Езэкилё 29 - Библия - Пэ Балтитко Романи чиб (Романэс) 2019

Ангилпхэныбэ́н Пал Еги́пто

¹ Дро дэ́што бэрш, дро дэ́што чхон, пэ дэшудуенгиро чхонытко дывэ́с сыс кэ Мэ Ра́скирэ-Дэвлэ́скиро лав дасаво:

² “Манушэ́скиро чхава! Рисёв Тырэ́ мо́са кэ Фарао́но, Египто́скиро кра́ли, пхэн пир лав ангилпхэныбэ пэ лэ́стэ и пэ саро́ Еги́пто.

³ Ра́кир и пхэн: ‘Адя́кэ ракирэ́ла Рай Дэвэ́л, Дэвэ́л: “Акэ, Мэ выджава пэ ту́тэ фарао́но, Египто́скиро кра́ли, баро́ крокодило, саво́ пасёла машки́р рэ́ки (лэня́) и ракирэ́ла: “Мири́ исын дая́ рэка (лэнь), Мэ кэрдём ла ваш пэ́скэ.”

⁴ Нэ Мэ чхурдава нангло (крюко) дро тыро́ кирло, кэ Тыри́ цы́па притырдава мачхэн Тырэ́ рэкэндыр (лэнорьендыр), вытырдава тут Тырэ́ рэкэндыр (лэнорьендыр) сарэ́ мачхэнца, савэ́ исын прилипиндлэ кэ тырэ́ луски (чэшуя).

⁵ И чхурдава Мэ тут пэ чхучи́ пхув, тут и сарэ́ мачхэ́ тырэ́ рэкэндыр (лэнорьендыр), ту пэрэса пэ откэрды фэ́лда, на залэна, на ґаздэ́на, Мэ тут отда́ва, соб (кай) тэ хан пхувитка рискирибна́скиро мурдала́ (звери), болыбны́тка чирикля́.

⁶ И ґалёна сарэ́, кон дживэ́ла кэ Еги́пто, со Мэ сом Рай Дэвэ́л, Дэвэ́л, пал-дова́ со ёнэ сыс ваш Израилёскиро кхэр, сыр тришчынытко (тростникитко) дэсто́ тэ подрикирэ́л.

⁷ Ко́ли ёнэ ухтылдэпэ пал ту́тэ вастэ́са, ту роспхарадыянпэ, роспусадян саро́ пэ́скиро псико́, ко́ли ёнэ лынэ́ тэ рикирэнпэ пал ту́тэ, ту пхадиян, розрандыян сарэ́ лэ́нгирэ маса́.”

⁸ Палдава́ адя́кэ ракирэ́л Рай Дэвэ́л, Дэвэ́л: “А́кэ, Мэ яна́ва пэ ту́тэ курта́ла, хасякира́ва ту́тэ манушэ́н и гурувэ́н.

⁹ И скэрлапэ Египто́скири пхув чхучэ́ пхувья́са и ґалёна, со Мэ сом Рай Дэвэ́л, Дэвэ́л. Палдова́ со ёв ракирэ́ла: ‘Мири́ исын рэка (лэнь), Мэ создыём ла,’

¹⁰ Акэ, Мэ подджава пэ тырэ́ рэ́ки (лэня́), Мэ кэра́ва Египто́скирэ пхувья́тыр чхучи́ пхув, со на явэ́ла чхучэдыр ла́тыр; ме́жы Мигдолостыр кэ /жы́ко, Сиена, кэ Ефиопиякирэ ме́жы.

¹¹ На явэ́на тэ псирэ́н одо́й мануша́, на явэ́на тэ псирэ́н одо́й кхэри́тка мурдала́ (ското); на явэ́на тэ дживэ́н пэ ла́тэ штардэша́ бэрш.

¹² И Мэ кэра́ва Египто́скири пхув чхучэ́ пхувья́са машки́р обчордэ пхувья́, ла́кирэ фо́рья, машки́р фо́рья, каты́р гинэ́ мануша́, явэ́на чхучэ́ штардэша́ бэрш; Мэ рострадава Египтянэн пир народы, роспхурдава лэн пир пхувья́.”

¹³ Адя́кэ ракирэ́л Рай Дэвэ́л, Дэвэ́л: “Ко́ли проджа́на (накхэна) штардэша́ бэрш, Мэ скэда́ва Египтянэн народэндыр, машки́р савэ́ ёнэ явэ́на вытрадынэ́.

¹⁴ Мэ рискира́ва Еги́пто наволятыр, Мэ яна́ва лэн пэ пхув Парфос, пэ пхув, кай ёнэ сыс бияндлэ, одо́й явэ́на ёнэ назоралэ кралипнаса.

¹⁵ Кралипэ́н явэ́ла бизорья́киро, на явэ́ла дасаво, сыр яви́р кралипэна́, на явэ́ла бутэды́р тэ ґаздэлпэ пэ народы. Мэ тэлякирава лэн, соб (кай) тэ на припхэнэн ёнэ народэнгэ,

¹⁶ и на явэ́на бутэды́р подрикирибнаса Израилёскирэ кхэрэ́скэ, а саво́ рипирлас лэ́нгиро грэ́хо, и ґалёна, со Мэ сом Рай Дэвэ́л, Дэвэ́л.”

¹⁷ Дрэ биш тэ эфта́то бэрш, дро пэ́рво чхон, пэ пэ́рво чхонытко дывэ́с, сыс кэ мэ лав Ра́стыр-Дэвлэ́стыр дасаво:

¹⁸ “Манушэ́скиро чхава! Навуходоносо́ро, Вавилоно́скиро кра́ли, кхинякирдя пэ́скирэ халадэ́н барэ́ бутяса пашо Ти́ро; пэ сарэ́ шэрэ́ выпынэ бала́, сарэ́ псикэ́ исын скхоснэ, а ни лэ́скэ, ни лэ́нгирэ халадэнгэ нанэ ловэ́ Тиростыр пал буты́, сави́ ёв кэрэ́ла.

¹⁹ Палдава́ адя́кэ ракирэ́ла Рай Дэвэ́л, Дэвэ́л: “А́кэ, Мэ да́ва Навуходоносороскэ, Вавилоно́скирэ крали́скэ, Египто́скири пхув, соб (кай) ёв тэ залэл ла́киро барвалыпэ́н, тэ обчорэл ла тэ чорэл дова́, со ёй чордя, дава́ явэ́ла награда (мазу́ри) лэ́скирэ халадэнгэ.

²⁰ Сыр мазу́ри пал буты́, сави́ ёв кэрдя́, Мэ отда́ва лэ́скэ Египто́скири пхув, палдава́ со ёнэ кэрдэ́ дава́ ваш Ма́нгэ”, – пхэндя́ Рай Дэвэ́л, Дэвэ́л.

²¹ “Дро дова́ дывэ́с Мэ кэра́ва зоралэса Израилёскиро кхэр (рискира́ва шынг/ ро́го Израилёскирэ кхэрэ́скэ), и ту́кэ откэрава ушта́ машки́р лэ́ндэ, и ґалёна со Мэ сом Рай Дэвэ́л, Дэвэ́л.”