Езэкилё 1 - Библия - Пэ Балтитко Романи чиб (Романэс) 2019

Езэкилё Дыкхэ́ла Дэвлэ́скири Сла́ва

¹ И сыс: дро (дэшутрито) бэрш, дро шта́рто чхон пэ па́нджто чхонытко дывэ́с, ко́ли мэ со́мас машки́р одолэ́ндэ, конэ́с традынэ дро пле́но, пашы́л рэка (лэнь) Ховар – откэрдяпэ болыбэ́н, и мэ дыкхцём дыкхибэна Дэвлэ́стыр.

² Пэ па́нджто чхонытко дывэ́с дава́ сыс па́нджто бэрш, ке́ли залынэ дрэ наволя крали́с Иоакимос (Яхимос).

³ Сыс Ра́скирэ-Дэвлэ́скиро лав кэ Езэкилё, Вузияскирэ чхавэ́скэ, раша́скэ пэ Халдеенгири пхув, пашы́л рэка (лэнь) Ховар, и сыс пэ лэ́стэ одо́й Ра́скирэ-Дэвлэскро васт.

⁴ И мэ дыкхцём: акэ, рискирибнаскири балва́л джа́лас паш – ратятыр (северостыр), баро́ о́блоко, и яг ґаздэласпэ дрэ лэ́стэ, и дава́ зяинэласпэ пашы́л лэ́стэ.

⁵ А машки́р саро́ сыс сы́рбы дуд (свэ́то) ягатыр машкира́л: и машки́р лэ́стэ сыс дыкхнэ́ сы́рбы штар мурдала́ (жывотна), и адя́кэ ёнэ выдыкхэнас, а лэнгро муй сыс, сыр муй манушэ́стэ.

⁶ Кажнонэ́стэ сыс штар муя́, и кажнонэ́стэ лэ́ндыр сыс штар пхака́ (крылы).

⁷ Ѓэра́ лэнгрэ сыс роўна (ворта), а пирэ́/подэшвы (ступни) сыс сыр гуруворэстэ, и зяинэнэнаспэ, сыр жужакирды (чысто) харко́ма (медь).

⁸ А тэл лэ́нгирэ пхака́ сыс манушы́тка васта́ пир штар рига́, сарэ́ндэ штарэндэ сыс муя́ и пхака́.

⁹ Муя́ лэ́ндэ и васта́ лэ́ндэ – сарэ́ндэ штарэндэ притасавэнаспэ екх кэ яви́р: ко́ли ёнэ джа́нас, ёнэ на обрисёнас, а гинэ́, карик дыкхэ́лас лэ́нгиро муй.

¹⁰ Дова́, со зджа́ла пэ муй лэ́нгиро, кажно сыс дасаво сы́рбы манушэ́скиро муй и шчэрэскиро муй екх рига́тыр лэ́ндэ сарэ́ндэ. А явирэ рига́тыр сыс гуруворэскиро муй и орло́скиро (кидо́скиро) муй лэ́ндэ сарэ́ндэ.

¹¹ Муя́ и пхака́ лэ́нгирэ упрэ́ сыс роскэрдэ, нэ кажнонэ́стэ дуй пхака́ притасавэнаспэ екх кэ яви́р, а дуй пхака́ учхакирэнас лэ́нгирэ маса́.

¹² И джа́нас ёнэ, кажно дрэ доя́ риг, сави́ сыс анги́л лэ́скиро муй; карик камэлас тэ джал ду́хо (фа́но), одори́к ёнэ джа́нас, а ко́ли джа́нас, то на обрисёнас.

¹³ И выдыкхэнас далэ́ мурдала́, сыр хачкирдэ́ вангара, сыр момоля (свечки) дрэ кхангири́. Яг псирэлас машки́р лэ́ндэ, и дуд ягатыр, и блискавица выджа́лас ягатыр.

¹⁴ Мурдала́ сы́гэс псирэнас англэ и палэ, сыр блискавица.

¹⁵ Мэ дыкхцём пэ далэ́ мурдалэ́ндэ: акэ, пэ пхув, пашы́л лэ́ндэ сыс пиро́ екх рота анги́л штар лэ́нгирэ муя́.

¹⁶ Ро́ты выдыкхэнас, и сыс кэрдэ́ сыр куч бар топазо, сарэ́ штар выдыкхэнас, сыр екх, и сыкавэласпэ: сыр ёнэ выдыкхэнас, и сыр ёнэ сыс кэрдэ́, со исын рота андрэ́ дрэ яви́р рота.

¹⁷ Ёнэ джа́нас пэ пэ́скирэ штар рига́, нэ ко́ли ёнэ джа́нас, то на обрисёнас.

¹⁸ А лэ́нгирэ ободы ёнэ сыс вучэ́ и даранэ; сыс пхэрдэ́ якхэ́нца сарэ́ндэ штарэндэ.

¹⁹ И ко́ли джа́нас мурдала́, то джа́нас пашы́л лэ́ндэ ро́ты, а ко́ли мурдала́ ґаздэнаспэ пхувья́тыр, тэ́ньчи ґаздэнаспэ ро́ты.

²⁰ Карик камэлас ду́хо (фа́но) тэ джал, одори́к ёнэ джа́нас, и ёнэ карик бы тэ на джал ду́хо (фа́но), и ро́ты ґаздэнаспэ лэ́нца, пал-дова́ со мурдалэнгиро ду́хо сыс дрэ ро́ты.

²¹ Ко́ли джа́нас мурдала́ (жывотна), то джа́нас и ро́ты; ко́ли мурдала́ сыс тэрдэ́, сыс тэрдэ́ ро́ты, а ко́ли мурдала́ ґаздэнаспэ пхувья́тыр, тэ́ньчи ро́ты ґаздэнаспэ лэ́нца кхэтанэ́, пал-дова́ со мурдалэгиро ду́хо (фа́но) сыс дрэ ро́ты.

²² Упра́л мурдалэнгирэ шэрэ́ сыс сыр сво́до пэ болыбэ́н, саво́ выдыкхэлас, сыр дарано бар кристало. Ёв сыс ростырдыно упра́л лэ́нгирэ шэрэ́.

²³ А тэл сво́до пэ болыбэ́н сыс лэ́нгирэ пхака́, савэ́ обрисёнас маму́й екх кэ яви́р. Кажнонэ́стэ сыс дуй пхака́, савэ́ учхакирэнас лэн, кажнонэ́стэ дуй пхака́ учхакирэнас лэ́нгирэ маса́.

²⁴ И ко́ли ёнэ джа́нас, мэ шунавас, сыр шуминэнас лэ́нгирэ пхака́, кодова́ сыс сы́рбы бутэ́-панескиро шумо, сы́рбы зан Сарэзорьякирэскири, зорало́ шуминыбэн, сы́рбы шуминыбэн дро халадэ́нгиро скэдыибэ́н; а ко́ли ёнэ сыс тэрдэ́, то ёнэ змэкэнас пэ́скрэ пхака́.

²⁵ И сыс зан сводостыр пэ болыбэ́н, саво́ сыс упра́л лэ́нгирэ шэрэ́; ко́ли ёнэ сыс тэрдэ́, тэ́ньчи змэкэнас пэ́скирэ пхака́.

²⁶ А упрэ́ долэ́ сводостыр пэ болыбэ́н, саво́ сыс упра́л лэнгрэ шэрэ́, сыс сы́рбы троно, саво́ выдыкхэлас сы́рбы куч бар сапфиростыр, а упра́л пэ штэ́то сыс дова́, со сыс сы́рбы ману́ш пэ лэ́стэ.

²⁷ И мэ дыкхцём сы́рбы хачкирды харко́ма, сы́рбы яг, сави́ сыс дрэ лэ́стэ и пашы́л лэ́стэ, лэ́скирэ трушулэндыр, и лэ́скирэ трушулэндыр, и вучэды́р, и тэлэды́р дыкхцём мэ сы́рбы яг и зяиныбэн сыс пашы́л лэ́стэ.

Зан Бичхавэ́ла Езэкилёс кэ Бунтуитко Израилё

²⁸ Сыр выдыкхэла банги (радуга) пэ болыбэ́н дро брышындэскиро дывэ́с, адя́кэ выдыкхэлас дасаво зяиныбэн, саво́ сыс пашы́л лэ́стэ. Адя́кэ выдыкхэлас Ра́скирэ-Дэвлэ́скири сла́ва.