Ester 6 - Библия - Пэ Балтитко Романи чиб (Романэс) 2019

О Кра́ли Кэрэ́ла Паты́в Мардохеёскэ

¹ Дрэ доя́ рат крали́скэ на совэласпэ, и ёв пхэндя́ тэ янэ́н дывэсэнгирэ-зачхиныбнаскири лылвари́ ваш рипирибэ́н; и гиндлэ́ ла анги́л крали́стэ.

² И латхно сыс, со сыс чхиндло́ одо́й, сыр допхэндя Мардохе́ё пэ Гавафостэ (Бигтэностэ) и Фарастэ (Тэрэшостэ), дуе́ндэ крали́скирэ евнухэндэ, савэ́ ракхнэ прого, савэ́ задуминдлэ тэ чхувэ́н васт пэ крали́стэ Артаксерксостэ.

³ И пхэндя́ кра́ли: “Сави́ дынэ́ паты́в и сла́ва Мардохеёскэ пал дава́?” И пхэндлэ́ тэрнэ́ мануша́ крали́скирэ, савэ́ сыс бутярнэ́ пашы́л лэ́стэ: “Нисо́ на сыс кэрдо́ лэ́скэ.”

⁴ И пхэндя́ кра́ли: “Кон исын пэ грэ́да (дво́ро)?” Ама́но тэды явдя́ пэ андратунэ́ крали́скирэ-кхэрэ́скири грэ́да тэ ракирэ́л крали́са, соб (кай) тэ ублавэн Мардохеёс пэ вэшына, саво́ ёв приготовиндя ваш лэ́скэ.

⁵ И пхэндлэ́ тэрнэ́ мануша́ крали́скэ: “Ѓа́да, Ама́но исын тэрдо́ пэ грэ́да.” И пхэндя́ кра́ли: “Мэк ёв тэ заджа́л.”

⁶ И загия́ Ама́но. И пхэндя́ лэ́скэ кра́ли: “Со трэй тэ кэрэ́н одолэ́ манушэ́скэ, савэ́с кра́ли древа́н камэ́ла тэ патывакирэс слава́са?” Ама́но подуминдя дрэ пэ́скиро ило́: “Конэ́скэ ж явирэскэ закамэ́ла кра́ли тэ кэрэ́л сла́ва, апри́ч ма́ндэ?”

⁷ И пхэндя́ Ама́но крали́скэ: “Кодолэ́скэ манушэ́скэ, савэ́с кра́ли камэл тэ патывакирэл слава́са,

⁸ мэк лэ́скэ тэ янэ́н крали́скири и́дя, дрэ сави́ урьелапэ кра́ли, и янэ́на грэс, пэ савэ́стэ традэ́ла кра́ли, тэ чхувэ́н крали́скири коро́на пэ грэскиро шэро́,

⁹ и мэк тэ подэн и́дя и грэс дрэ васта́ екхэ англатунэ́-крали́скирэ тхагарье́ндыр, и урьена одолэ́с манушэ́с, савэ́с кра́ли камэ́ла тэ патывакирэл слава́са, и вылыджан лэс пэ грэстэ пэ форитко га́сы [пэфоруны́ (пло́шча)-р.с.], и пхэнэ́на анги́л лэ́стэ: адя́кэ кэрэ́на кодолэ́ манушэ́скэ, савэ́с кра́ли камэ́ла тэ патывакирэл слава́са!”

¹⁰ И пхэндя́ кра́ли Аманоскэ: “Дро дава́-паць моме́нто лэ и́дя и грэс, сыр ту пхэндя́н, и кэр дава́ Мардохеёскэ Юдоскэ, саво́ исын бэшто́ пашы́л крали́скирэ вудара́; нисо́ на промэк сарэ́стыр, со ту ракирдян.”

¹¹ И лыя́ Ама́но и́дя и грэс, и уридя Мардохеёс, и вылыджия́ лэс пэ форитко маркплацо (форуны́/пло́шча), и пхэндя́ анги́л лэ́стэ: “Адя́кэ кэрэ́на одолэ́ манушэ́скэ, савэ́с кра́ли камэ́ла тэ патывакирэл слава́са!”

¹² И рисия́ Мардохе́ё кэ крали́скирэ вудара́. Ама́но сыгэды́р гия́ дрэ пэ́скиро кхэр, смэнтно и зачхакирдя шэро́.

¹³ И пирипхэндя Ама́но Зэрэшакэ, пэ́скирэ ромнякэ, и сарэ́нгэ пэ́скирэ малэнгэ, со кэрдя́пэ лэ́са. И пхэндлэ́ лэ́скэ лэ́скирэ годэ́ мануша́ и лэ́скири ромны́ Зэрэш: “Ко́ли Мардохе́ё исын Юдэ́нгирэ родо́стыр, пир савэ́стэ ту лыян тэ пэрэс, тэды ту на пиризорьякирэса лэс, а сыгэды́р пэрэса анги́л лэ́стэ.”

¹⁴ Ёнэ ишчо (инкэ́) ракирдэ́ лэ́са, сыр явнэ́ крали́скирэ е́внухи, и лынэ́ тэ сыгнякирэн Аманос тэ джал пэ свэ́нко, саво́ кэрдя́ Эстэ́ра.