Езэкилё 17 - Библия - Пэ Балтитко Романи чиб (Романэс) 2019

Парамыся / Приме́ро пал Барэ́ Чириклэндэ и Винаградоскиро Кашт

¹ И сыс кэ мэ Ра́скирэ-Дэвлэ́скиро лав дасаво:

² “Манушэ́скиро чхава! Дэ, соб (кай) ёнэ шэрэ́ тэ пхагирэн и пхэн притча Израилёскирэ кхэрэ́скэ.

³ Пхэн: ‘Адя́кэ ракирэ́ла Рай Дэвэ́л, Дэвэ́л: “Баро́ о́рло (ки́до), барэ́ пхакэнца, длугонэ порэнца, шука́р, цвятно, приурняндыя пэ Лива́но, и злыя́ упралыпэ́н кедрытконэ каштэ́стыр.

⁴ Чхиндя́ упратуны рандь (вэтка) лэ́скирэ тэрнэ́ вэткэндыр, яндя́ ла пэ Ханаано́скири пхув, чхудя́ ла дро тимисярьенгиро фо́ро.

⁵ И лыя́ кадалэ́-пхувья́кирэ зяркатыр, и чхурдыя́ пэ зяркакири пхув, пашы́л баро́ пани́, сыр барьякирэна ивакиро кашт.

⁶ Ёй выбария, кэрдя́пэ винаградоскирэ каштэса, буґлэса, навучэса. Ла́кирэ рандя́ (вэ́тки) змэкэнаспэ кэ ёв, тэло лэ́стэ сыс ла́кирэ ко́рни (рукха́); яця́ винаградоскирэ каштэса, лыя́ тэ барьёл, мэктя вэ́тки.

⁷ И ишчо (инкэ́) сыс о́рло (ки́до) барэ́ пхакэнца и порэнца. Акэ, кадава́ винаградоскиро кашт потырдыяпэ кэ ёв пэ́скирэ корне́нца, протырдыя́ кэ ёв пэ́скирэ вэ́тки, соб (кай) ёй тэ почхувэл лэс пане́са.

⁸ Кашт барьёлас пэ лачхи́ фэ́лда, пашы́л баро́ пани́, адя́кэ, со могинэлас тэ мэкэл вэ́тки и тэ янэл барьякирдо́ (пло́до), и тэ кэрэ́лпэ шукаронэ каштэса.”

⁹ Пхэн: ‘Адя́кэ ракирэ́ла Рай Дэвэ́л, Дэвэ́л: “Явэ́ла ли лэ́скэ бахт? На вычхинэна ли лэ́скирэ ко́рни (рукха́), на обчхинэна ли лэ́скирэ баритка (пло́ды) адя́кэ, со кашт зашутёла? Сарэ́ тэрнэ́ вэ́тки, савэ́ выбаринэ лэ́стыр, зашутёна. И ци на барэды́р зорья́са, ци на бутэды́р манушэ́нца счхинэна лэс лэ́скирэ корнёстыр.

¹⁰ И, акэ, чхудо дрэ пхув кашт, нэ явэ́ла ли бахт лэ́скэ? На зашутёла ли ёв, ко́ли чилавэ́ла лэс васточно балва́л? Ци на зашутёла дрэ у́нта (садо), кай выбария.”

¹¹ И сыс кэ мэ Ра́скирэ-Дэвлэ́скиро лав дасаво:

¹² “Пхэн кхэрэ́скэ, кай никонэ́с на кандэ́на: ‘На джинэ́на хай, со исын дава́?’ Пхэн: Акэ, явдя́ Вавилоно́скиро кра́ли дро Ерусалимо, лыя́ лэ́скирэ крали́с и лэ́скирэ ран, яндя́ лэн кэ пэ дро Вавило́но.

¹³ И Ёв лыя́ явирэ сэмэнцас кралитконэ родо́стыр, загия́ лэ́са дро доракирибэ́н, пхэндя́, соб (кай) яви́р тэ дэл лэ́скэ совэ́л, лыя́ пэ́са зоралэн долэ́ пхувья́тыр,

¹⁴ соб (кай) тэ кандэл лэс кралипэ́н, соб (кай) тэ на ґаздэлпэ, соб (кай) тэ зракхэлпэ доракирибэ́н, соб (кай) тэ тэрдёл ёв твардэс.

¹⁵ Нэ кодова́ (Юдэя́киро кра́ли) угия лэ́стыр, бичхадя́ пэ́скирэ послэн дро Еги́пто, соб (кай) тэ дэн лэ́скэ бут грэн и бут манушэ́н. Ци явэ́ла лэ́скэ бахт? Выдживэла, хай, кодова́, кон кэрэ́л дава́? Ёв пхагирдя́ доракирибэ́н, зракхэ́лапэ ли ёв?

¹⁶ ‘Тэ джива́в Мэ’, – ракирэ́ла Рай Дэвэ́л, Дэвэ́л. “Пэ штэ́то, кай дживэ́ла кра́ли, саво́ чхудя́ лэс (Юдэя́кирэ крали́с) крали́са, а ёв на зрикирдя совэ́л, сави́ дыя́ крали́скэ, роспхагирдя́ пэ́скиро доракирибэ́н лэ́са, ёв мэрэ́ла лэ́стэ кэ Вавило́но.

¹⁷ Барэ́ зорья́са, бутэ́ манушэ́нца фарао́но ничи́ на кэрэ́ла ваш лэ́скэ дро дава́ марибэ́н, ко́ли ґаздэ́напэ вэ́рги, соб (кай) тэ хасякирэ́н бут манушэ́н.

¹⁸ Ёв на зрикирдя совэ́л, соб (кай) тэ роспхагирэл доракирибэ́н. Акэ, ёв дыя́ пэ́скиро васт, кэрдя́ саро́ дава́; ёв на зракхэ́лапэ.”

¹⁹ Палдава́ адя́кэ ракирэ́л Рай Дэвэ́л, Дэвэ́л: ‘Тэ джива́в Мэ!’ Мири́ совэ́л, сави́ ёв на зрикирдя и Миро доракирибэ́н, саво́ ёв роспхагирдя́, Мэ рискира́ва пэ лэ́скиро шэро́.

²⁰ Мэ чхурдава пэ лэ́стэ Мири́ кхуды́ (сеть), ёв явэ́ла ухтылдо пир Ма́ндэ; Мэ яна́ва лэс дро Вавило́но; ява́ва тэ сэндякиравпэ лэ́са пал дова́, со ёв хохадя Ман.

²¹ А сарэ́ лэ́скирэ мануша́, савэ́ нашэ́на сарэ́ лэ́скирэ халадэ́нгирэ скэдыбнэндыр, пэрэ́на куртала́тыр, а кодолэ́, савэ́ ячэ́напэ, явэ́на роспхурдынэ пир сарэ́ балваля и ґалёна, со Мэ, Рай Дэвэ́л, Дэвэ́л, пхэндём дава́.”

²² Адя́кэ ракирэ́л Рай Дэвэ́л, Дэвэ́л: “Лава́ Мэ рандь (вэтка) вучэ́ кедроскирэ упралыпнастыр, Мэ чхува́ва ла дрэ пхув. Лэ́скирэ упратунэ вэткэндыр Мэ отчхинава тэрны́ вэтка, чхува́ва ла дрэ пхув пэ вучи́ и шука́р бэ́рга.

²³ Пэ вучи́ Израилёскири бэ́рга Мэ чхува́ва ла дрэ пхув, и Ёй мэкэ́ла вэ́тки, и янэ́ла барьякирдо́ (пло́до), и кэрлапэ барэ́ кедроскирэ каштэса; явэ́на тэ дживэ́н тэл лэ́стэ чирикля́; чирикля́ порэнца явэ́на тэ дживэ́н тэл лэ́скирэ вэ́тки.

²⁴ И ґалёна сарэ́ фэлды́тка кашта́, со Мэ, Рай Дэвэ́л, Дэвэ́л, вучо́ кашт тэлякирава, а навучо кашт Мэ кэра́ва упрэдыр; зэлэно кашт кэра́ва шукэ́ каштэса, а шуко кашт кэра́ва каштэса цвэтэнца. Мэ, Рай Дэвэ́л, Дэвэ́л, пхэндём и кэра́ва.”