Ester 3 - Библия - Пэ Балтитко Романи чиб (Романэс) 2019

Ама́но Придуминдя тэ Мулякирэ́н Юдэ́н

¹ Пало́ (после) дава́ Артаксе́рксо кра́ли дыя́ баро́ право Аманоскэ, Амадафоскирэ чхавэ́скэ, Вугеяниноскэ, и ґаздыя́ лэс, и чхудя́ лэ́скиро штэ́то, кай ёв сыс бэшто́, вучэды́р сарэ́ндыр тхагарье́ндыр, савэ́ сыс лэ́стэ.

² И сарэ́, кон дынариндя́ пашы́л крали́стэ, савэ́ сыс пашы́л крали́скирэ вудара́, клониндэпэ и пынэ́ мо́са пэ пхув анги́л Аманостэ; пал-дова́ со адя́кэ припхэндя́ кра́ли. А Мардохе́ё на клониндяпэ и на пыя́ мо́са пэ пхув.

³ И ракирдэ́ мануша́, савэ́ дынариндлэ́ пашы́л крали́стэ, савэ́ сыс пашы́л крали́скирэ вудара́ Мардохеёскэ: “Со́скэ ту пхагирэса крали́скиро упхэныбэ́н?”

⁴ И сыр ёнэ лэ́скэ ракирдэ́ кажно дывэ́с, а ёв на кандыя́ лэн, тэды ёнэ роспхэндлэ́ Аманоскэ, соб (кай) тэ дыкхэ́н, ци вытэрдёла дрэ пэ́скиро лав Мардохе́ё, пал-дова́ со ёв пхэндя́ лэ́нгэ, со ёв сыс Юдо.

⁵ И ке́ли дыкхця́ Ама́но, со Мардохе́ё на клонинэласпэ, и на пэрэлас мо́са пэ пхув анги́л лэ́стэ, тэды пхэрдия холя́са Ама́но.

⁶ И сыкадыя́ лэ́скэ, со нисо́ на мол тэ чхувэ́л васт пэ екхэ́стэ Мардохеёстэ; нэ адя́кэ, сыр пхэндлэ́ лэ́скэ, савэ́ндыр манушэ́ндыр Мардохе́ё, тэды задуминдя Ама́но тэ мулякирэ́н Юдэ́н, савэ́ сыс дрэ саро́ Артаксерксоскиро кралипэ́н, сыр Мардохеёскирэ манушэ́н.

⁷ Дро пэ́рво чхон, саво́ исын чхон Нисано, дрэ дэшуявир бэрш крали́скиро Артаксерксоскиро чхурдынэ́ жре́биё, анги́л Аманоскиро муй дывэ́с дро дывэ́с и чхонэстыр дро чхон, и пыя́ жре́биё пэ дэшуявир чхон, пэ чхон Адаро.

⁸ И пхэндя́ Ама́но Артаксерксоскэ, крали́скэ: ‘Исын екх мануша́, савэ́ росчхурдынэ и выбичхадэ машки́р манушэ́ндэ пир сарэ́ тырэ́-крали́скирэ провинцыи; и лэ́нгирэ зако́ны на зджанапэ сарэ́ манушытконэ́ законэнца, и крали́скирэ зако́ны ёнэ на сполнинэна; и крали́скэ нашты́ адя́кэ тэ ячкирэс лэн.

⁹ Ко́ли крали́скэ явэ́ла пир ило́, тэды мэк тэ явэ́л зачхиндло́ сыр припхэныбэ́н тэ мулякирэ́н лэн; и дэш бара́ тала́нты руп мэ плэскирава дрэ манушэ́нгирэ васта́, кон кэрдя́ дая́ буты́, соб (кай) тэ лыджа́н дрэ крали́скири пиралы́ (казна).’

¹⁰ Тэды кра́ли злыя́ пэ́скири ангрусты чэргэнорьяса пэ́скирэ вастэ́стыр и отдыя́ ла Аманоскэ, Амадафоскирэ чхавэ́скэ, Вугеяниноскэ, саво́ сыс вэ́рго Юдэ́нгэ.

¹¹ И пхэндя́ кра́ли Аманоскэ: “Мэ да́ва ту́кэ дава́ руп и манушэ́н; и кэр лэ́нца адя́кэ, сыр ту́кэ здэлапэ.”

¹² И сыс кхардэ́ крали́скирэ лыла́-чхиныбнаскирэ дро пэ́рво чхон, пэ лэ́скиро дэшутрито дывэ́с, и сыс чхиндло́, сыр пхэндя́ Ама́но, крали́скирэ барыдырэ́нгэ дрэ провинцыи тхэмэ́скирэ и барыдырэ́нгэ пэ кажно провинцыя и тхагарье́нгэ кажнонэ́ манушэ́нгирэ; дрэ кажно провинцыя ла́кирэ чхиныбнаса и сарэ́ манушэ́нгэ пэ лэ́нгири чиб. Саро́ сыс чхиндло́ Артаксерксоскирэ крали́скирэ лавэ́стыр и спхандло крали́скирэ ангрустяса чэргэнорьяса.

¹³ И бичхадэ́ сыс лыла́ пир манушэ́ндэ дрэ сарэ́ крали́скирэ провинцыи, соб (кай) тэ замарэ́н, (тэ хасякирэ́н) и тэ мулякирэ́н сарэ́н Юдэ́н, тыкнэн и пхуранэн, биятэ́н и джувле́н, дро е́кх дывэ́с, пэ дэшутрито дывэ́с дэшуявир-чхонэ́скиро, дро Адароскири чхон, и барвалыпэ́н лэ́нгиро тэ залэн.

¹⁴ Пиричхиныбэн далэ́ упхэныбнастыр сыс тэ отдэ́н дрэ кажно провинцыя сыр зако́но, саво́ сыс пхэндло́ (объявиндло) ваш сарэ́ манушэ́нгэ, соб (кай) ёнэ тэ явэ́н скэдынэ́ кэ дова́ дывэ́с.

¹⁵ Мануша́, савэ́н бичхадэ́, сы́гэс гинэ́ крали́скирэ припхэныбнаса, и упхэныбэ́н сыс пхэндло́ и дрэ крали́скири фэлатин Сузы. И кра́ли и Ама́но сыс бэштэ́ и пинэ́, а фо́ро Сузы сыс дрэ баро́ пиридживипэн.