Е́здра 7 - Библия - Пэ Балтитко Романи чиб (Романэс) 2019

Е́здра Явэ́ла дро Ерусалимо

¹ Акана́, пало́ (после) вари-кицы́ бэрша́, сыр дава́ кэрдя́пэ, ке́ли кралиндя Артаксе́рксо, кра́ли Персиякиро, о Е́здра, чхаво́ Сэраияскиро, чхаво́ Азарияскиро, чхаво́ Хелкиякиро,

² чхаво́ Шалумоскиро, чхаво́ Садокоскиро, чхаво́ Ахитувоскиро,

³ чхаво́ Амарияскиро, чхаво́ Азарияскиро, чхаво́ Мараёфоскиро,

⁴ чхаво́ Захарияскиро, чхаво́ Узияскиро, чхаво́ Букиёскиро,

⁵ чхаво́ Абишуёскиро, чхаво́ Финехасоскиро, чхаво́ Елизароскиро, чхаво́ Ароноскиро, кон сыс барыдыр раша́й

⁶ дова́ са́мо Е́здра гия́ Вавилоно́стыр. Ёв сыс сыклякирдо сыр лылвари́тко пир Мойза́скиро Зако́но, саво́ Рай Дэвэ́л Израилёскиро дыя́. О кра́ли дыя́ саро́ лэ́скэ, со ёв мангдя́, пир дова́, со Ра́скирэ-Дэвлэ́скиро васт сыс пэ лэ́стэ.

⁷ И гинэ́ лэ́са вари-савэ́ чхавэ́ Израилёскирэ, и рашая́, и Леви́ты, и багаибнаскирэ, и стрэгарья паш-вударэнгирэ, и Нефине́и дро Ерусалимо дрэ эфта́то бэрш, сыр кралиндя Артаксе́рксо.

⁸ И о Е́здра явдя́ дро Ерусалимо дро па́нджто чхон, дро эфта́то (битринэ́нгиро дэш) бэрш крали́скиро.

⁹ Пал-дова́ со ёв дыяпэ дро дром Вавилоно́стыр пэ пэ́рво дывэ́с дро па́нджто чхон, и ёв явдя́ дро Ерусалимо пэ пэ́рво дывэ́с пэ пэ́рво чхон, пир дова́ со лачхо́ васт Дэвлэ́скиро сыс пэ лэ́стэ.

¹⁰ Пал-дова́ со о Е́здра рискирдя́ пэ́скиро ило́ тэ сыклёл Зако́но Дэвлэ́скиро, и тэ рикирэлпэ кэ Зако́но, тэ сыклякирэ́л дро Израилё.

¹¹ Дава́ исын копия лылэскири, саво́ дыя́ кра́ли Артаксе́рксо Ездраскэ, раша́скэ, кон сыс лылвари́тко, кон сыклякирдя́ лавэнгэ Ра́скирэ-Дэвлэ́скирэ припхэныбэндыр (запове́дендыр) и лэ́скирэ законэндыр дро Израилё:

О Артаксе́рксо Дэ́ла Лыл Ездраскэ

¹² “Артаксерксостыр, саво́ исын кра́ли кралье́ндыр, Ездраскэ раша́скэ, саво́ исын лылвари́тко пир Зако́но Дэвлэ́скирэ болыбна́скиро: рама́нё (миро) тумэ́нгэ акана́.

¹³ Мэ припхэнава, соб (кай) сарэ́ одолэ́, савэ́ исын мануша́ Израилёскирэ, и рашая́, и Леви́ты дро миро крали́тко тхэм, кон камэ́ла пир пэ́скири во́ля тэ джал дро Ерусалимо, -мэк ёнэ тэ джа́н ту́са.

¹⁴ И пал-дова́, со тут бичхавэ́ла кра́ли и лэ́скирэ эфта́ сове́тники (юнкары), соб (кай) тэ роспхучэн пал рэ́нды дрэ Юдэ́я и дро Ерусалимо пир тырэ́ Дэвлэ́скиро Зако́но, сави́ копия исын дро тыро́ васт;

¹⁵ и соб (кай) тэ янэс руп и сувнака́й, савэ́ о кра́ли и лэ́скирэ юнкары дынэ́ пэ́скирэ илэ́стыр Дэвлэ́скэ Израилёскирэскэ, Савэскиро кхэр исын кэ Ерусалимо;

¹⁶ и саро́ руп, и сувнака́й, со тумэ́ могинэ́на тэ латхэ́н дрэ округа Вавилоноскири, на гины́ свэ́нта дыибэна́, савэ́ дынэ́ пэ́скирэ илэ́стыр э мануша́, и рашая́, кон янэ́ла пэ́скирэ илэ́стыр ваш Кхэр (Кхангири́) лэ́нгирэ Дэвлэ́скиро кэ Ерусалимо,

¹⁷ акана́ палдава́ кин сы́гэс пэ далэ́ ловэ́ гурувэ́н, бакрэ́н и бакрорэ́н кхэтанэ́ лэ́нгирэ свэнтонэ́ дыибнаса гивэстыр и лэ́нгирэ тхадунэ свэнтонэ́ дыибнаса, и ян лэн пэ алта́рё дро Кхэр (Кхангири́) тумарэ́ Дэвлэ́скиро кэ Ерусалимо.

¹⁸ И со явэ́ла лачхэ́с пир тыри́ годы́ и тырэ́-пшалэскири тэ кэрэ́н одолэ́ рупэ́са и сувнака́са, со ячэ́лапэ, кэрэ́н пир во́ля тумарэ́ Дэвлэ́скири.

¹⁹ И кхорэ́ (сасу́ды), со дынэ́ ту́кэ, соб (кай) лэ́нца тэ дынаринэ́н дро Кхэр (Кхангири́) Дэвлэ́скиро, ян анги́л Дэвлэ́стэ Ерусалимоскирэстэ.

²⁰ И дова́ яви́р, со явэ́ла трэй ваш Кхэр (Кхангири́) тырэ́ Дэвлэ́скиро, и со ту янэса пир Пэ́скири годы́, отдэ́/плэскир пиралятыр дро кхэр Крали́скиро.

²¹ И мэ, кра́ли Артаксе́рксо, акана́ дава́ припхэныбэ́н сарэ́ ракхибнаскирэнгэ пэ пиралы́, савэ́ исын палэ рэка (лэнь), со ко́ли Ездраскэ, кон исын раша́й и лылвари́тко пир Зако́но Дэвлэ́скиро, Саво́ исын пэ болыбэ́н, явэ́ла вари-со трэй, соб (кай) тэ дэн лэ́скэ саро́,

²² кэ екх шэл тала́нты руп, кэ екх шэл ме́ры парно́ гив кэ екх шэл баты мол (вино), кэ екх шэл баты оливи́тко дзэт, и лонд би меракиро.

²³ Со тэ на припхэнэл Дэвэ́л болыбна́скиро, соб (кай) тэ кэрэ́н сыр трэй ваш Кхэр (Кхангири́) Дэвлэ́скиро, Саво́ исын пэ болыбэ́н. Ваш одова́, соб (кай) тэ на явэ́л Лэ́скири бари холы́ пэ крали́скири тхэм, и лэ́скирэ чхавэ́ндэ.

²⁴ Адя́кэ-паць амэ пхэна́са тумэ́нгэ, со дава́ явэ́ла на пир зако́но тэ зачхувэн тэ плэскирэн намирья, мыто и такса раша́н, Левитэ́н, багаибнаскирэн, стрэгарье́н пашвударэнгирэн, Нефинее́н, ци вари-савэ́ дынарье́н дро Кхэр (Кхангири́) Дэвлэ́скиро.

²⁵ И ту, Е́здра, пир годыпэ́н, со Дэвэ́л дыя́ ту́кэ, чхув дрэ зор барыдырэ́н [барэ́ сэндарье́н-ю.о.], сэндарье́н, савэ́ могинэ́нас тэ сэндякирэн пир чачипэ́н сарэ́ манушэ́н, кон исын дрэ округа палэ рэка (лэнь), сарэ́н кадасавэн, кон джинэ́ла зако́ны тумарэ́ Дэвлэ́скирэ, и сыклякирэ́н одолэ́н, савэ́ на джинэ́на лэн.

²⁶ Ко́ли вари-кон на явэ́ла тэ кэрэ́л саро́ пир Зако́но тумарэ́ Дэвлэ́скиро, и пир зако́но крали́скиро, мэк тэ сэндякирэн пхарэ́с лэс, ци пэ мэрибэ́н, ци тэ традэ́н лэс яври́ тхэмэстыр (странатыр), ци пэ конфискацыя маёнкоскэ, ци дро штарибэ́н.”

Е́здра Барьякирэ́ла Дэвлэ́с

²⁷ “Мэк тэ явэ́л бахтякирдо́ Рай Дэвэ́л, Дэвэ́л амарэ́-дадэ́нгиро, Саво́ чхудя́ кадасави дума дро крали́скиро ило́, соб (кай) тэ шукарьякирэн Кхэр (Кхангири́) Ра́скирэ-Дэвлэ́скиро, саво́ исын кэ Ерусалимо;

²⁸ И Саво́ рискирдя́ лачхэ́-илы́ткима кэ мэ анги́л крали́стэ и лэ́скирэ советникэндэ (юнкарэндэ), и анги́л зор тхагарье́ндэ крали́скирэ. И мэ, Е́здра, яцём зоралэды́р дро ду́хо (фа́но), адя́кэ сыр васт Ра́скирэ-Дэвлэ́скиро, мирэ́ Дэвлэ́скиро сыс пэ ма́ндэ, и мэ скэдыём сарэ́ Израилёскирэ шэралэ́ муршэ́н, соб (кай) ёнэ тэ джа́н ма́нца.”