Езэкилё 27 - Библия - Пэ Балтитко Романи чиб (Романэс) 2019

Роибэн пал Ти́ро

¹ И сыс кэ мэ Ра́скирэ-Дэвлэ́скиро лав дасаво:

² “И ту акана́, Манушэ́скиро чхаво́, ров пал Ти́ро,

³ пхэн Тироскэ, Ту, саво́ дживэса машки́р мо́рё (дэрья́в), кон тимисякирэла (таргинэла) народэнца бутэ́ островэндыр” адя́кэ ракирэ́л Рай Дэвэ́л, Дэвэ́л: ‘Ти́ро! Ту ракирэ́са нанэ никонэ́с гожэдыр ма́ндыр!’

⁴ Ме́жы тырэ́ исын дро морёскиро (дэрьявэ́скиро) ило́; кодолэ́, кон кэрэ́лас тут, кэрдэ́ тут гожэдыр шукарипнастыр.

⁵ Сенироскирэ – кипарисонэ каштэндыр кэрдэ́ ёнэ Тыро́ ґэристо (помосто) ёнэ лэнас кедро Ливаностыр, соб (кай) тэ кэрэ́н пэ ту́тэ мачты;

⁶ Васаноскирэ дэмбэндыр кэрэ́нас тырэ́ ровля (вёслы) , прэдки (скамейки) тырэ́, кэрэ́нас мануша́ Ашуростыр букитконэ каштэ́стыр, и укэдэнас лэн слонытконэ кокалоса Китимсконэ островэндыр.

⁷ Россудэ похтана (полотны) Египто́стыр мэкэнас пэ тырэ́ балвалунэ́ (па́русы), ёнэ сыс тыро́ сцяго (флаго); синя и лолэ́ тхана (ткани) Елисакирэ островэндыр учхакирэнас тут.

⁸ Мануша́ Сидоностыр и Арвазостыр кэрэ́нас ту́тэ буты́ ровленца (вёслэнца); пэ́скирэ джиныбнарья сыс ту́тэ, Ти́ро, ёнэ лыджа́нас Тырэ́ па́рмы (корабли).

⁹ Пхурыдыра́ Гевалостыр, и лэ́скирэ годэ́ мануша́ сыс ту́тэ, соб (кай) тэ закэрэн пакласа промардэ штэ́ты. Ра́зна па́рмы и лэ́нгирэ кодолэ́ мануша́, савэ́ кэрэ́нас буты́ ровленца, сыс ту́тэ, соб (кай) тэ джал Тыро́ бикныбэн.

¹⁰ Персияни, Лидияни, Ливийцы сыс дро тыро́ халадыбэ́н; ёнэ сыс марибнаскирэ ту́тэ, ёнэ ублавэнас пэ ту́тэ шчы́то и шлемо; лэ́ндыр ту са́нас баро́.

¹¹ Арвадоскирэ мануша́ тырэ́ халадыбнаса сыс тэрдэ́ трусця́л пэ тырэ́ ва́нты, Гамадимы сыс тэрдэ́ пэ тырэ́ вучардя (башни); пэ тырэ́ ва́нты ёнэ ублавэнас пэ́скирэ шчы́ты/колчаны; ёнэ допхэрдякирэнас Тыро́ шукарибэн.

¹² Фарсисо, Тыро́ тимисяри (торговцо), конэ́стэ сыс баро́ барвалыпэ́н, плэскирэлас пал дова́, со ту бикнэсас, рупэ́са, састырэса, моловиса (свинцоса), волывоса (оловоса).

¹³ Явано (Иавано), Тувало, Мешэхо тимисякирэнас ту́са, парувэнас дова́, со ту бикнэнас, пэ манушэ́ндэ и харкунэ́ пирья.

¹⁴ Фогармоскирэ кхэрэ́стыр лыджа́нас ту́кэ грэн, ґэнштэн и лошакэн пал дова́, со ту бикнэсас.

¹⁵ Дедамоскирэ мануша́ тимисякирэнас ту́са; бут островы кэрэ́нас ту́са паруибэн. Ёнэ янэ́нас ту́кэ слонытко кокало и кало́ вэш.

¹⁶ Куч джа́лас тыро́ бикныбэн; тимисякирэнас ту́са Арамеяни, пал-дова́ со ту бут бикнэсас, ёнэ плэскирэнас ту́кэ эмеральдоса (карбунколоса), лолэ́, розсудэ тханэнца, висонытконэ ризэнца, коралэнца и рубинэнца.

¹⁷ Юдея и Израилёскири пхув тимисякирэнас ту́са. Палдова́, со ту бикнэсас, плэскирэнас Минифоскирэ парнэ́ гивэса, гудлыпнаса, ягвинэса, каштунэ ксилэса и бальзамоса.

¹⁸ Куч джа́лас Тыро́ бикныбэн Дамаскоса, конэ́стэ сыс баро́ барвалыпэ́н, ёв бикнэлас ту́кэ Хелбоноскири мол (вино) и парны вы́лна (шэрсь).

¹⁹ Дано и адя́кэ-паць Явано Узалостыр плэскирэнас ту́кэ, псири одори́к-палэ, пал дова́, со ту бикнэсас, выкэрдэ састырэса; кассия, духмяно тришчына джа́нас пэ паруибэн.

²⁰ Дедано тимисякирэлас (кофинэлас) ту́са кучонэ́ цэргэнца (дэкэнца) тэ традэ́н уклистэ́.

²¹ Аравия, сарэ́ Кидароскирэ тхага́рья, парувэнас ту́са: парувэнас бакрорьенца, бакрэнца, бузнэнца (козлэнца).

²² Тылгарья (ку́пцы) Саватыр и Раематыр тимисякирэнас ту́са. Кучонэ кхандыпнэнца, разнонэ кучонэ́ барэ́нца и сувнака́са плэскирэнас ту́са пал дова́, со ту бикнэсас.

²³ Харано, Ханэ́, Едено, Савакирэ тылга́рья, Асуро и Хилмадо тимисякирэнас ту́са.

²⁴ Ёнэ тимисякирэнас ту́са кучонэ́ выкэдымэ урибнэнца – пхарунэ и россудэ тханэнца, савэ́ ёнэ янэ́нас пэ тыро́ тарго дрэ куч мохтэ (яшчыки), со сыс кэрдэ́ кедростыр, савэ́ сыс миштэ́с притасадэ.

²⁵ Пармы (корабли) Фарсисостыр лыджа́нас саро́, соб (кай) тэ джал Тыро́ бикныбэн; ту яця́н барвало́, розгия́пэ тыри́ сла́ва машки́р мо́рё (дэрья́в).

²⁶ Нэ кодолэ́ мануша́, савэ́ кэрэ́нас буты́ пэ ровля пэ ту́тэ, лыджинэ́ тут дро баро́ пани́, нэ васточно балва́л розмардя́ тут машки́р мо́рё (дэрья́в).

²⁷ Тыро́ барвалыпэ́н, тырэ́ товары, тырэ́ барэ́ пираля́ (склады) – дова́, со ту ракхэсас; мануша́, савэ́ кэрэ́нас тырэ́ барки (лодки), мануша́, савэ́ закэрэнас тырэ́ промардэ штэ́ты, савэ́ лыджа́нас тыро́ бикныбэн, сарэ́ халадэ́ тырэ́, савэ́ сыс ту́тэ; сарэ́ трэ бут мануша́, кон сыс ту́тэ, дро тыро́ пэрибнаскиро дывэ́с, пэрэ́на дро морёскиро (дэрьявэ́скиро) хорипэ́н.

²⁸ Лоцманэнгирэ годлатыр, савэ́ лыджа́нас тырэ́ па́рмы, лэ́ла тэ издрал пхув.

²⁹ И зджана пэ брэ́го тырэ́ пармэндыр сарэ́ мануша́, савэ́ гребинэнас ровленца, савэ́ плывинэнас пэ лэ́ндэ, и савэ́ лыджа́нас лэн, штавэна пэ пхув.

³⁰ И заровэна пал ту́тэ зоралэ́ заня́са, и явэ́на тэ ровэ́н киркэс пал ту́тэ, чхувэ́на пра́ска (пепло), пэ пэ́скирэ шэрэ́ и явэ́на тэ равэнпэ дро пра́хо.

³¹ Ёнэ обчхинэна пэ́скирэ бала́ сарэ́са пал ту́тэ, урьена пэ пэ́стэ балытка гонэ́ праскаса, и заровэна пал ту́тэ илэ́скирэ дукхатыр барэ́ роибнаса.

³² Дрэ пэ́скиро тугипэн (жалость) ёнэ забагана роибнытко гилы́ пал ту́тэ, адя́кэ ёнэ явэ́на тэ обровэнпэ пал ту́тэ: ‘Саво́ сыс фо́ро, сыр Ти́ро, со сыс роспхагирдо машки́р мо́рё (дэрья́в)!’

³³ Ке́ли явэ́лас морёстыр (дэрьявэстыр) дова́, со ту бикнэсас, то ту чалякирэсас бутэ́ манушэ́н тырэ́ барвалыпнаскирэ бутыпнаса, тырэ́ бикныбнаса ту барвалякирэсас пхувьенгирэ кралье́н.

³⁴ А ке́ли тут розмардя́ баро́ пани́ пэ са́мо хорипэ́н, то сарэ́ товары, со ту бикнэсас, саро́; со пхэрдэ́с сыс дрэ ту́тэ, пыя́ дро са́мо хорипэ́н.

³⁵ Сарэ́ мануша́, савэ́ дживэ́нас пэ островы, дивиндлэ́пэ трашаса ту́тыр, лэ́нгирэ кра́лья заиздрандынэ, парудяпэ лэ́нгиро муй пхарипнастыр.

³⁶ Тимисярья (торговцы) явирэ народэндыр, дынэ́ шоля (свистиндлэ) пал ту́тэ, ту кэрдянпэ сыр траш, и ту на явэ́са тэ дживэ́с бутэды́р.”