Езэкилё 28 - Библия - Пэ Балтитко Романи чиб (Романэс) 2019

Ангилпхэныбэ́н пал Тироскирэ Крали́стэ

¹ И сыс кэ мэ Ра́скирэ-Дэвлэ́скиро лав дасаво:

² “Манушэ́скиро чхава! Пхэн тхагарискэ пэ Ти́ро: адя́кэ ракирэ́ла Рай Дэвэ́л, Дэвэ́л: пал-дова́, со древа́н пхутькирдо яця́ тыро́ ило́, и ту ракирэ́са: “Мэ сом Дэвэ́л, бэшав пэ дэвлы́тко штэ́то дро морёскиро (дэрьявэ́скиро) машкиралыпэн”, пал-дова́ со ту сан ману́ш, а на Дэвэ́л, нэ ту думинэса, со ту сан дасаво годявэр, сыр Дэвэ́л:

³ акэ, ту сан годьварэдыр Даниелёстыр, нанэ чораханыбэн, со ту на джинэсас.

⁴ Тырэ́ шэрэ́са, тырэ́ годя́са ту заухтылдян дасаво барвалыпэ́н, и скэдыян пэ́скэ руп и сувнака́й.

⁵ Тырэ́ годя́са, тырэ́ бикныбнастыр, ту кэрдя́н, соб (кай) тэ явэ́л Тыро́ барвалыпэ́н ишчо (инкэ́) бутэды́р, и тыри́ годы́ яця́ тэ пхутёл тырэ́ барвалыпнаса.

⁶ Палдава́ адя́кэ ракирэ́ла Рай Дэвэ́л, Дэвэ́л: “Ко́ли ту думинэса дро пэ́скиро ило́, со ту сан дасаво годявэр, сыр Дэвэ́л,

⁷ то, акэ, Мэ яна́ва пэ ту́тэ манушэ́н явирэ пхувьендыр, савэ́ исын древа́н захалэ; ёнэ выджа́на пэ́скирэ курталэнца пэ тырэ́ – годя́киро шукарибэн, ёнэ магирэна тут, соб (кай) ту на явэс бутэды́р дасаво шука́р райканыткэс, сыр са́нас.

⁸ Ёнэ залыджана тут дрэ маґила и ту мэрэ́са дро морёскиро (дэрьявэ́скиро) ило́, сыр мэрэ́на мулякирдэ́ мануша́.

⁹ Пхэнэса ци ту тэды тырэ́ мулякирибнаскирэскэ: ‘Мэ сом дэвэл’, – ко́ли дрэ лэ́скиро васт, кон мулякирэ́ла, тут ту явэ́са сыр ману́ш, а на сыр дэвэл?

¹⁰ Ту мэрэ́са наобчхиндлэ-манушэ́нгирэ вастэ́стыр, ту мэрэ́са сыр мэрэ́на мануша́, пал-дова́ со Мэ пхэндём дава́”, – ракирэ́ла Рай Дэвэ́л, Дэвэ́л.”

Ровибэн пал Тироскирэ Крали́стэ

¹¹ И сыс кэ мэ Ра́скирэ-Дэвлэ́скиро лав дасаво:

¹² “Манушэ́скиро чхава! Ров пал Тироскирэ крали́стэ, пхэн лэ́скэ: ‘Адя́кэ ракирэ́ла Рай Дэвэ́л, Дэвэ́л: Нанэ годьварэдыр ту́тыр, нанэ гожэдыр ту́тыр.

¹³ Ту са́нас кэ Эдо́мо, дрэ Дэвлэ́скири у́нта (садо), пэ тыро́ урибэ́н сыс куч бара́: рубино, топазо и мирикло (алмазо), хризолито, ониксо, ясписо, сапфиро, карбункуло и якхори (изумрудо) сувнака́са, саро́ дава́, куч кэрдо́, сыс уридо́ пэ ту́тэ; саро́ дава́ сыс кэрдо́ дро дывэ́с, ко́ли ту са́нас создыно́.

¹⁴ Ту са́нас помакхно херувимо, соб (кай) тэ ракхэ́с, и Мэ чхудём тут ваш дава́. Ту са́нас пэ свэ́нто Дэвлэ́скири бэ́рга, псирэсас машки́р хачкирдэ́ бара́ яга́са.

¹⁵ Ту са́нас пхэрдэ́с создыно́: лачхо́ дрэ тырэ́ дрома́, дывэсэ́стыр, ке́ли ту са́нас создыно́, нэ латхяпэ дрэ ту́тэ чорипэ́н.

¹⁶ Барэ́ тырэ́ бикныбнастыр дрэ тыро́ андрыпэн загия́ начачипэ́н, ту кэрдя́н грэ́хо; Мэ чхурдыём тут тэлэ́, сыр магирдэс Дэвлэ́скирэ бэрга́тыр, Мэ хасякирдём тут, ракхно херувимо, хачкирдэ́ барэндыр дрэ машкиралыпэн.

¹⁷ Тырэ́ гожыпнастыр пхутия тыро́ ило́; Тырэ́ пхутькирибнастыр пал тыри́ шук ту хасякирдян Тыри́ годы́, палдава́ Мэ чхурдава тут тэлэ́ пэ пхув, Мэ отда́ва тут пэ ладж анги́л кралье́ндэ, соб (кай) ёнэ тэ дыкхэ́н пала́л.

¹⁸ Тырэ́ бут-молытконэ чорипнаса, Тырэ́ хоханэ́ бикныбнастыр Ту магирдян Тырэ́ свэ́нта штэ́ты; Мэ дорэсава яг одотхы́р, кай ту дживэса, яг, сави́ зхала тут; Мэ кэра́ва ту́тыр пра́ска (пепло) пэ пхув анги́л сарэнгирэ якха́, кон дыкхэ́ла тут.

¹⁹ Сарэ́, кон джинэлас тут машки́р манушэ́ндэ, явэ́на тэ дивинэнпэ трашаса пал ту́тэ, ту́тыр явэ́ла дар, ту на явэ́са бутэды́р тэ дживэ́с.’”

Ангилпхэныбэ́н Пал Сидоно

²⁰ И сыс кэ мэ Ра́скирэ-Дэвлэ́скиро лав дасаво:

²¹ “Манушэ́скиро чхава! Рисёв тырэ́ мо́са кэ Сидоно, ра́кир пэ лэ́стэ ангилпхэныбэ́н,

²² Пхэн: ‘Акэ, Мэ выджава пэ ту́тэ, Сидоно, тэ прославинавапэ машки́р ту́тэ, и ґалёна, со Мэ сом Рай Дэвэ́л, Дэвэ́л, ке́ли Мэ ява́ва тэ сэндякирав лэс, и ке́ли Мэ сыкава́ва Пэс пир лэ́стэ, со Мэ сом Свэ́нто.

²³ Пал-дова́ со Мэ бичавава пэ лэ́стэ мэрибнытка фра́нсы (фуя́), рат явэ́ла тэ чхувэлпэ пэ вули́цы (га́сы), га́сы, пэрэ́на машки́р лэ́стэ домардэ́ куртала́тыр, сави́ домарэла лэс сарэ́ ригэ́ндыр, и тэ́ньчи ёнэ ґалёна, со Мэ сом Рай Дэвэ́л, Дэвэ́л.’

Со Явэ́ла Израилёса

²⁴ На явэ́ла ёв бутэды́р ваш Израилёскиро кхэр сыр пхусадытко хру́сто, сыр жылто хру́сто сувьенца дыкхады чар? На явэ́ла ние́кх тэ ґаздэлпэ пэ Израилёскиро кхэр бутэды́р явирэ манушэ́ндыр, савэ́ дживэ́на пашы́л Израилё, и тэ́ньчи ёнэ ґалёна, со Мэ сом Рай Дэвэ́л, Дэвэ́л.

Израилёскиро Бахтылыпэн

²⁵ Адя́кэ ракирэ́ла Рай Дэвэ́л, Дэвэ́л: Ко́ли Мэ скэда́ва Израилёскиро кхэр народэндыр, машки́р савэ́ ёнэ исын рострадынэ; то Мэ сыкава́ва пэ лэ́ндэ, со Мэ сом Свэ́нто, соб (кай) тэ дыкхэ́л манушэ́нгиро ро́до; ёнэ явэ́на тэ дживэ́н пэ пэ́скири пхув, сави́ Мэ дыём Мирэ́ писхари́скэ, Яково́скэ.

²⁶ Тэ́ньци ёна явэ́на тэ дживэ́н пэ пхув, на явэ́на тэ дарэ́н никонэстыр, кэрэ́на кхэра́, явэ́на тэ барьякирэ́н виноградоскирэ унты (сады); на явэ́на тэ дарэ́н никонэстыр, пал-дова́ со Мэ ява́ва тэ сэндякирав сарэ́ лэ́нгирэ вэргэ́н, и ґалёна, со Мэ сом Рай Дэвэ́л, энгиро Дэвэ́л.”