Ester 2 - Библия - Пэ Балтитко Романи чиб (Романэс) 2019

Эстэ́ра Ячэ́лапэ Кралицаса

¹ Пало́ (после) дава́, ке́ли штылыя Артаксерксоскирэ-крали́скири холы́, ёв пририпирдя пал Астинятэ и палдова́, со ёй кэрдя́, и со сыс припхэндло пал ла́тэ.

² И пхэндлэ́ тэрнэ́-бэршэнгирэ (отроки), савэ́ дынариндлэ́ пашы́л крали́стэ: мэк тэ родэ́н кучэс крали́скэ тэрнэн гожонэн патывалэ́ джувле́н.

³ И мэк кра́ли тэ чхувэ́л дыкхибнаскирэн дрэ сарэ́ пэ́скирэ кралипнаскирэ-провинцыякирэ штэ́ты, савэ́ скэдэ́на сарэ́н тэрнэ́ патывалэ́ джувле́н, савэ́ сыс гожа мо́са, кэ крали́скири фэлатин [шэрутно-р.с.] Сузы, дрэ джувле́нгиро кхэр тэл Гегаёскирэ – крали́скирэ-евнухоскиро ракхибэн, саво́ сыс джувле́нгиро ракхибнари, и мэк лэ́нгэ тэ выдэн макхлуня ваш шукарипэ́н.

⁴ И тэрны́ патывалы́ джувлы́, сави́ явэ́ла лачхи́ крали́скирэ якхэнгэ, мэк тэ явэ́л кралицаса заме́ст Астинятэ. И лачхо́ сыс дава́ лав дрэ крали́скирэ якха́, и ёв адя́кэ и кэрдя́.

⁵ Сыс дрэ крали́скири фэлатин дрэ Сузы, екх Юдо; лав лэ́скиро сыс Мардохе́ё, Нароскиро чхаво́, Шымаскиро чхаво́, Кишоскиро чхаво́, Вениамино́скирэ родо́стыр.

⁶ Ёв сыс Ерусалимо́стыр выбичхадо кхэтанэ́ явирэ пленонэнца, савэ́н вылыджия́ о Ехония, Юдэя́киро кра́ли, савэ́н выбичхадя Навуходоносо́ро, Вавилоно́скиро кра́ли.

⁷ И барьякирдя ёв Гадасса, – ёй исын адя́кэ-паць Эстэ́ра, – лэ́скирэ-какэскири чхай, адя́кэ сыр ла́тэ на сыс ни да, ни дадэ́с. Тэрны́ дая́ Юдыца сыс шука́р стэма́са (стано́са) и шука́р мо́са. И ке́ли мынэ́ ла́кирэ дай и дад, Мардохе́ё лыя́ ла кэ пэ заме́ст чхатэ.

⁸ Ке́ли сыс пхэндло́ сарэ́нгэ крали́скиро припхэныбэ́н и лэ́скиро упхэныбэ́н, и ке́ли сыс скэдынэ́ бут тэрнэ́ патывалэ́ джувля́ кэ крали́скири фэлатин дрэ Сузы тэл Гегаёскиро ракхибэн, то тэды сыс лыны и Эстэ́ра дро крали́скиро кхэр тэл Гегаёскиро ракхибэн, кон сыс джувле́нгиро ракхибнари.

⁹ И яця́ лачхи́ лэ́скирэ якхэнгэ ада́я тэрны́ патывалы́ джувлы́, и яця́ лэ́стэ ла́ска кэ ёй, и ёв сыгнякирдя тэ дэл ла́кэ макхлуня ваш гожыма и саро́, со сыс упхэндло́ (назначындло) пэ ла́кири паш, и тэ чхувэ́н кэ ёй эфта́ патывалэ́ джувле́н, савэ́ сыс мол тэ явэ́н пашы́л ла́тэ, крали́скирэ кхэрэ́стыр; и пирилыджия ла и ла́кирэ патывалэ́ джувле́н дрэ най фэдэды́р джувле́нгирэ-кхэрэ́скири паш.

¹⁰ На ракирдя́ Эстэ́ра ни пал пэ́скирэ манушэ́ндэ, ни пал пэ́скиро ро́до; пал-дова́ со Мардохе́ё дыя́ ла́кэ упхэныбэ́н, соб (кай) ёй тэ на ракирэ́л дава́.

¹¹ И кажно дывэ́с Мардохе́ё явэ́лас кэ джувле́нгирэ-кхэрэ́скири грэ́да (дво́ро), соб (кай) тэ уджинэл пал Эстэракиро састыпэн, и пал-дова́, со кэрэ́лапэ ла́са.

¹² Ке́ли явдя́ часо кажнонэ́ тэрнэ́ патывалэ́ джувля́кэ тэ заджа́л кэ кра́ли Артаксе́рксо, пало́ дова́, сыр дрэ прогинэ́ (накхлэ) дэшуду́й чхона́ саро́ кэрдо́ сыс пэ ла́тэ, со трэй джувле́нгэ, – пал-дова́ со ада́кицы дывэса́ трэиндя́ тэ проджас лэ́нгирэ макхлуненца: шов чхона́ мирровонэ ксилэса и шов чхона́ кхандыпнэнца и явирэнца джувлитконэ макхлуне́нца.

¹³ Тэды адя́кэ приготовиндлы тэрны́ патывалы́ джувлы́ тэ заджа́л кэ кра́ли. Соб (кай) ёй тэ на потребинэл, ла́кэ дэ́нас саро́ ваш выгиибэн джувлитконэ кхэрэ́стыр дро крали́скиро кхэр.

¹⁴ Бэльвеле́ ёй заджалас, и пэ зло́ко (ра́нко) рисёлас дрэ яви́р джувлитко кхэр, тэл Шаазгазокиро ракхибэн, крали́скирэ евнухоскиро, кон сыс крали́скирэ-джувле́нгиро ракхибнари; и буты́р на выджа́ла кэ кра́ли, ко́ли фэ́ни кра́ли замангэла ла, и ёй кхарэ́ласпэ пир лав.

¹⁵ Ке́ли подги́я часо Эстэракиро, Абихайлоскирэ чхакэ, Мардохеёскирэ-какэскирэ, саво́ лыя́ ла кэ пэ заме́ст чхатэ – тэ джал кэ кра́ли, тэды ёй на мангдя́ ничы́, апри́ч дова́, пал со пхэндя́ ла́кэ Гегаё, крали́скиро евнухо, джувле́нгиро ракхибнари. И латхя́ Эстэ́ра лачхо́ отлыджаибэн кэ пэ дрэ сарэ́ манушэ́нгирэ якха́, кон дыкхця́ ла.

¹⁶ И лынэ́ Эстэ́ра кэ кра́ли Артаксе́рксо, дрэ лэ́скиро крали́скиро кхэр, дрэ дэ́што чхон, дрэ чхон Тебе́фо, дро эфта́то (битринэ́нгиро дэ́што) бэрш лэ́скирэ кралипнаскиро.

¹⁷ И покамдя кра́ли Эстэ́ра буты́р пэ́скирэ сарэ́ джувле́ндыр, и ёй яця́ дро́го лэ́скэ и лачхо́ отлыджаибэн буты́р сарэ́ндыр тэрнэ́ патывалэ́ джувле́ндыр; и ёв чхудя́ крали́тко коро́на пэ ла́киро шэро́, и кэрдя́ ла кралицаса пэ Астинякиро штэ́то.

¹⁸ И кэрдя́ кра́ли баро́ свэ́нко ваш сарэ́нгэ пэ́скирэ тхэмэ́скирэ рангэ и ваш манушэ́нгэ, савэ́ дынариндлэ́ пашы́л лэ́стэ, – свэ́нко ваш Эстэракэ, и кэрдя́ льго́та провинцые́нгэ и роздыя да́ры кралитконэ нажалиматыр.

¹⁹ И, ке́ли яви́р мо́ло скэдынэ́ сыс тэрнэ́ патывалэ́ джувля́, и Мардохе́ё сыс бэшто́ пашы́л крали́скирэ вудара́.

²⁰ Эстэ́ра уса́ на ракирдя́ пал пэ́скиро ро́до и пал пэ́скирэ манушэ́ндэ, сыр припхэндя́ ла́кэ Мардохе́ё; а лав Мардохеёскиро Эстэ́ра кэрэ́лас кэ ко́нцо (кэ яго́ро) и акана́ адя́кэ-паць, сыр и тэды, ке́ли ёй бария кэ как.

²¹ Дрэ дова́ часо, сыр Мардохе́ё сыс бэшто́ пашы́л крали́скирэ вудара́, дуй крали́скирэ евнухи, Гавафа [Бигтано-ю.о.] и Фара [Тэрэшо-ю.о.], савэ́ ракхнэ прого, росхолясынэ и задуминдлэ тэ ґаздэ́н васт пэ Артаксерксостэ крали́стэ.

²² То уджиндя́ пал дова́ рэ́ндо, Мардохе́ё, и пиридыя Эстэракэ кралицакэ, а Эстэ́ра пхэндя́ крали́скэ Мардохеёскирэ лавэ́стыр.

²³ Рэ́ндо сыс розґалыно и латхно чачунэса, и лэн дуе́н, убладэ пэ кашт. И сыс зачхиндло́ пал Мардохеёскиро лачхо́ рэ́ндо дрэ лылвари́ крали́стэ анги́л лэ́стэ.