Езэкилё 11 - Библия - Пэ Балтитко Романи чиб (Романэс) 2019

Со Явэ́ла Ерусалимоса

¹ И ґаздыя́ ман Ду́хо (Фа́но), и яндя́ ман кэ васточно по́рта (вра́ты) дро Ра́скирэ-Дэвлэ́скиро Кхэр, саво́ сыс чхудо пэ васто́ко. Акэ, пашо загиибэ́н дро по́рта сыс биш тэ пандж мануша́. Машкир лэ́ндэ мэ дыкхцём Иезанияс (Язанияс), Азуроскирэ чхавэ́с, и Фалтияс, Ванеёскирэ чхавэ́с. Кадалэ́ сыс тхага́рья машки́р манушэ́ндэ.

² И пхэндя́ Ёв ма́нгэ: “Манушэ́скиро чхава! Акэ, исын мануша́, савэ́ придуминэна чорипэ́н, савэ́ дэ́на бэда годыпэна (советы) дро дава́ фо́ро.

³ И ракирэ́на: Ишчо дур. Ява́са тэ кэра́с кхэра́, ёв исын кака́ви (котло), амэ сам мас.

⁴ Пхэн пэ лэ́ндэ ангилпхэныбэ́н, пхэн ангилпхэныбэ́н, Манушэ́скиро чхаво́.”

⁵ И згия пэ ма́ндэ Ра́скирэ-Дэвлэ́скиро Ду́хо (Фа́но), и пхэндя́ ма́нгэ: “Пхэн,’ адя́кэ ракирэ́ла Рай Дэвэ́л, Дэвэ́л: ‘Со да ракирэ́на тумэ́, Израилёскиро кхэр, пал-дова́ со мэ джино́м, со тумэ́ндэ исын пэ годы́.

⁶ Тумэ́ бут почхудэ замардэ́ манушэ́н дро дава́ фо́ро, и тумэ́ пхэрдякирдэ тумарэ́ вули́цы (га́сы) замардэ́ манушэ́нца.’

⁷ Палдава́ адя́кэ ракирэ́ла Рай Дэвэ́л, Дэвэ́л: ‘Тумарэ́ замардэ́ мануша́, савэ́н тумэ́ чхудэ́, исын маса́, и кадаво фо́ро исын кака́ви, нэ Мэ яна́ва тумэн криг далэ́-форо́скирэ машкиралыпнастыр.

⁸ Тумэ́ дарэ́на куртала́тыр, нэ Мэ яна́ва курта́ла пэ тумэ́ндэ’, – ракирэ́ла Рай Дэвэ́л, Дэвэ́л.

⁹ ‘И Мэ лыджа́ва криг тумэн форо́скирэ машкиралыпнастыр и Мэ отда́ва тумэн дрэ васта́ чужонэнгирэ, и Мэ кэра́ва сэ́ндо пэ тумэ́ндэ.

¹⁰ Тумэ́ пэрэ́на куртала́тыр. Мэ ява́ва тэ сэндякирав тумэн пэ пхувья́кири ме́жа Израилёскири. Тэ́ньци тумэ́ ґалёна, со Мэ сом Рай Дэвэ́л, Дэвэ́л.

¹¹ Ёв на явэ́ла буты́р сыр кака́ви, и тумэ́ на явэ́на буты́р сыр маса́ ваш лэ́скэ, Мэ ява́ва тэ сэндякирав тумэн пэ ме́жа пхувья́кири дро Израилё.

¹² И тумэ́ ґалёна, со Мэ сом Рай Дэвэ́л, Дэвэ́л, пал-дова́ со тумэ́ на псирдэ́ пир Мирэ́ стату́ты (уставы), и тумэ́ на кэрдэ́ пир Мирэ́ статутна упхэныбэна́, нэ тумэ́ кэрдэ́ пир присыкляибэна, Наюдытконэ́ нацыенгирэ, савэ́ исын пашы́л тумэ́ндэ.’”

¹³ И кэрдя́пэ адя́кэ, со сыр мэ ангилпхэнавас, то Фалтия, чхаво́ Ванеяскиро, мыя́. Тэ́ньци Мэ пыём пэ́скирэ мо́са и дыём го́дла зоралэ́с и пхэндём: “О, Раё Дэ́вла! Нау́што Ту камэ́са тэ мулякирэс манушэ́ндыр кэ ко́нцо (яго́ро)?”

Дэвэ́л Нэвякирэла Израилё

¹⁴ Нэвэ́стыр сыс кэ мэ лав Ра́стыр-Дэвлэ́стыр, саво́ пхэнэлас:

¹⁵ “Чхаво́ манушэ́скиро! Трэ пшалэ́нгэ, трэ сэмэнцакэ, трэ родо́скэ и сарэ́ кхэрэ́скэ Израилёскирэскэ, сарэ́нгэ, конэ́скэ пхэндлэ́ джиибна́скирэ мануша́ дро Ерусалимо: ‘Дурьён Ра́стыр-Дэвлэ́стыр, кадая́ пхув дынэ́ амэ́нгэ сыр мэкно́ миштыпэ́н.’

¹⁶ Палдава́ пхэн: Адя́кэ ракирэ́ла Рай Дэвэ́л, Дэвэ́л: “Мэк Мэ росчхудём тэ дживэ́н лэн машки́р Наюды́тка на́цыи, и мэк Мэ пиричхудём лэн тэ дживэ́н дрэ яви́р тхэма, нэ Мэ усае́кх ява́ва ваш лэ́нгэ сыр тыкно́ Свэ́нто Штэ́то пэ одолэ́ пхувья́, карик ёнэ гинэ́.”

¹⁷ Тэ́ньци пхэн адя́кэ: “Мэ скэда́ва тумэн явирэ нацые́ндыр, Мэ яна́ва кхэтанэ́ тумэн тхэмэндыр, кэ савэ́ Мэ росчхудём тэ дживэ́н тумэн, и Мэ да́ва ту́кэ пхув Израилёскири.’”

¹⁸ “И ёнэ явэ́на одо́й, и ёнэ лэ́на криг сарэ́ магирдэ́ вешчы (чысы) и сарэ́ джунгалэ́ предметы.

¹⁹ И Мэ да́ва лэ́нгэ екх ило́, и Мэ чхува́ва нэво́ ду́хо (фа́но) дрэ тумэ́ндэ, и Мэ ла́ва криг баруно ило́ тумарэ́ лочатыр (плотятыр), и Мэ да́ва лэ́нгэ ило́ лочатыр,

²⁰ соб (кай) ёнэ тэ псирэ́н пир Мирэ́ стату́ты, и тэ рикирэнпэ кэ Мирэ́ упхэныбэна́, и тэ кэрэ́н пир лэ́ндэ и ёнэ явэ́на Мирэ́ мануша́, а Мэ ява́ва лэ́нгиро Дэвэ́л.

²¹ А кодолэ́нгэ, савэскирэ илэ тырдэнаспэ палэ магирдэ́ и джунгалэ́ предметы, Мэ отда́ва палэ пал лэ́нгирэ рэ́нды пэ лэ́нгирэ шэрэ́”, – ракирэ́ла Рай Дэвэ́л, Дэвэ́л.

²² Тэ́ньци херувимы ґаздынэ́ пэ́скирэ пхака́ (крылы), и ро́ты сыс пал лэ́ндэ, и сла́ва Израилёскирэ-Дэвлэ́скири сыс упра́л вучэ́ лэ́ндэ.

²³ И сла́ва Ра́скирэ-Дэвлэ́скири газдыяпэ форо́скирэ машкиралыпнастыр и тэрдия́ пэ бэ́рга, со сыс пэ вастокоскири риг дро фо́ро.

²⁴ Тэ́ньци Ду́хо (Фа́но) ґаздыя́ ман и яндя́ ман кэ Халдея дро дыкхибэ́н Дэвлэ́скирэ Духо́стыр кэ одолэ́ мануша́ дро пле́но. И, акэ, дыкхибэ́н, со мэ дыкхцём, гия́ криг ма́ндыр.

²⁵ И адя́кэ мэ роспхэндём дыкхибэ́н кодолэ́нгэ, кон сыс дро пле́но, пал сарэ́ чачипэна́, со Рай Дэвэ́л, Дэвэ́л сыкадя́ ма́нгэ.