Е́здра 10 - Библия - Пэ Балтитко Романи чиб (Романэс) 2019

Э Юды Плено́стыр Приджиндлэ Напатяибнытко Ромипэн

¹ Акана́, сыр о Е́здра мангэласпэ Дэвлэ́скэ, и сыр Ёв приджинэлас лэ́нгирэ грэ́хи, рови́ и пэри шэрэ́са анги́л Кхэр (Кхангири́) Дэвлэ́скиро древа́н бут мануша́ скэдынэ́пэ: мурша́, джувля́ и бияты Израилёскирэ, ёнэ тэрдинэ́ екх пашы́л екхэ́стэ, ёнэ адя́кэ-паць рондлэ́ киркэс.

² И о Шэхания, екх чхаво́ Иехиилоскиро, Еламоскирэ чхавэ́ндыр, отпхэнэ́лас, и пхэндя́ Ездраскэ: “Амэ кэрдя́м чорипэ́н анги́л амарэ́ Дэвлэ́стэ, и амэ лыям джувле́н пэ́скэ Наюдытконэ́ нацые́ндыр, савэ́ сыс чужонэ́-манушытконэ́ нацые́ндыр, нэ акана́ усае́кх исын наде́я ваш Израилё дро дава́ рэ́ндо.”

³ И акана́ счхуваса Заве́то амарэ́ Дэвлэ́са, соб (кай) тэ мэкэ́н криг сарэ́ джувле́н, и кодолэ́н, кон бия́ндыя лэ́ндыр пир лав амарэ́ Дэвлэ́скиро и пир одолэнгирэ лава́, савэ́ дарэ́на амарэ́ Дэвлэ́скирэ припхэныбнэндыр, и мэк тэ явэ́л кэрдо́ пир зако́но.

⁴ Тэрдёв пэ ґэра́! Пал-дова́ со кадава́ рэ́ндо исын дрэ тырэ́ васта́: амэ адя́кэ-паць ява́са ту́са. Рикирпэ муршканэ́с и кэр дава́.”

⁵ Тэ́ньци тэрдия́ пэ ґэра́ Е́здра и зачхудя шэралэн пэ рашандэ, пэ Левитэндэ, и пэ саро́ Израилё тэ дэн совла́х, со ёнэ кэрэ́на пир дава́ лав.

⁶ И ёнэ дынэ́ совла́х. И тэрдия́ пэ ґэра́ Е́здра анги́л Кхэр (Кхангири́) Дэвлэ́скиро, и гия́ дро кхэр Иохананоскиро, кон сыс Елияшывоскиро чхаво́. И ке́ли ёв сыс одо́й, ёв на хая, и на пия, пал-дова́ со ёв тугиндя ясвэ́нца пал одолэнгири банг, савэ́ сыс дро пле́но.

⁷ И пхэндлэ́ ёнэ дая́ звесь (зан) зоралэ́с анги́л манушэ́ндэ дрэ Юдэ́я, и дро Ерусалимо сарэ́нгэ, кон сыс дро пле́но, соб (кай) ёнэ тэ кэдэнпэ дро Ерусалимо,

⁸ и со, ко́ли вари-кон на явэ́ла пир трин дывэса́, то, соб (кай) саро́ лэ́скиро миштыпэ́н тэ явэ́л конфисковиндло пир лав тхагарье́ндыр и пхурыдырэндыр, а кхэтаныпэн манушэ́нгиро, кон сыс дро пле́но, тэ чхувэ́л лэс яври́.

⁹ И кэдэнапэ сарэ́ мануша́ Юдэя́тыр и Веньяминоскирэ пхувья́тыр пал трин дывэса́. Дава́ сыс дро еня́то чхон, пэ бишэнгиро дывэ́с дро дова́ чхон, и сарэ́ мануша́ сыс бэштэ́ яври́ пэ форуны́ (пло́шча) анги́л Кхэр (Кхангири), Дэвлэ́скиро, издраиндой далэ́ бангипнастыр и барэ́ брышындэстыр.

¹⁰ И Е́здра, о раша́й, уштыя́ и пхэндя́ лэ́нгэ: “Тумэ́ кэрдэ́ напатяибныткэс и тумэ́ лынэ́ пэ́скэ джувле́н явирэ-тхэмэ́скирэ нацые́ндыр, и далэ́са тумэ́ кэрдэ́ барэды́р банг Израилёскири.

¹¹ И акана́ приджинэнпэ анги́л Растэ-Дэвлэ́стэ тумарэ́-дадэнги́рэ, и кэрэ́н пир Лэ́скири во́ля. Дурьякирэн пэс явирэ-манушытконэ́ нацые́ндыр и явирэ-тхэмэ́скирэ джувле́ндыр.”

¹² И отпхэндя́ саро́ лэ́нгиро скэдыибэ́н зоралэ́ заня́са: “Чачо́! Амэ сом бангэ́ тэ кэра́с, сыр ту пхэндям.

¹³ Нэ исын ада́кицы бут мануша́; и, ґа́да, исын часо (цы́ро) тэ дэл зорало́ брышы́нд, и дава́ нашты́ тэ тэрдён яври́. Апри́ч дава́, дава́ рэ́ндо на кэрэ́лапэ пал екх ци дуй дывэса́, пал-дова́ со амэ сам ада́кицы бут мануша́, савэ́ кэрдэ́ чорипэ́н пир дава́ рэ́ндо.

¹⁴ Мэк акана́ амарэ́ барыдыра́ тэ тэрдён пал сарэ́ндэ, и мэк одолэ́ сарэ́, кон лыя́ явирэ-тхэмэ́скирэ джувле́н пир амарэ́ фо́рья, тэ явэ́н кэ упхэндло́ часо, и тэ явэ́н лэ́нца пхурыдыра́ кажнонэ́ форо́стыр, и тэ явэ́н адя́кэ-паць сэнда́рья пэ ада́кицы бут анги́л дова́, сыр бари холы́ амарэ́ Дэвлэ́скири тэ рисёл амэ́ндыр пал дава́ рэ́ндо.”

¹⁵ Фэ́ни (то́ка) о Ионафа́но, чхаво́ Асаилоскиро, и о Яхзэия, чхаво́ Фихваскиро, тэрдинэ́ проти дава́, и о Мешуламо, и о Левито Шамфаё [Шабетаё-ю.о.], подрикирдэ лэн.

¹⁶ И одолэ́, кон явдя́ плено́стыр, кэрдэ́ адя́кэ. И о Е́здра, раша́й, кхэтанэ́ шэралэнца пэ стрэ́чы /лэ́нгирэ-дадэнги́рэ ро́ды (поколении), савэ́ сыс выкэдынэ́ пир дадэнги́рэ ро́ды (стрэ́чы), кажно сыс кхардо пир лав. Пэ пэ́рво дывэ́с дро дэ́што чхон бэшнэ́ ёнэ тэ выпхучэн е́кх явирэстыр пал дава́ рэ́ндо.

¹⁷ И пэ пэ́рво дывэ́с дро пэ́рво чхон ёнэ кончындлэ тэ пхучэнпэ манушэ́ндыр, кон лыя́ пэ́скирэ джувле́н явирэ-манушытконэ́ нацые́ндыр.

Наюдытконэ́-Нацые́гирэ Джувле́н Мэкнэ́

¹⁸ И латхнэ́ машки́р раша́нгирэ чхавэ́ндэ кодолэ́н, савэ́ лынэ́ джувле́н Наюдытконэ́ нацые́ндыр: Исусо́скирэ (Ёхошуаскирэ) чхавэ́ндыр, кон сыс Иоседэкоскиро чхаво́, и лэ́скирэ пшалэ́ндыр: Маасе́я, Елиезэро, Яриво и Гедалия.

¹⁹ И ёнэ дынэ́ васта́ сыр совла́х, со бичхавэна криг лэ́нгирэ джувле́н, и со ёнэ янэ́на бакрэ́с стадатыр сыр лэ́нгиро свэ́нто дыибэ́н пал чорэ́ рэ́нды.

²⁰ И Имэроскирэ чхавэ́ндыр: Хананиё и Зевадия;

²¹ И Харимоскирэ чхавэ́ндыр: Маасея, Елия, Шэмаия, Иехиило, и Узия;

²² Пашхуроскирэ чхавэ́ндыр: Елиоэнаё, Маасе́я, Исмаило, Нафанаило, Иозавадо и Эласа.

²³ И Левитэндыр: Иозавадо, Шыме́ё, Келаия (ёв адя́кэ-паць сыс Клита); Пафахия, Юда, и Елиезэро.

²⁴ И багаибнаскирэндыр: Елияшыво. И паш-вударэнгирэ стрэгарье́ндыр: Шалумо, и Теле́мо, и Уриё.

²⁵ И яви́р Израилёскирэндыр: Парошоскирэ чхавэ́ндыр: Рамаия, и Изия, и Малхия, и Миямино, и Елиза́ро (Елеазаро), и Малхия, и Венаия.

²⁶ И Еламоскирэ чхавэ́ндыр: Матфания, Заха́рия, Иехиэлё, и Авдиё, и Еремофо, и Елия.

²⁷ И Зафускирэ чхавэ́ндыр: Елиоэнаё, Елияшыво, Матфания, и Иремофо, и Завадо, и Азиза.

²⁸ И Беваёскирэ чхавэ́ндыр: Иохонано, Ханания, Забваё, и Афлаё.

²⁹ И Ваниёскирэ чхавэ́ндыр: Мешуламо, Малухо, Адая, Яшуво, Шэало, и Иерамофо.

³⁰ И Пахаф-Моавоскирэ чхавэ́ндыр: Адна, Хелало, Венаия, Маасе́я, Матфания, Веселеило, Бинуё, и Мана́сия.

³¹ И Харимоскирэ чхавэ́ндыр: Елиезэро, Ишыя, Малхия, Шэмаия, Симеоно (Семёно),

³² Вениамино, Малухо, Шэмария.

³³ И Хашумоскирэ чхавэ́ндыр: Мафнаё, Мафафа, Завадо, Елифеле́то, Еремаё, Мана́сия, и Шыме́ё.

³⁴ Ваниёскирэ чхавэ́ндыр: Маадаё;

³⁵ Бенаия, Бидья, Келуги;

³⁶ Ванея, Меремофо, Елиашыво,

³⁷ Матфания, Мафнаё, Ясаё, –

³⁸ Ваниё, Бинуё, Шыме́ё;

³⁹ Шэлэмия, Нафано, Адаия;

⁴⁰ Махнадбаё, Шашаё;

⁴¹ Азариэлё, Шэлэмиягу, Шэмария;

⁴² Шалумо, Амария, и Ёза (Иосифо);

⁴³ И Невоскирэ чхавэ́ндыр: Иеилё, Матфия, Завадо, Зевина, Иаедаё, Иоэлё, и Бенаия.

⁴⁴ Сарэ́ кадалэ́ лынэ́ пэ́скэ джувле́н явирэ-тхэмэ́скирэ нацые́ндыр, и сыс машки́р лэ́ндэ джувля́, савэ́ндэ сыс бияты (чхаворэ́).