Е́здра 4 - Библия - Пэ Балтитко Романи чиб (Романэс) 2019

Намала на Дэ́на тэ Кэрэ́н Кхэр (Кхангири́) Ра́скэ-Дэвлэ́скэ

¹ И шундлэ́ намала Юда́скирэ и Веньяминоскирэ, со кодолэнгирэ чхавэ́, кон сыс дро пле́но, кэрэ́нас Кхэр (Кхангири́) Ра́скирэ-Дэвлэ́скиро , Дэвлэ́скирэ-Израилёскиро,

² ёнэ явнэ́ кэ Зоровавелё, и кэ шэралэ́ пэ стрэ́чы/дадэнги́рэ-родэнгирэ (поколе́нии) и пхэндлэ́ лэ́нгэ: “Ла́са амэ тэ кэра́с кхэр кхэтанэ́, пал-дова́ со амэ родасас тэ дас паты́в тумарэ́ Дэвлэ́скэ, сыр и тумэ́, и амэ янасас свэ́нта дыибэна́ Лэ́скэ Асарданоскирэ дывэсэ́ндыр, крали́стыр Сириякирэстыр, саво́ яндя́ амэн адари́к.”

³ Нэ Зоровавелё и Ёхошуа́, и яви́р шэралэ́ пэ стрэ́чы /дадэнги́рэ-родэнгирэ (поколении) Израилёскирэ, пхэндлэ́ лэ́нгэ: “Тумэ́нгэ нанэ причына, соб (кай) амэ́нца кхэтанэ́ тэ кэра́с Кхэр (Кхангири́) ваш амарэ́ Дэвлэ́скэ, нэ амэ кокорэ́ явэ́са тэ кэра́с кхэр, Ра́скэ-Дэвлэ́скэ, Израилёскирэ Дэвлэ́скэ, сыр кра́ли Кира, кра́ли Персиякиро, припхэндя́ амэ́нгэ.”

⁴ И мануша́ долэ́ пхувья́кири стариндлэпэ тэ отлэн зор манушэ́нгирэ вастэ́ндыр Юдэя́тыр и ёнэ на дэ́нас лэ́нгэ тэ кэрэ́н Кхэр (Кхангири́);

⁵ и ёнэ кинэнас советникэн (юнкарэн) проти лэ́ндэ, соб (кай) тэ розмарэн лэ́нгэ лэ́нгиро плано дрэ сарэ́ Кираскирэ дывэса́ Персиякирэ крали́скирэ аж кэ Дариёскирэ дывэса́, сыр ёв лыя́ тэ раинэл пэ Пе́рсия.

Намала Тэрдякирэна Буты́

⁶ И дро кралипэ́н Ахашверошоскиро, пэ са́мо англыпэ́н лэ́скирэ раипнастыр, ёнэ чхиндлэ́ бангякирибнаскиро лыл пэ манушэ́ндэ Юдэя́тыр и Ерусалимо́стыр.

⁷ И дрэ Артаксерксоскирэ дывэса́ чхиндлэ́ о Бишламо, о Мифредато, о Табее́ло, и яви́р лэ́скирэ мала́ пир буты́ лыл Артаксерксоскэ, крали́скэ Персиякирэскэ, и лыл сыс чхиндло́ пэ Сирийцытко (Арамеи́тко) чиб, и пирилыджино пэ Сирийцытко (Арамеи́тко) чиб.

⁸ О Рехумо, крали́скиро советнико (юнкаро) [шэрало́-ю.о.], и о Шымшаё, лыла́-чхиныбнаскиро (писарё) ману́ш чхиндлэ́ лыл пэ Ерусалимо, крали́скэ Артаксерксоскэ, дро саво́ ёнэ бангякирдэ:

⁹ Рехумостыр, крали́скирэ шэралэстыр, и Шымшаёстыр, саво́ сыс лыла́-чхиныбнаскиро ману́ш (писарёстыр), и явирэ лэ́нгирэ малэндыр пир буты́: э Динэи, и э Афарсафхе́и, и э Тарпелеи, и э Апарсы, и э Арехьяни, э Вавилоняни, э Сусанцы, э Даги, э Еламитяни;

¹⁰ и явирэ манушэ́ндыр, савэ́н баро́ и лачхэ́-родоскиро Аснафаро яндя́ и чхудя́ тэ дживэ́н дрэ фо́рья Самариякирэ и пэ яви́р штэ́ты дрэ провинцыя палэ рэка (лэнь) Ефрато, и адя́кэ дурэды́р.”

¹¹ Акэ, исын лылэскири копия, со ёнэ бичхадэ́ лэ́скэ: “Э Крали́скэ Артаксерксоскэ – тырэ́ писхарье́ндыр, манушэ́ндыр, савэ́ дживэ́на дро дая́ провинцыя палэ рэка (лэнь), и адя́кэ дурэды́р:

¹² Мэк тэ явэ́л джиндло́ крали́скэ, со Юды, савэ́ явнэ́ ту́тыр кэ амэ дро Ерусалимо, и савэ́ кэрэ́на кадава́ бунтуи́тко и бибахтало́ фо́ро, и докончынэна лэ́скирэ ва́нты и пирикирэна фунда́менто.

¹³ Мэк тэ явэ́л джиндло́ крали́скэ, пал-дова́ со, ко́ли дава́ фо́ро тэ явэ́л кэрдо́ нэвэ́с и тэ кончынэн лэ́скирэ ва́нты, то тэды ёнэ на явэ́на тэ плэскирэн ни намирья (подать), ни мыто, ни такса, и крали́скири пиралы́ явэ́ла тыкнякирды.

¹⁴ Акана́, пир-дова́ со амэ хаса лонд крали́скирэ барэ́ фэлатинятыр/коловостыр (дворцостыр), то дава́ явэ́ла намиштэс, ко́ли амэ дыкхаса, со исын уре́жа ваш крали́скэ, палдава́ амэ бичхадям и дыям зан (звесь) крали́скэ;

¹⁵ соб (кай) тэ розродэн дрэ трэ-дадэнги́рэ зачхиныбнытко лылвари́: соб (кай) тэ латхэ́н дрэ зачхиныбнытко лылвари́ и тэ уджинэс, со дава́ фо́ро исын бунтуи́тко, саво́ кэрдя́ дош кралье́нгэ и провинцые́нгэ, и со ёнэ тэрдёнас проти кралье́ндэ ишчо (инкэ́) дрэ ґаратунэ́ бэрша́, пир дова́ дава́ фо́ро сыс пхагирдо́ кэ руи́ны.

¹⁶ Амэ даса зан крали́скэ, со ко́ли явэ́ла дава́ фо́ро нэвэ́с кэрдо́, и лэ́скирэ ва́нты тэ закончынэн, тэды дова́ значынэлас, со на явэ́ла буты́р паш пхувья́кири пэ дая́ риг рэкакири (лэнякири).”

¹⁷ О кра́ли бичхадя́ отпхэныбэ́н Рехумоскэ, крали́скирэ шэралэскэ и Шымшаёскэ, лыла́-чхиныбнаскирэскэ, и явирэ лэ́нгирэ малэнгэ пир буты́, кон дживэ́ла кэ Сама́рия, и пэ яви́р штэ́ты, со исын палэ рэка (лэнь):

¹⁸ “Рама́нё пэ сарэ́ ве́ки. Лыл, саво́ бичхадэ́ тумэ́ амэ́нгэ, гиндлэ́ саро, лав пир лав, анги́л ма́ндэ.

¹⁹ И мэ дыём припхэныбэ́н, и кэрдэ́ родыибэн, и латхнэ́, со дро дова́ фо́ро ґаратунэ́ бэршэ́ндыр мануша́ тэрдёнас проти кралье́ндэ, ґаздэнас бунты и холы́ дрэ манушэ́ндэ.

²⁰ И одо́й сыс адя́кэ-паць кра́лья дрэ зор пэ Ерусалимо, савэ́ хулаиндлэ пир сарэ́ провинцыи пал Рэка, и мыто, и намирья, и такса плэскирдэ лэ́нгэ.

²¹ Акана́ припхэнэн манушэ́нгэ тэ пириячэн тэ кэрэ́н буты́, соб (кай) ёнэ тэ на докэрэн дова́ фо́ро анги́л дова́, сыр явэ́ла припхэныбэ́н ма́ндыр.

²² Дыкхэ́н ракхибны́ткэс, соб (кай) тэ на дэнпэ дукха́, со́скэ бибахтякэ тэ явэ́л бутэды́р тэ кэрэ́л дош крали́скэ?”

²³ И, акэ, ке́ли лылэскири копия, саво́ чхиндя́ Артаксе́рксо, прогиндлэ анги́л Рехумостэ, Шымшаёстэ, лыла́-чхиныбнаскирэстэ, и анги́л лэ́нгирэ малэндэ пир буты́, ёнэ гинэ́ сы́гэс кэ Ерусалимо проти Юдэ́ндэ, и зоралэ́ марибнытконэ́ вастэ́са тэрдякирдэ лэ́нгири буты́.

²⁴ Адя́кэ тэрдия́ буты́ дро Кхэр (Кхангири́) Дэвлэ́скиро, Саво́ исын дро Ерусалимо и дая́ буты́ сыс тэрды кэ яви́р бэрш, сыр лыя́ тэ кралинэ́л Дариё, кра́ли Персиякиро.”