Езэкилё 19 - Библия - Пэ Балтитко Романи чиб (Романэс) 2019

Роибэн пал Израилёскирэ Тхагарьендэ

¹ “А ту лэ тэ ровэс пал Израилёскирэ тхагарьендэ.

² И пхэн: ‘Со за шчэрица (львица) исын тыри́ дай? Дживэлас ёй машки́р шчэрэндэ, и машки́р тэрнэ́ шчэрэндэ барьякирэлас пэ́скирэ тыкнэн.

³ Выбарьякирдя ёй екх пэ́скирэ тыкнэндыр, ёв кэрдя́пэ тэрнэ́ шчэрэса, высыклыя тэ дорэсэл хабэ́н, халас манушэ́н.

⁴ И шундлэ́ пал лэ́стэ манушы́тка на́цыи (народы); ёв сыс ухтылдо лэ́нца, лэс пхандлэ тэлэ́ дрэ зандирья́ (цэ́пи), лыджинэ́ пэ Египто́скиро пхув.

⁵ Ко́ли дай ужакирдя, дыкхця́, со хасия́ саро́, пал со ёй думинэлас, тэ́ньчи лыя́ явирэ́с пэ́скирэ тыкнэндыр, кэрдя́ лэс тэрнэ́ шчэрэса.

⁶ Ёв кэрдя́пэ тэрнэ́ шчэрэса, ке́ли ёв лыя́ тэ псирэ́л машки́р шчэрэндэ, высыклыя тэ дорэсэл хабэ́н, и халас манушэ́н,

⁷ ёв роспхагирэлас чхучэс лэ́нгирэ штэ́ты/магирдя пивленгирэ (удовэнгирэ) кхэра́, и кэрдя́ лэ́нгирэ фо́рья чхучэ́ (пуста), чхучэ́ ячнэ́ пхув и сарэ́ гава́ лэ́скирэ рыкостыр.

⁸ Тэ́ньци ґаздынэ́пэ пэ лэ́стэ народы, савэ́ дживэ́нас пир кодоя пхув пэ дуй рига́, и чхурдынэ́ пэ лэ́стэ пэ́скири кхуды́ (сеть), и ёв сыс ухтылдо дрэ лэ́нгири кхуды́.

⁹ Ёнэ чхурдынэ́ лэс дрэ клетка пэ зандир (цэпо), и лыджинэ́ лэс кэ Вавилоно́скиро кра́ли, ёнэ яндлэ́ лэс дрэ тва́рдыма (крепость), соб (кай) тэ на явэ́л шундлы лэ́скири зан пэ бэ́рги Израилёскирэ.

¹⁰ Тыри́ дай сыс сыр винаградоскиро кашт, саво́ барьёлас пашы́л паня́; пэ лэ́стэ сыс бут рандя́, ёй янэлас бут пхаба́, пал-дова́ со одо́й сыс бут паня́.

¹¹ Сыс лэ́стэ зоралэ́ рандя́ ваш барыдырэнгирэ дэстэ́ (скипетры), вучэ́с ґаздыя́пэ ёй машки́р гэнста рандя́; ёй сыс дыкхны пир пэ́скиро вучипэ́н, пэ́скирэ ґэнстонэ вэткицэнца.

¹² Нэ холямипнаса ёй сыс вырискирды, чхурдыны пэ пхув, васточно балва́л вышутькирдя ла́кирэ пхаба́ (пло́ды); пхадинэ, зашутинэ ла́кирэ зоралэ́ вэ́тки, яг похая лэн.

¹³ А акана́ ёй барьёл пэ чхучи́ пхув (пустыня), дрэ пхув шуки́, сави́ мангэ́ла пани́.

¹⁴ И выгия́ яг ла́кирэ стволостыр вэткэнца, и похая ла́кирэ пхаба́ адя́кэ, со на ячнэ́пэ зоралэ́ рандя́ ваш дэстэ́ барыдырэ́нгэ. Дава́ исын роибнытко гилы́ фэ́ни тэ ровэ́н тэл ла́тэ.’”