Езэкилё 21 - Библия - Пэ Балтитко Романи чиб (Романэс) 2019

Дэвлэ́скири Курта́ла

¹ И сыс кэ мэ Ра́скирэ-Дэвлэ́скиро лав дасаво:

² “Манушэ́скиро чхава! Рисёв тырэ́ мо́са кэ Ерусалимо, пхэн лав пэ свэ́нто штэ́то, ра́кир ангилпхэныбэ́н пэ Израилёскири пхув.

³ Пхэн Израилёскирэ пхувьякэ: “Адя́кэ ракирэ́ла Рай Дэвэ́л, Дэвэ́л: ‘Акэ, Мэ выджава пэ ту́тэ, Мэ дорэсава Мири́ курта́ла (мечо) ножнатыр, хасякира́ва ту́тэ чачунэ́ манушэ́с и грэхитконэ́ манушэ́с.

⁴ А ваш дова́, соб (кай) тэ хасякира́в ту́тэ чачунэ́ манушэ́с и грэхитконэ́ манушэ́с, Мири́ курта́ла выджа́ла ножнатыр пэ кажно лоч, со исын пэ паш-дывэсы́тко, и паш-рати́тко рига́.

⁵ И ґалёла кажно лоч (плоть), со Мэ, Рай Дэвэ́л, Дэвэ́л, дорэсцём Мири́ курта́ла, палэ ёй на рисёла.’

⁶ А, ту, Манушэ́скиро чхаво́, дыхинэ пхарэ́ деса и илэ́са, со пашварэ тэ пхарадён, ров киркэс анги́л лэ́нгирэ якха́.

⁷ И явэ́ла адя́кэ, со пхэнэ́на ту́кэ: ‘Со́скэ ту ровэса?’ пхэн: ‘Шуныбнастыр, саво́ джа́ла, и розмарэлапэ кажно ило́, и мэкэнапэ тэлэ́ сарэ́ васта́, пхаро́ явэ́ла кажнонэ́ дескирэ духоскэ, и сарэ́ чанга́ издрана, сыр пани́. Акэ, дава́ явэ́ла и пхэрдякирэлапэ”, – ракирэ́ла Рай Дэвэ́л, Дэвэ́л.

⁸ И сыс кэ мэ Ра́скирэ-Дэвлэ́скиро лав дасаво:

⁹ “Манушэ́скиро чхава! Пхэн ангилпхэныбэ́н, пхэн: ‘Адя́кэ ракирэ́ла Рай Дэвэ́л, Дэвэ́л: Пхэн: “Курта́ла, курта́ла исын кэрды востро, исын жужакирды (вычыстиндлы).

¹⁰ Кэрды востро (чолалы) ваш дова́, соб (кай) бут тэ мулякирэ́л, жужакирды, соб (кай) тэ хачол, сыр блискавица. Ци трэй амэ́нгэ тэ радынаспэ, со Мирэ́ – чхавэ́скирэ дэсто́ исын вучэды́р кажнонэ́ каштэ́стыр?

¹¹ Мэ дыём тэ жужакирэн (тэ вычыстинэн) ла, соб (кай) тэ лав ла дро васт; кадая́ курта́ла кэрды востро (чолалы), жужакирды, соб (кай) тэ лэл ла мулякирибнарискиро васт.

¹² Ров и тугин ясвэ́нца, манушэ́скиро чхава, пал-дова́ со ёй явэ́ла пэ Мирэ́ манушэ́ндэ, пэ сарэ́ Израилёскирэ тхагарьендэ, лэн отдэна курталакэ кхэтанэ́ мирэ́ манушэ́нца, палдава́ мар пэс пир стаця (сцёгны).

¹³ Курта́ла исын пропатякирды. И со ко́ли ёй ґаздэ́лапэ пэ крали́тко дэсто́? То дэсто́ на вырикирла,’ – ракирэ́ла Рай Дэвэ́л, Дэвэ́л.

¹⁴ А ту, манушэ́скиро чхава, ангилпхэн и мар вастэ́нца, курта́ла кэрэ́лапэ ишчо (инкэ́) яви́р и три́то мо́ло зоралэды́р; курта́ла подджа́ла пэ манушэ́нгиро мулякирибэн, пэ барэ́ – манушэ́скиро мулякирибэн, саво́ заджа́ла дрэ лэ́нгирэ кхэра́.

¹⁵ Пашы́л сарэ́ лэ́нгирэ по́рты (вра́ты) и Мэ чхува́ва дараны курта́ла, соб (кай) тэ розмарэнпэ лэ́нгирэ илэ, соб (кай) тэ явэ́л ишчо (инкэ́) бутэды́р замардэ́ манушэ́н. Курта́ла хачола, сыр блискавица, сави́ кэрды востро тэ мулякирэ́л.

¹⁶ Скэдэпэ куртала́са, джа́ пэ чачи́ (право) риг, ци джа́ пэ зэ́рво (ле́во) риг, карик тэ на рисёл тыро́ муй.

¹⁷ Мэ ява́ва тэ мара́в дрэ васта́, и пириячэ́ла Мири́ холы́. Мэ, Рай Дэвэ́л, Дэвэ́л”, – пхэндём кадава́.

¹⁸ И сыс кэ мэ Ра́скирэ-Дэвлэ́скиро лав дасаво:

¹⁹ “Ту, манушэ́скиро чхава, кэр адя́кэ, со исын сы́рбы дуй дрома́, кай трэй тэ джал Вавилоно́скирэ-крали́скирэ курталакэ; трэй, соб (кай) дуй дрома́ тэ выджа́н екхэ пхувья́тыр; кэр шпэ́ра (знако) [васт-р.с.] пашы́л дрома́, савэ́ джа́на дрэ фо́рья.

²⁰ Выкэдэ дром, пир саво́ кур-тала джа́лас пэ Рава, Амоноскирэ-чхавэ́нгирэ фо́ро и пэ Юдэ́я, дро зорьякирдо Ерусалимо.

²¹ Пал-дова́ со Вавилоно́скиро кра́ли исын тэрдо́ пэ дуй дрома́, соб (кай) тэ зумавэл: тринскирэла марибны́тка бустя́ (стре́лы), пхучэлапэ терафимэндыр, дыкхэ́ла пэ кало́ буко (печонка).

²² Дро чачо́ васт лэ́стэ исын драбакирибэн: “Дро Ерусалимо”, кай трэй тэ чхувэ́н марибны́тка тараны проти ва́нты, тэ кхарэ́н тэ мулякирэ́н, тэ ґаздэ́н зан годлыпнаса тэ чхувэ́н пхув ваш вало, тэ ґаздэ́н форитко ва́нта.

²³ Кадава́ драбакирибэн сыкадыя́ дрэ Ерусалимо́скирэ – манушэ́нгирэ якха́ хохаибнаса, нэ пал-дова́, со ёнэ совлахадэ, кра́ли пририпирдя пал лэ́нгиро чорипэ́н, соб (кай) тэ лэн фо́ро марибна́са.”

²⁴ Палдава́ адя́кэ ракирэ́ла Рай Дэвэ́л, Дэвэ́л; Пал-дова́ со тумэ́ кокорэ́ пририпирэн тумаро́ чорипэ́н, кэрэ́н адя́кэ, соб (кай) тумаро́ чорэ́ рэ́нды тэ явэ́н дыкхнэ́, соб (кай) тэ сыкадён тумарэ́ грэ́хи пир сарэ́ тумарэ́ рэ́нды; пал-дова́ со тумэ́ кокорэ́ пририпирэна пал дава́, – тумэн лэ́на вастэ́нца.

²⁵ И ту, магирдо́, на́лачхо Израилёскиро тхага́ри, саво́ кэрэ́ла грэ́хо, тыро́ дывэ́с явдя́ ададывэ́с, ту на явэ́са тэ кэрэ́с тыро́ чорипэ́н бутэды́р.

²⁶ Адя́кэ ракирэ́ла Рай Дэвэ́л, Дэвэ́л: ‘Укэдэ диадэма, лэ тэлэ́ пэ́стыр тыри́ коро́на, кадалэс буты́р на явэ́ла; тэлатуно явэ́ла тэ барьёл, а упратуно тэ тэлякирэлпэ.

²⁷ Мэ чхува́ва тэлэ́ лэс троностыр чхува́ва, чхува́ва тэлэ́ лэс, лэс на явэ́ла; нэ, ке́ли явэ́ла Одова́, Конэ́скэ трэй тэ явэ́л, Мэ отда́ва Лэ́скэ.’

Курта́ла Явэ́ла пэ Амоно́скиро Кралипэ́н

²⁸ “Ту, манушэ́скиро чхава, пхэн ангилпхэныбэ́н, пхэн: ‘Адя́кэ ракирэ́ла Рай Дэвэ́л, Дэвэ́л пал Амоноскирэ чхавэ́ндэ пал дова́, со явэ́ла лэ́нца. Пхэн: Курта́ла, курта́ла вытырдыны, жужакирды пэ мулякирибэн, соб (кай) тэ чингирэл, соб (кай) тэ домарэл, соб (кай) тэ хачол, сыр блискавица,

²⁹ соб (кай), ке́ли дэ́на ту́кэ чхучэ́ (пуста) дыкхибэна, зумавэна ту́кэ и хохавэна тут, соб (кай) тут тэ чхувэ́н кэ домардэ́ накуч мануша́, савэнгиро дывэ́с явдя́, на явэ́на бутэды́р тэ кэрэ́н чорипэ́н.

³⁰ Ци тэ рискирав курта́ла дрэ ла́кири ножна? Пэ штэ́то, кай ту са́нас создыно́ пэ пхув, кай ту бияндыян (лотиян), Мэ ява́ва тэ сэндякирав пхарэ́с тут.

³¹ Вычхувава пэ ту́тэ Мири́ зоралы́ холы́, Мэ пхурдава пэ ту́тэ Мирэ́-холямипнаскирэ яга́са, отда́ва тут дрэ биилэскирэ-манушэ́нгирэ васта́, манушэ́нгэ, савэ́ джинэ́на, сыр трэй тэ замарэ́н.

³² Тут похала яг; тыро́ рат ячэ́лапэ дро машкира́л пэ пхув, на явэ́на тэ рипирэ́н пал ту́тэ, пал-дова́, со Мэ, Рай Дэвэ́л, Дэвэ́л, пхэндём дава́.’”