын роибнытко гилы́, сави́ явэ́на тэ бага́н: народонэнгирэ чхая́ явэ́на тэ бага́н ла; пал Еги́пто, пал саро́ Лэ́скиро бутыпэн збагана ла”, – ракирэ́ла Рай Дэвэ́л, Дэвэ́л.

¹⁷ Дро дэшуявир бэрш, дрэ дэшупанджто чхонытко дывэ́с сыс кэ мэ Ра́скирэ-Дэвлэ́скиро лав дасаво:

¹⁸ “Манушэ́скиро чхава! Заров пал Египто́скиро народо, чхурдэ лэс, лэс и славутнонэ-народэнгирэ чхае́н дрэ хор штэ́ты тэл пхув/одова́ свэ́то кхэтанэ́ одолэнца, кон скэдыяпэ тэ мэрэ́л, кон джа́ла дрэ маґила.

¹⁹ Фэды́р конэ́стыр ту сан? Джа́ тэлэ́, пасёв кхэтанэ́ одолэнца, савэ́ исын наобчхиндлэ.

²⁰ Ёнэ пэрэ́на машки́р манушэ́ндэ, савэ́ исын домардэ́ куртала́са, и ёв исын отдыно́ курталакэ; тэрдэн лэс и пэ́скиро бутыпэн.

²¹ Пэ дова́ свэ́то явэ́на тэ ракирэ́н пал лэ́стэ и пал манушэ́ндэ, савэ́ сыс лэ́са дро доракирибэ́н пэ́рва муршарья-мануша́; ёнэ пынэ́, ёнэ исын паштэ́ одо́й машки́р одолэ́ндэ, савэ́ исын наобчхиндлэ, курта́ла домардя́ лэн.

²² Одо́й исын Асуро и саро́ лэ́скирэ-халадэ́нгиро скэдыибэ́н паш лэ́стэ, одо́й исын лэ́нгирэ мулыканэ (гробы), сарэ́ домардэ́, кон пыя́ куртала́тыр.

²³ Лэ́скирэ мулыканэ чхудэ́ дрэ долэ́-свэтоскиро хорипэ́н; лэ́скирэ-халадэ́нгиро скэдыибэ́н исын пашы́л лэ́скири копли́ца, сарэ́ домардэ́, кон пыя́ куртала́тыр, сарэ́ одолэ́, савэ́ янэ́нас дар пэ джидэ́-манушэ́нгири пхув.

²⁴ Еламо сарэ́ пэ́скирэ бутыпнаса исын пашы́л лэ́скири копли́ца, сарэ́ ёнэ исын домардэ́, сарэ́ пынэ́ куртала́тыр, сарэ́ на сыс обчхиндлэ́ и адя́кэ гинэ́ пэ дова́ свэ́то; одолэ́ сыс мануша́, савэ́ янэ́нас дар пэ джидэ́-манушэ́нгири пхув и лыджа́на пэ́скири ладж кхэтанэ́ манушэ́нца, савэ́ мынэ́.

²⁵ Машкир домардэндэ дынэ́ чхуибэ́н лэ́скэ Еламоскэ и сарэ́ лэ́скирэ бутыпнаскэ; пашы́л лэ́стэ исын лэ́нгирэ мулыканэ, сарэ́ исын наобчхиндлэ, пынэ́ курталытыр, пал-дова́ со ёнэ янэ́нас пэ́са дар пэ джидэ́-манушэ́нгири пхув, ёнэ лыджа́на пэ пэ́стэ ладж кхэтанэ́ одолэнца, кон мыя́; лэн чхудэ́ машки́р домардэндэ.

²⁶ Одо́й исын Мешэфо и Фувало сарэ́ лэ́нгирэ бутыпнаса; пашы́л лэ́стэ исын лэ́нгирэ мулыканэ (гробы), сарэ́ исын наобчхиндлэ, домардэ́ куртала́са, пал-дова́, со ёнэ янэ́нас дар пэ джидэ́-манушэ́нгири пхув.

²⁷ Ци на трэй лэ́нгэ тэ пасён славутнонэ муршарьенца-манушэ́нца, савэ́ на сыс обчхиндлэ́, савэ́ пэ́скирэ халадытконэ скэдыибнаса гинэ́ пэ дова́ свэ́то/лю́но, чхудэ́ пэ́скирэ курталы пэ́скэ тэло шэро́, и яця́пэ лэ́нгиро чорипэ́н пэ лэ́нгирэ кокалы́, пал-дова́ со ёнэ, сыр зоралэ́, сыс дара́са пэ джидэ́-манушэ́нгири пхув.

²⁸ И ту явэ́са домардо машки́р наобчхиндлэндэ, ту явэ́са тэ пасёс одолэнца, кон сыс домардо куртала́са.

²⁹ Одо́й исын Эдо́мо, и лэ́скирэ кра́лья, и сарэ́ лэ́скирэ тхага́рья, савэ́ на дарэнас никонэстыр, нэ чхудэ́ лэн машки́р одолэ́ндэ, кон сыс домардо куртала́са; ёнэ пасёна кхэтанэ́ одолэнца, кон сыс набчхиндло, кон мыя́.

³⁰ Одо́й исын одолэ́, кон сыс тхага́рья пэ паш-рат (северо), сарэ́ ёнэ и сарэ́ Сидоняни, савэ́ гинэ́ одори́к кхэтанэ́ домардэ́ манушэ́нца. Ёнэ лынэ́ ладж пэ́скирэ зоралыпнастыр, саво́ страхакирэлас сарэ́ манушэ́н, и исын паштэ́ ёнэ кхэтанэ́, наобчхиндлэ манушэ́нца, савэ́ пынэ́ куртала́тыр, и лыджа́на пэ́скири ладж кхэтанэ́ одолэнца, кон мыя́.

³¹ Дыкхэ́ла лэн фарао́но, и на явэ́ла тэ тангинэ́л пал пэ́скиро бутыпэн, саво́ пыя́ куртала́тыр, фарао́но и саро́ лэ́скирэ-халадэ́нгиро скэдыибэ́н, – ракирэ́л Рай Дэвэ́л, Дэвэ́л.

³² Мэ розбуґлякирава Мири́ дар пэ джидэ́-манушэ́нгири пхув, явэ́ла чхудо фарао́но и сарэ́ лэ́скиро бутыпэн машки́р наобчиндлэндэ, кхэтанэ́ домардэ́ куртала́са манушэ́нца”, – ракирэ́ла Рай Дэвэ́л, Дэвэ́л.