Езэкилё 14 - Библия - Пэ Балтитко Романи чиб (Романэс) 2019

Пхаро́ Сэ́ндо пал Идолы

¹ И явнэ́ кэ мэ вари-кицы́ мануша́ Израилёскирэ пхурыдырэндыр, и сыс бэштэ́ анги́л ма́ндэ.

² И сыс кэ мэ Ра́скирэ-Дэвлэ́скиро лав дасаво:

³ “Манушэ́скиро чхава! Адалэ́ мануша́ мэкнэ́ пэ́скрэ кэрдэ́ дэвлорэ́ (и́долы) дрэ пэ́скрэ илэ, чхудэ́ пэ́скирэ кэрдэ́ дэвлорэ́ анги́л пэ́стэ: сыр жэ сашты́ (могинэн) ёнэ Ма́ндыр тэ пхучэ́н?

⁴ Палдава́ ра́кир лэ́нца и пхэн лэ́нгэ: ‘Адя́кэ ракирэ́ла Рай Дэвэ́л, Дэвэ́л: ко́ли вари-кон Израилёскирэ кхэрэ́стыр домэкэла пэ́скрэ кэрдэ́ дэвлорэ́ (и́долы) дро пэскро ило́, и чхувэ́ла пэ́скрэ кэрдэ́ дэвлорэ́ анги́л лэ́стэ тэ обштавэлпэ и ёв явэ́ла кэ проро́ко, то ці, пхэна́ва ли Мэ, Рай Дэвэ́л, Дэвэ́л, лэ́скэ, ко́ли исын бут лэ́стэ лэскрэ кэрдэ́ дэвлорэ́?

⁵ Мэк тэ ґалён Израилёскиро кхэр дрэ пэ́скиро ило́, со пал сарэ́ ёнэ пэ́скрэ кэрдэ́ дэвлорэ́ кэрдэ́пэ ёнэ чу́жа ваш Ма́нгэ.’

⁶ Палдава́ пхэн Израилёскирэ кхэрэ́скэ: “Адя́кэ ракирэ́ла Рай Дэвэ́л, Дэвэ́л: ‘Рисён кэ Дэвэ́л рисён криг тумарэ́ кэрдэ́ дэвлорэндыр, рискирэ́н тумарэ́ муя́ сарэ́ тумарэ́ джунгалыпнастыр (брыткиматыр)!

⁷ Ко́ли вари – кон Израилёскирэ кхэрэ́стыр и чужонэ́ манушэ́ндыр и, савэ́ дживэ́на дро Израилё, дурьёла кокоро́ Ма́ндыр, и домэкэла пэ́скрэ кэрдэ́ дэвлорэ́ дро пэ́скиро ило́, и чхувэ́ла пэ́скрэ кэрдэ́ дэвлорэ́ анги́л пэ́скиро муй и явэ́ла кэ проро́ко тэ пхучэлпэ лэ́стыр пал Ма́ндэ, то Мэ, Рай Дэвэ́л, Дэвэ́л, отпхэнава лэ́скэ?

⁸ Мэ рисёва́ва Мирэ́ мо́са пэ одолэ́ манушэ́стэ, Мэ кэра́ва адалэ́ манушэ́са адя́кэ, соб (кай) яви́р мануша́ тэ дыкхэ́н, и тэ ракирэ́н, Мэ залава лэс Мирэ́ манушэ́ндыр, Израилёстыр, и Мэ тэды тумэ́ ґалёна, со Мэ сом Рай Дэвэ́л, Дэвэ́л.

⁹ А ко́ли проро́ко домэкэла тэ хохавэ́л пэс, и пхэнэ́ла лав адя́кэ, сы́рбы Мэ, Рай Дэвэ́л, Дэвэ́л, высыклякирдём лэс, то Мэ протырдава пэ лэ́стэ Миро васт, хасякира́ва лэс Мирэ́ манушэ́ндыр, Израилёстыр.

¹⁰ И ёнэ лэ́на пхаро́ сэндякирибэн пал пэ́скрэ чорипэна: саво́ банго́ явэ́ла дова́, со пхучэла, кадасаво́ банго́ явэ́ла и проро́ко,

¹¹ соб (кай) тэ на дурьёл буты́р Израилёскиро кхэр Ма́ндыр, и тэ на кэрэ́н пэс магирдэса пэ́скрэ чорипна́стыр, нэ, соб (кай) тэ явэ́н ёнэ Мирэ́ мануша́, и соб (кай) Мэ тэ явав Лэ́нгиро Рай Дэвэ́л, Дэвэ́л.’”

¹² И сыс кэ мэ Ра́скирэ-Дэвлэ́скиро лав:

¹³ “Манушэ́скиро чхава! Ко́ли вари-сави́ пхув тэ кэрэ́л грэ́хи анги́л Ма́ндэ, и тэ явэ́л уса́ напатяибнытко кэ Мэ, то Мэ протырдыёмас пэ лэ́стэ Миро васт, Мэ залыём бы лэ́стыр саро́ маро́, саво́ дэ́ла джиибэ́н, Мэ бичхадём пэ лэ́стэ бокх и лыём тэ хасякира́в пэ лэ́стэ манушэ́н и кхэритконэ́ мурдалэ́н.

¹⁴ Ко́ли б тэ латхэнпэ пэ доя́ пхув далэ́ трин мануша́: Ноё, Данила и Ио́во, то ёнэ фэ́ни (то́ка) пэ́скрэ свэнтонэ́ джиибнаса, то ракхэнас бы пэскро ди и буты́р ничи́”, – ракирэ́ла Рай Дэвэ́л, Дэвэ́л.

¹⁵ Ци, ко́ли б Мэ бичхадём пэ дая́ пхув захалэ мурдалэ́н тэ проджан пир ла́тэ, савэ́ залэнас бы ла́тыр (пхувья́тыр) чхаворэ́н, и тэ кэрэ́лпэ дая́ пхув мурдалэ́ндыр чхучи́ (пусто), и ние́кх тэ на проджал пир дая́ пхув пал захалэ мурдалэ́ндэ.

¹⁶ Кадалэ́ трин мануша́ тэ явэ́н машки́р ла́тэ, – тэ джива́в Мэ, – ракирэ́ла Рай Дэвэ́л, Дэвэ́л, то на зракхэнас ёнэ ни пэ́скрэ чхавэ́н, ни пэ́скрэ чхае́н, а ёнэ, тринджинэ ёнэ, зракхэнаспэ, нэ пхув явэ́лас чхучи́.

¹⁷ Ци, ко́ли Мэ тэ янав курта́ла пэ дая́ пхув и тэ пхэна́в: “Курта́ла, проджа пир пхув!” И лыём тэ хасякира́в манушэ́н и мурдалэ́н,

¹⁸ то кадалэ́ трин мануша́ машки́р тэ явэ́н тэ ла́тэ, – тэ джива́в Мэ – ракирэ́ла Рай Дэвэ́л, Дэвэ́л на зракхнэ́ бы ни пэ́скрэ чхавэ́н, ни пэ́скрэ чхае́н, а ёнэ фэ́ни тринджинэ зракхнэпэ.

¹⁹ Ко́ли Мэ тэ бичхавав пэ доя́ пхув мэрибнытка фра́нсы, и тэ вычхував пэ ла́тэ Миро холямипэн тэ чхувэлпэ дро рат, соб (кай) тэ хасякира́в пэ пхув манушэ́н и кхэритконэ́ мурдалэ́н (ското),

²⁰ то аж Ноё, Дание́лё и Ио́во тэ явэ́н пэ ла́тэ, – тэ джива́в Мэ, – ракирэ́ла Рай Дэвэ́л, Дэвэ́л, – то тэ на зракхэнас ни пэ́скрэ чхавэ́н, ни пэ́скрэ чхае́н; нэ пэ́скрэ свэнтонэ́ джиибнаса ёнэ фэ́ни зракхэнас бы тринджинэ пэскро ди.’

²¹ Адя́кэ ракирэ́ла Рай Дэвэ́л, Дэвэ́л: ко́ли штар пхарэ́ биды Мирэ́: курта́ла, бокх, захалэ рискирибна́скирэ мурдала́ (звери), мэрибнытка фра́нсы тэ бичхавав Мэ пэ Ерусалимо, соб (кай) тэ хасякира́в дрэ лэ́стэ манушэ́н и мурдалэ́н,

²² И тэ́ньчи ячэ́напэ дрэ лэ́стэ мануша́, чхавэ́ и чхая́, конэ́с вылыджана одотхы́р. Акэ, ёнэ выджа́на кэ тумэ́, тумэ́ дыкхэ́на, со ёнэ кэрэ́на и, савэ́ исын лэ́нгирэ рэ́нды, и тумэ́ бистрэна пал доя́ биба́хт, сави́ Мэ яндём пэ Ерусалимо, пал саро́, со Мэ яндём пэ лэ́стэ.

²³ Ёнэ кэрэ́на адя́кэ, со тумэ́ бистрэна пал биба́хт, ко́ли дыкхэ́на, со ёнэ кэрэ́на и, савэ́ исын лэ́нгирэ рэ́нды. И ґалёна, со Мэ на ивья́ (напра́снэс) кэрдём саро́ дова́, со Мэ кэрдём дро Ерусалимо”, – ракирэ́ла Рай Дэвэ́л, Дэвэ́л.