Езэкилё 22 - Библия - Пэ Балтитко Романи чиб (Романэс) 2019

Израилёскирэ Грэхи

¹ И сыс кэ Мэ Ра́скирэ-Дэвлэ́скиро лав дасаво:

² “А ту, манушэ́скиро чхава, ци камэ́са ту тэ сэндякирэс? Камэ́са ту тэ сэндякирэс фо́ро, кай чхувэ́лапэ рат? Пхэн лэ́скэ пал саро́ лэ́скиро джунгалыпэ́н (сари́ лэ́скири брыткима).

³ Пхэн: ‘Адя́кэ ракирэ́ла Рай Дэвэ́л, Дэвэ́л: о, фо́ро, саво́ чхувэ́ла рат машки́р пэ́стэ, соб (кай) тэ явэ́л лэ́скиро часо, и саво́ кэрэ́ла пэ́стэ и́долы, соб (кай) тэ магирэл пэс!

⁴ Ратэстыр, саво́ ту прочхудян, ту сан банго́, идолэндыр, савэ́н ту кэрдя́н, ту сан магирдо́. Подгинэ́ тырэ́ дывэса́, явдя́ тыри́ шту́нда (ґодина). Пал кадава́ Мэ отда́ва тут пэ манушэ́нгиро сабэн, пэ сарэ́ – пхувьенгиро просаибэн.

⁵ Кодолэ́, савэ́ исын пашы́л ту́тэ, и кодолэ́, савэ́ исын дур ту́тыр, явэ́на тэ кошэнпэ пэ ту́тэ, кон магирдя тыро́ лав, прославиндэпэ долэса, со дро бу́нто на кандэнас никонэ́с.

⁶ Акэ, Израилёскирэ тхага́рья: кажно (сва́ко) пэ́скирэ зорья́са сыс ту́тэ, соб (кай) тэ чхувэ́н рат.

⁷ Ту́тэ намишто ракирэ́на пал датэ и дадэ́стэ: кэрэ́на намиштэс манушэ́са, саво́ явдя́ явирэ пхувья́тыр; машки́р ту́тэ накуч кэрэ́на пиротоса (бидадэскирэ чхавэ́са), пивляса (биромэскирэ манушняса).

⁸ Ту на дэ́са паты́в мирэ́ свэнтонэскэ, и пхагирэса Мирэ́ са́ваты (суботы).

⁹ Мануша́, савэ́ намиштэс ракирэ́на пал явирэ манушэ́ндэ, исын дрэ ту́тэ, соб (кай) тэ чхувэ́н рат; пэ бэ́рги ха́на ту́тэ свэнтонэ́ – дыибнытко хабэ́н идолэ́нгэ, машки́р ту́тэ кэрэ́на фуипэ́н.

¹⁰ Дадэ́скиро нангипэ́н откэрэна ту́тэ, ёнэ явэ́на зорья́са кэ джувлы́, ко́ли ёй жужакирэлпэ ла́кирэ нажужипнастыр.

¹¹ Яви́р кэрэ́ла биладжаипэ́н чужонэ́ ромня́са, яви́р магирэла пэскирья́ борья, яви́р кэрэ́ла биладжакиро грэ́хо пхэняса, пэ́скирэ – дадэ́скирэ чхаса.

¹² Кэ ту мануша́ лэ́на мыто (взятка), соб (кай) тэ чхувэ́н рат, ту дэсас ловэ́ тэло ко́фо (процэнто), и лэсас барэды́р бажын (лихва) ту зорья́са отлэсас миштыпэ́н тырэ́ пшалэстыр, а пал Ма́ндэ бистырдян, – ракирэ́ла Рай Дэвэ́л, Дэвэ́л.

¹³ Акэ, палдава́ Мэ дивинавпэ, со аж мардём пэс пир васта́ трэ начачипнастыр, сыр тут тырдэла кэ барвалыпэ́н, сыр рат чхувэ́лапэ машки́р ту́тэ.

¹⁴ Ци вырикирла тыро́ ило́, ци на обмэкэнапэ Тырэ́ васта́ дрэ кодолэ́ дывэса́, ко́ли Мэ выджава пэ ту́тэ? Мэ, Рай Дэвэ́л, Дэвэ́л, пхэндём и кэра́ва дава́.

¹⁵ И Мэ росчхурдава тут пир народы тэ дживэ́с, роспхурдава тут пир пхувья́, и ту на явэ́са тэ кэрэ́с буты́р сарэ́са джунгалыпэ́н машки́р пэ́стэ.

¹⁶ Ту кокоро́ пэс магирэса анги́л манушэ́нгирэ якха́, и ту ґалёса, со Мэ сом Рай Дэвэ́л, Дэвэ́л.’”

Израилё Сы́рбы Явэ́ла дро Баро́ Бов

¹⁷ И сыс кэ мэ (Езэкилё) Ра́скирэ-Дэвлэ́скиро лав дасаво:

¹⁸ “Манушэ́скиро чхава! Израилё кэрдя́пэ Ма́нгэ сыр шлако, сыр нажужо руп, сарэ́ ёнэ исын – волыво (олово), харко́ма (медь), састы́р, молови (свинцо) – кэрдэ́пэ дро бов, сыр шлако рупэ́стыр.

¹⁹ Палдава́ адя́кэ ракирэ́ла Рай Дэвэ́л, Дэвэ́л: ‘Ко́ли сарэ́ тумэ́ кэрдэ́пэ шлакоса рупэ́стыр, акэ, Мэ скэда́ва тумэн дро машкира́л Ерусалимо.’

²⁰ Сыр дро бов мануша́ чхувэ́на саро́ кхэтанэ́ руп, и харко́ма, и састы́р, и молови, и волыво, соб (кай) тэ роспхурдэн яг пэ лэ́ндэ, соб (кай) тэ розбилавэн (тэ ростопинэн) лэн, адя́кэ Мэ, дрэ Миро холямипэн, скэда́ва и чхува́ва и розбилавава тумэн.

²¹ Акэ, Мэ скэда́ва тумэн, и Мэ пхурдава пэ тумэ́ндэ Мирэ́ холямипнаскирэ яга́са, и тумэ́ розбилавэнапэ машки́р ла́тэ.

²² Сыр руп розбилавэлпэ дро машкира́л бов, адя́кэ и тумэ́ розбиладёна, и ґалёна тумэ́, со Мэ, Рай Дэвэ́л, Дэвэ́л, вычхудём пэ тумэ́ндэ Миро холямипэн.”

²³ И сыс кэ мэ Ра́скирэ-Дэвлэ́скиро лав:

²⁴ “Манушэ́скиро чхава! Пхэн лэ́скэ: “Ту сан нажужи пхув, пэ сави́ на джа́ла брышы́нд дро дывэ́с, ке́ли пэрэ́ла холякири зор!

²⁵ Ла́кирэ проро́ки зракирэнапэ машки́р ла́тэ, сыр шчэр (ле́во), саво́ рыкинэла, рискирэ́ла пэ́скиро дорэсыбэ́н: ёнэ ха́на манушэ́нгиро ди, залэна миштыпэ́н и дро́гима, ячкирэна джувле́н биромэскиро.

²⁶ Ла́кирэ рашая́ пхагирэна Миро Зако́но, магирэна Миро свэ́нто, ёнэ на дыкхэ́на, кай исын свэ́нто, кай исын насвэнто; на сыкавэ́на, кай исын жужо́, а кай исын нажужо; пэ Мирэ́ са́ваты (суботы) ёнэ закэрдэ якха́; Мэ сом сы́рбы магирдо́ машки́р лэ́ндэ.

²⁷ Ла́кирэ тхага́рья исын сыр рува́, савэ́ родэ́на хабэ́н, чхувэ́на рат, хасякирэна манушэ́нгиро ди, соб (кай) тэ латхэ́н барвалыпэ́н напатывалэс.

²⁸ А ла́кирэ проро́ки макхэна саро́ блатанэ обмакхибнаса, ёнэ дыкхэ́на чхучипэн (пустота), ангилпхэнэна хохаибэ́н и ракирэ́на: ‘Адя́кэ ракирэ́ла Рай Дэвэ́л, Дэвэ́л”, – а Рай Дэвэ́л, Дэвэ́л ничи́ на ракирэ́лас.

²⁹ А мануша́ народо́стыр кэрэ́на намиштэс екх явирэскэ; чорэна, залэна чорорэстыр и манушэ́стыр, саво́ мангэ́ла, кэрэ́на намиштэс манушэ́са, саво́ явдя́ явирэ пхувья́тыр.

³⁰ Родыём Мэ лэ́ндэ манушэ́с саво́ чхувэлас ва́нта и тэрделас дро пропхагирибэн анги́л Ма́ндэ пал дая́ пхув, соб (кай) Мэ тэ на распхагирав ла, нэ Мэ налатхём.

³¹ Адя́кэ явэ́ла: Мэ вычхувава пэ лэ́ндэ Мирэ́ холякири яг, Мирэ́ холякирэ яга́са Мэ хасякира́ва лэн, и Мэ отда́ва палэ пал лэ́нгирэ рэ́нды пэ лэ́нгиро шэро́” – ракирэ́ла Рай Дэвэ́л, Дэвэ́л.