Езэкилё 10 - Библия - Пэ Балтитко Романи чиб (Романэс) 2019

Дэвлэ́скири Сла́ва Ячкирэла Кхангири́

¹ И мэ дыкхцём, акэ, пэ сво́до, саво́ сыс упра́л херувимонэнгирэ шэрэ́, сыс вари-со сы́рбы куч бар сапфиро, сы́рбы вари-со, сыр троно (престоло), со сыс упрэ́ лэ́ндыр.

² И ракирэ́лас Ёв манушэ́скэ, саво́ сыс уридо́ дро похтанытко урибэ́н, и пхэндя́: “Джа́ андрэ́ машки́р ро́ты тэл херувимы, лэ пхэрдэ́ васта́ хачкирдэ́ вангара и чхурдэ лэн пэ фо́ро.” Ёв гия́ андрэ́ пэ мирэ́ якха́.

³ Херувимы сыс тэрдэ́ пир чачи́ риг Кхэрэ́стыр, ко́ли загия́ одова́ ману́ш, и о́блоко пхэрдякирэлас грэ́да (дво́ро), сави́ сыс андра́л.

⁴ И ґаздыя́пэ Ра́скирэ-Дэвлэскри сла́ва херувимостыр и догия́ кэ Кхэрэ́скиро про́го, и Кхэр пхэрдякирдяпэ облокоса, и сыс дуд пэ грэ́да, сави́ зяинэлас Ра́скирэ-Дэвлэ́скирэ славатыр.

⁵ Шуныбэн херувимонэнгирэ пхакэндыр сыс шундло пэ грэ́да, сави́ сыс яври́, сы́рбы зан Сарэзорьякирэ-Дэвлэ́скири, ко́ли Ёв ракирэ́ла.

⁶ И сыс адя́кэ, ке́ли Ёв припхэндя́ манушэ́скэ, саво́ сыс уридо́ дро похтанытко урибэ́н, и пхэндя́: “Лэ яг машки́р ро́ты, машки́р херувимы”, и загия́ и сыс тэрдо́ пашы́л ро́ты.

⁷ Тэ́ньци протырдыя́ екх херувимо пэ́скиро васт кэ яг, сави́ сыс машки́р херувимы, и лыя́, и дыя́ манушэ́скэ, уридэскэ дро похтанытко урибэ́н. Ёв лыя́ и гия́ яври́.

⁸ И сыс дыкхно тэл херувимэнгирэ пхака́ дова́, со сыс сы́рбы манушэ́нгирэ васта́.

⁹ И мэ дыкхцём: акэ, штар ро́ты пашы́л херувимы, пир екх рота пашы́л кажно херувимо, и выдыкхэнас ро́ты, и зяинэнас сы́рбы кэрдэ́ кучонэ́ барэстыр топазостыр.

¹⁰ И выдыкхэнас сарэ́ штар сыр екх рота, сы́рбы екх рота чхуды́ дрэ яви́р рота.

¹¹ Ке́ли джа́нас ёнэ, то джа́нас пэ пэ́скирэ штар рига́, сыр ёнэ джа́нас, то ёнэ на обрисёнас долэ́стыр, карик ёнэ джа́нас, а ёнэ джа́на одори́к, карик дыкхэ́лас шэро́. Ёнэ джа́нас одори́к, а ке́ли джа́нас, то на обрисёнас.

¹² Сарэ́ лэ́нгирэ маса́, и лэнгро думо, и лэнгрэ васта́, и ро́ты сыс пхэрдэ́ якхэ́нца, сарэ́ лэнгрэ штар ро́ты.

¹³ Кэ долэ́ ро́ты, сыр мэ шундём, сыс пхэндло́ лав “галгал”.

¹⁴ Кажнонэ́стэ мурдалэ́ндэ (жывотнэндэ) сыс штар муя́. Пэ́рво муй сыс херувимоскиро муй, яви́р муй – Манушэ́скиро муй, три́то муй – шчэрэскиро (левоскиро), шта́рто муй орло́скиро (кидо́скиро).

¹⁵ Херувимы ґаздынэ́пэ. Кадалэ́ сыс одолэ́ сама мурдала́/джидалэ (жывотна), савэ́н мэ дыкхцём пашы́л рэка (лэнь) Ховар (Кебар).

¹⁶ Ке́ли джа́нас херувимы, тэды джа́нас пашы́л лэ́ндэ и ро́ты. Ке́ли херувимы ґаздэнас пэ́скирэ пхака́, соб (кай) тэ ґаздэ́нпэ пхувья́тыр, то ро́ты на отрисёнас лэ́ндыр.

¹⁷ Ке́ли херувимы сыс тэрдэ́, сыс тэрдэ́ и ро́ты; ке́ли херувимы ґаздэнаспэ, газдэнаспэ и ёнэ долэ́стыр, со дрэ лэ́ндэ сыс мурдалэнгиро (жывотнэнгиро) ду́хо (фа́но).

¹⁸ И отгия́ Ра́скирэ-Дэвлэ́скири сла́ва Кхэрэ́скирэ прого́стыр, и яця́ упрэ́ херувимэндыр.

¹⁹ И ґаздынэ́ херувимы пэ́скирэ пхака́ (крылы) и ґаздынэ́пэ пэ мирэ́ якха́ пхувья́тыр. Ке́ли ёнэ джа́нас, то и ро́ты сыс пашы́л лэ́ндэ, и ячнэ́ ёнэ пашо загиибэ́н дрэ васточно Ра́скирэ-Дэвлэ́скиро Кхэрэ́скиро вуда́р. И Израилёскирэ-Дэвлэ́скири сла́ва сыс упрэ́ лэ́ндыр.

²⁰ Кадава́ сыс одолэ́ мурдала́ (жывотна), конэ́с мэ дыкхцём тэл Израилёскирэ Дэвлэ́стэ пашы́л рэка (лэнь) Ховар. Мэ ґалыём, со кадалэ́ сыс херувимы.

²¹ Кажнонэ́стэ сыс штар муя́, и кажнонэ́стэ сыс штыр пхака́. А тэлэ́ пхака́ сыс колэ, савэ́ сыс сы́рбы манушэ́нгирэ васта́.

²² А дова́, со выдыкхэлас сы́рбы лэ́нгиро муй, сыс кадасаво́, сы́рбы муя́, савэ́ мэ дыкхцём пашы́л рэка (лэнь) Ховар. Кажно джа́лас маму́й дрэ одоя риг, кэ сави́ сыс анги́л лэ́скиро муй.