Езэкилё 16 - Библия - Пэ Балтитко Романи чиб (Романэс) 2019

Дэвэ́л Камэ́ла Ерусалимо

¹ И сыс кэ мэ Ра́скирэ-Дэвлэ́скиро лав дасаво:

² “Манушэ́скиро чхава! Роспхэн Ерусалимоскэ пал сарэ́ лэскрэ джунгалэ́ рэ́нды (де́лы).

³ “Пхэн: ‘Адя́кэ ракирэ́ла Рай Дэвэ́л, Дэвэ́л, Ерусалимо́скирэ патывалэ́ чхакэ: тыро́ ро́до и тырэ́ дадэ́скиро кхэр исын пэ Ханаано́скири пхув; тыро́ дад исын Амореё, тыри́ дай исын Хетеянка.

⁴ Ко́ли тэ пхэнас пал тыро́ бияныпэ́н, дро дывэ́с, ке́ли ту бияндыян, ту́тэ на отчингэрэнас пупко (бурык). Пане́са ту на са́нас выморды ваш жужакирибэн; лондэса ту на са́нас лондякирды, пхэрнэнца ту на са́нас патькирды.

⁵ Нико́н на сыкадя́ ило́ кэ ту, соб (кай) тангипнастыр кэ ту тэ кэрэ́л ту́кэ вари-со далэ́стыр, нэ ту са́нас вычхурдыны пэ чхучи́ (пусто) фэ́лда, пал-дова́ со ту никонэ́скэ на са́нас трэй, дро дывэ́с, ке́ли ту бияндыян.

⁶ А ке́ли Мэ джавас пашы́л одо́й, кай са́нас ту, дыкхцём тут, со ту сан вычхурдыны, со ту са́нас дро тыро́ рат, и пхэндём ту́кэ: “Джив дро тыро́ рат!” Адя́кэ мэ пхэндём: “Джив дро тыро́ рат.”

⁷ Мэ убарьякирдём тут, Израилё адя́кэ бут, сыр бут исын фэлды́тка чарья́. Ту выбариян, яця́н бари, яця́н древа́н шука́р барэ́ чхаса, бала́ ту́тэ выбаринэ, нэ ту са́нас нанги, научхакирды.

⁸ Тэ проджавас Мэ одо́й, кай ту са́нас, и Мэ удыкхавас тут. Акэ, дава́ сыс тыро́ часо, камлыпнаскиро часо. Лыём Мэ Мирэ́ урибэна́, учхакирдём тыро́ нангипэ́н; дыём совэ́л ту́кэ, кэрдём доракирибэ́н ту́са, – ракирэ́ла Рай Дэвэ́л, Дэвэ́л, – ту яця́н Мири́.

⁹ Тэ́ньци вымордём Мэ тут пане́са, мордём Ту́тыр тыро́ рат, Мэ макхцём тут оливитконэ дзэтэса (елеёса).

¹⁰ Мэ уридём пэ ту́тэ высуды и́дя; Мэ дыём ту́кэ цандали бобритконэ цыпатыр, обпхандём тут похтанэса, Мэ учхакирдём тут пхарунэ дыкхлэса.

¹¹ И ишчо (инкэ́) уридём Мэ тут дро урибэна́ шукарьякирибнаса, чхудём пэ тырэ́ васта́ корэ (вастытка), а пэ тыри́ мэн-мирикля [зандирори-ю.о.].

¹² И чхудём Мэ ту́кэ ангрусты кэ дро тыро́ накх, чэня дрэ тырэ́ кана́, а пэ тыро́ шэро́ – шука́р коро́на.

¹³ Адя́кэ са́нас ту шукарьякирды дрэ руп и сувнака́й; тыро́ урибэ́н сыс кэдыно похтан, пхар, россудэ тхана. Ту хаян маро́ кучонэ́ яржэстыр, агвин и оливи́тко дзэт, тэ са́нас древа́н шука́р, ту яця́н уса́ фэды́р сыр тхагарица.

¹⁴ И розгия́пэ пир Наюдытконэ́ манушэ́ндэ бари малва пал тыро́ шукарипэ́н, пал-дова́ со ёв сыс пхэрдо́ дро дова́ шука́р урибэ́н, дро саво́ Мэ уридём тут”, – ракирэ́ла Рай Дэвэ́л, Дэвэ́л.

¹⁵ ‘Нэ ту древа́н патяндыян дро тыро́ шукарипэ́н, ту яця́н биладжакуны и парувэсас кажнонэса, кон джа́ла пашы́л одо́й, кай ту са́нас, и отдэсас паты́в лэ́скэ.

¹⁶ Ту адя́кэ-паць лыян тырэ́ урибнэндыр, шукарьякирдян пэ́скэ ра́зна цвятна вучэ́ штэ́ты, ту кэрэсас биладжаипэ́н пэ лэ́ндэ адя́кэ, со николи буты́р на кэрлапэ, и на явэ́ла.

¹⁷ И ту лыян тырэ́ укэдыбэна Мирэ́ сувнака́стыр и Мирэ́ рупэ́стыр, савэ́ Мэ дыём Ту́кэ, ту кэрдя́н пэ́скэ фигуры сы́рбы муршэ́н, и кэрдя́н биладжаипэ́н лэ́нца.

¹⁸ Ту лыян тырэ́ россудэ урибэна́, и ту уридян лэн пэ лэ́ндэ, ту чхувэсас анги́л лэ́ндэ Миро оливи́тко дзэт (елеё) и дрогонэ́-смолакиро тхувипэн.

¹⁹ “И Миро хабэ́н, саво́ Мэ давас ту́кэ, и маро́ кучонэ́ яржэстыр и оливкитко дзэт, и авги́н (мэда), савэ́нца Мэ чалякиравас тут, ту чхувэсас анги́л лэ́ндэ, соб (кай) тэ явэ́л гудло́ тхувипэн, и дава́ сыс,’” – ракирэ́ла Рай Дэвэ́л, Дэвэ́л.

²⁰ Ту лыян трэ чхавен, трэ чхае́н, савэ́н ту бияндян Ма́нгэ, и ту отдэсас лэн ваш свэ́нто дыибэ́н (жэ́ртва), соб (кай) ёнэ, и́долы, тэ хан. Ци на ухты́лла (на́доси) ли ту́кэ тэ кэрэ́с биладжаипэ́н?

²¹ Нэ ту и Мирэ́ чхавэ́н мулякирэсас и янэсас лэн лэ́нгэ, ке́ли ту пролыджасас лэн машки́р яг.

²² И ко́ли кэрэсас сарэ́ тырэ́ джунгалыпэна и биладжакунэ́ рэ́нды, ту на рипирдян тырэ́ тэрнэ́ бэрша́, ке́ли ту са́нас нанги, научхакирды и чхурдыны дро тыро́ рат.

²³ Ко́ли проджанас сарэ́ тырэ́ бэда рэ́нды – ‘Бида, би́да ту́кэ!’ – ракирэ́ла Рай Дэвэ́л, Дэвэ́л,

²⁴ ту кэрдя́н пэ́скэ мангипнытко штэ́то, и кэрдя́н пэ́скэ вучэ́ штэ́ты пэ кажно га́са [форуны́/пло́шча-р.с.],

²⁵ пашы́л загиибэ́н пэ кажно дром ту кэрдя́н пэ́скэ вучэ́ штэ́ты, и ту ладжакирэсас тыро́ шукарипэ́н. Ту на са́нас патяибны́тко трэ ромэскэ кажнонэса, кон бы тэ на проджалас, инкэ́ (ишчо) буты́р кэрэсас тырэ́ биладжакунэ́ рэ́нды.

²⁶ Ту адя́кэ-паць кэрэсас биладжаипэ́н Египто́скирэ чхавэ́нца, савэ́ дживэ́нас пашы́л ту́тэ, древа́н вучэ́ манушэ́нца, ишчо (инкэ́) буты́р кэрэсас тыро́ напатяибэн, и холякирэсас Ман.

²⁷ Акэ, палдава́ Мэ протырдыём пэ ту́тэ Миро Васт, тыкнякирдём котэ́р долэ́стыр, со сыс тыро́, отдыём Филистимия́кирэ чхаенгэ, савэ́ бидыкхэнас тут, савэ́ ладжанас долэ́стыр, со ту кэрдя́н, соб (кай) тэ кэрэ́н ёнэ ту́са дова́, со камэ́на.

²⁸ Ту адя́кэ-паць кэрдя́н ладжаипэ́н Асуроскирэ чхавэ́нца, нэ ту на чалыян, чачэс ту кэрэсас ладжаипэ́н лэ́нца, и на ухтыллас (на́доси) ту́кэ дава́.

²⁹ Ту буты́р кэрэсас тыро́ ладжаипэ́н пэ Ханааноскиро пхув кэ Халдея и, дыкх жа, на ухтыллас (на́доси) ту́кэ.

³⁰ Сыр кхиния, ґалёв, тыро́ ило́, – ракирэ́ла Рай Дэвэ́л, Дэвэ́л, ко́ли ту кэрэсас сарэ́ кадалэ́ рэ́нды (де́лы), сыр биладжакири манушны, савья́ нанэ конэ́скэ тэ штылякирэл!

Ерусалимоскиро Напатяибэн

³¹ Ко́ли ту кэрэсас пэ́скэ мангипнытка штэ́ты ваш тырэ́ биладжакирэ рэ́нды пашы́л загиибэ́н пэ кажно дром, кэрэсас пэ́скэ вучэ́ штэ́ты пэ кажно вули́ца (га́са). Нэ ту на са́нас тэ́ньчи биладжакунэ́ джувля́са, пал-дова́ со ту на камдян тэ прилэс плэскирибэн.

³² А ту сан, сыр джувлы́, сави́ нанэ патяибны́тко ромэскэ, сави́ родэ́ла на пэ́скрэ ромэс, а чужонэ́ манушэ́н.

³³ Сарэ́нгэ биладжакунэ́ джувленгэ мурша́ дэ́на почасту́нки (ловорэ), а ту кокори дэсас почасту́нки сарэ́ тырэ́ камлэнгэ, ту подкинэсас лэн, соб (кай), ёнэ сарэ́ ригэ́ндыр тэ явэ́н тэ кэрэ́н биладжаипэ́н ту́са.

³⁴ Ту́тэ дрэ тырэ́ биладжакунэ́ рэ́нды на сыс дасаво, со исын явирэ джувлендэ: на пал ту́тэ прастанас, а ту дэсас почасту́нки (ловорэ), а ту́кэ ние́кх на дэ́лас почасту́нки, палдава́ ту кэрэсас на адя́кэ, сыр яви́р.

Ерусалимо́скирэ Мануша́ Кэрэ́на Дова́ Ла́са, со Камэ́на

³⁵ Палдава́ вышу́н, биладжакуны джувлие, Ра́скирэ-Дэвлэ́скиро лав!

³⁶ Адя́кэ ракирэ́ла Рай Дэвэ́л, Дэвэ́л: ‘Пал дова́, со ту адя́кэ чхурдэсас тырэ́ ловэ́ и дрэ тырэ́ биладжакунэ́ рэ́нды, сыс откэрдо тыро́ нангипэ́н анги́л тырэ́ камлытконэндэ, анги́л сарэ́ тырэ́ налачхэ́ и́долы, и пал тырэ́-чхавэ́нгиро рат, савэ́н ту отдэсас лэ́нгэ,

³⁷ палдава́, акэ, Мэ скэда́ва сарэ́ тырэ́ камлытконэн, савэ́н ту камэсас и сарэ́н одолэ́н, савэ́н ту древа́н на камэсас. Мэ кэдава лэн сарэ́ ригэ́ндыр пэ ту́тэ, и Мэ откэрава анги́л лэ́ндэ тыро́ нангипэ́н, соб (кай) ёнэ тэ дыкхэ́н сари́ тыри́ ладж.

³⁸ И Мэ ява́ва тэ сэндякирав пхарэ́с тут сэндоса, савэ́са сэндякирэна кодолэ́н, савэ́ парувэна пэ́скирэ ромэскэ; сэндоса, савэ́са сэндякирэна кодолэ́н, кон прочхувэла манушэ́нгиро рат, Мэ отда́ва тут палэ зоралэ́ холынаса и зэвлыныпнаса.

³⁹ Мэ отда́ва тут дрэ лэ́нгирэ васта́, ёнэ роспхагирэна мангипнытка штэ́ты ваш тырэ́ биладжакунэ́ рэ́нды, ёнэ роспхагирэна тырэ́ вучэ́ штэ́ты, рискирэна криг ту́тыр тыро́ урибэ́н, ёнэ лэ́на тыро́ шукарьякирибэн, ёнэ ячавэна тут и ту явэ́са нанги, научхакирды.

⁴⁰ Ёнэ адя́кэ-паць кхарэ́на пэ ту́тэ скэдыибэ́н, ёнэ домарэна тут барэ́нца, и росчингирэна тут пэ́скирэ курталэнца.

⁴¹ И ёнэ хачкирэна сарэ́са тырэ́ кхэра́ яга́са, явэ́на тэ сэндякирэн тут анги́л бутэ́-джувлэнгирэ якха́. Мэ кэра́ва адя́кэ, со ту на явэ́са тэ кэрэ́с буты́р тырэ́ биладжакунэ́ рэ́нды, и ту на явэ́са дурэды́р тэ дэс почасту́нки.

⁴² Адя́кэ Мэ пириячава тэ холясовав древа́н пэ ту́тэ, и отджала ту́тыр Миро зэвлыныпэ́н, и Мэ пириячава тэ холясовав.

⁴³ Пал дова́ со ту на пририпирдян пал тырэ́ тэрнэ́ бэрша́, нэ холякирэсас Ман сарэ́са кадалэса, акэ, Мэ отда́ва ту́кэ пир тырэ́ дрома́ пэ тро шэро́, – ракирэ́ла Рай Дэвэ́л, Дэвэ́л соб (кай) ту тэ на кэрэсас буты́р сарэ́ Тырэ́ биладжакунэ́ рэ́нды, ке́ли прогинэ́ (накхлэ) сарэ́ Тырэ́ джунгалыпэна (брыткимы).

Ёнэ исын Ишчо Бэдэдыр сыр дрэ Сама́рия и Содо́мо [Содо́ма-р.с.]

⁴⁴ Акэ, кажно (сва́ко), кон ракирэ́ла притчэнца (примерэнца), пхэнэ́ла пал ту́тэ: “Сави́ исын дай, адасави исын чхай!”

⁴⁵ Ту сан дасави́, сыр тыри́ дай, сави́ чхурдыя́ пэ́скирэ ромэс и пэ́скирэ чхаворэ́н, – ту сан тырэ́-пхэненгири пхэн, а тырья пхэня́ чхурдынэ́ пэ́скирэ ромэн и пэ́скирэ чхаворэ́н. Тумари́ дай исын Хетеянка, тумаро́ дад исын Амореё.

⁴⁶ Пхурэды́р тыри́ пхэн – Сама́рия, сави́ дживэ́ла пэ́скирэ чхаенца пэ зэ́рво (ле́во) риг ту́тыр, а тыкнэды́р исын тыри́ пхэн, сави́ дживэ́ла пэ чачи́ (право) риг ту́тыр, сави́ исын Содо́мо ла́кирэ чхаенца.

⁴⁷ Нэ ту на псирэсас лэ́нгирэ дромэ́нца, и ту на кэрэсас лэ́нгирэ джунгалыпэна, над, одова́ сыс сы́рбы на́бут, нэ ту́тэ трэ биладжакунэ́ рэ́нды пэ сарэ́ тырэ́ дрома́ исын бутэды́р лэ́ндыр.

⁴⁸ ‘Тэ джива́в Мэ!’ – ракирэ́ла Рай Дэвэ́л, Дэвэ́л тыри́ пхэн ла́кирэ чхаенца на кэрэ́лас дова́, со кэрэ́нас ту и тырэ́ чхая́.

⁴⁹ Акэ, саво́ исын Содомоскиро чорипэ́н, тырэ́-пхэнякиро и ла́кирэ-чхаенгиро бэдыпэн: ёй сыс пхутькирды, ёй халас на дрэ пэ́стэ, на камэлас тэ кэрэ́л нисави́ буты́; ёй на подрикирэлас чорорэ́-манушэ́скиро васт ци кодолэ́с, саво́ сыс дрэ трэ́бима.

⁵⁰ И ячнэ́ ёнэ тэ задэнпэ, и кэрдэ́ джунгалыпэ́н анги́л Ма́ндэ. Мэ дыкхцём кадава́ и гиём лэ́ндыр.

⁵¹ Сама́рия на кэрдя́ паш ада́кицы грэ́хи, кицы́ ту кэрдя́н; ту бутэды́р лэ́ндыр лыян тэ кэрэ́с джунгалыпэ́н; тырэ́ джунгалэ́ рэндэ́ндыр, савэ́ ту кэрэсас, тырэ́ пхэня́ выгинэ́ чачунэдыр ту́тыр.

⁵² Лы́джа тыри́ ладж, ту, сави́ обсэндякирэсас пэ́скирэ пхэнен. Ту ладжакирдян пэс тырэ́ джунгалыпнаса буты́р лэ́ндыр, ёнэ исын чачунэдыр ту́тыр. Яв лолы адя́кэ-паць ладжатыр, лы́джа тыри́ ладж, ту кэрдя́н тырэ́ пхэнен чачунэдыр ту́тыр.

⁵³ Мэ кэра́ва адя́кэ, со рисёна мануша́ лэ́нгирэ плено́стыр, Содомо́скирэ и ла́кирэ-чхаенгиро пле́но, а машки́р лэ́ндэ Мэ рискира́ва одолэнгиро пле́но, конэ́с ту заухтылдян дро пле́но,

⁵⁴ соб (кай) ту тэ лыджас тыри́ ладж, тэ ладжас паты́в сарэ́стыр одолэ́стыр, со ту кэрдя́н, соб (кай) тэ явэс подрикирибнаса ваш лэ́нгэ.

⁵⁵ Тырэ́ пхэня́, Содо́мо [Содо́ма-р.с.] и ла́кирэ чхая́, явэ́на адасавэ́, савэ́ сыс англэды́р; Сама́рия и ла́кирэ чхая́ явэ́на адасавэ́, савэ́ сыс англэды́р; и ту и тырэ́ чхая́ явэ́на адасавэ́, савэ́ сыс англэды́р.

⁵⁶ Пал тырэ́ пхэнятэ Содоматэ ту на пририпирэсас дрэ кодолэ́ дывэса́, ке́ли са́нас древа́н пхутькирды.

⁵⁷ “Ко́ли на сыс ишчо (инкэ́) откэрдо тыро́ начачипэ́н, сыр дро часо, ке́ли лыян ту ладж Сириякирэ чхаендыр и сарэ́ндыр, кон дживэлас пашы́л ла́тэ, Филистимия́кирэ чхаендыр, савэ́ обсэндякирибнаса дыкхэнас пэ ту́тэ сарэ́ ригэ́ндыр.

⁵⁸ Пал тырэ́ биладжакирдэ рэ́нды, пал тырэ́ джунгалыпэна (брыткимы) ту дорэсэса’”, – ракирэ́л Рай Дэвэ́л, Дэвэ́л.

⁵⁹ Адя́кэ ракирэ́ла Рай Дэвэ́л, Дэвэ́л: “Мэ кэра́ва ту́са, сыр кэрдя́н ту: на зрикирдян совэ́л, роспхагирдян доракирибэ́н.

⁶⁰ Нэ Мэ пририпирава Миро доракирибэ́н ту́са, саво́ Мэ чхудём дрэ тырэ́ тэрнэ́ бэрша́; ишчо (инкэ́) кэра́ва Мэ ве́чно доракирибэ́н (союзо) ту́са.

⁶¹ А ту пририпирэса пал тырэ́ дрома́, и ячэ́ла ладжаво ту́кэ, ко́ли явэ́са тэ прилэс кэ пэ́скирэ пхэня́ пхурэды́р ту́тыр и тыкнэды́р ту́тыр, ко́ли Мэ ява́ва тэ дав лэн дрэ чхая́ ту́кэ, нэ на тырэ́ доракирибнастыр.

⁶² Мэ ґазда́ва Миро доракирибэ́н ту́са, ту дыкхэ́са, со Мэ сом Рай Дэвэ́л, Дэвэ́л,

⁶³ соб (кай) ту тэ рипирэс и тэ ладжас, соб (кай) нашты́ сыс ту́кэ лав тэ пхэнэ́с ладжатыр, ко́ли Мэ отмэка́ва ту́кэ саро́, со ту кэрдя́н”, – ракирэ́ла Рай Дэвэ́л, Дэвэ́л.