Ереме́ё 8 - Библия - Пэ Балтитко Романи чиб (Романэс) 2019

¹ “‘Дро долэ́ дывэса́’, – ракирэ́ла Рай Дэвэ́л’, – вэргитка халадэ́ вытырдэна [вычхурдэна-р.с.] кокалы́ маґилэндыр: Юдэя́кирэ-кральенгирэ кокалы́, тхагарьенгирэ кокалы́, раша́нгирэ кокалы́, пророкэ́нгирэ кокалы́, и явирэ-манушэ́нгирэ кокалы́ Ерусалимо́стыр.

² Ёнэ росчхувэна [росчхурдэна-р.с.] лэн анги́л кхам, и анги́л чхон, и анги́л сарэ́ болыбна́скирэ халадыбэна (янголы), савэ́н ёнэ камлэ́, и савэ́нгэ ёнэ дынариндлэ́; пал савэ́ндэ ёнэ гинэ́, и савэ́ндыр ёнэ мангнэ́ тэ дэн годы́: савэ́н ёнэ родынэ и савэ́нгэ ёнэ отдынэ́ паты́в. Далэ́ кокалы́ на явэ́на тэ укэдэн, и на явэ́на тэ гаравэн, нэ ёнэ явэ́на сы́рбы ґнэё упра́л пэ пхув.

³ И сарэ́ мануша́, савэ́ ячэ́напэ джидэ́ далэ́ бибахталэ́-кхэритконэ́ родо́стыр выкэдэна пэ́скэ фэды́р тэ мэрэ́н, сыр тэ дживэ́н пэ сарэ́ долэ́ штэ́ты, пэ савэ́ Мэ традыём [вытрадава-р.с.] лэн,’ – ракирэ́ла болыбна́скирэ-янголэ́нгиро Рай Дэвэ́л.

Хохано́ Сыклякирибэ́н. Грэ́хо и Сэ́ндо

⁴ “И ту, Ереме́ё, пхэн адя́кэ лэ́нгэ: ‘Адя́кэ ракирэ́ла Рай Дэвэ́л: ‘Ци мануша́ пэрэ́на и буты́р на уштэна, Ци кон рисёла дрэ риг дромэ́стыр, на рисёла палэ?

⁵ Со́скэ кадалэ́ Мирэ́ мануша́ Ерусалимо́стыр пэрэ́на буты́р [отджана-р.с.] и зоралэды́р чачипнастыр? Ёнэ рикирэнапэ зоралэ́с кэ хохаибэ́н, ёнэ на камэ́на тэ рисён.

⁶ Мэ пришундёмпэ и на шундём, со ёнэ ракирэ́на чачипэ́н. Нико́н лэ́ндыр на приґалыя пэ́скиро фуипэ́н, соб (кай) тэ пхэнэ́л: ‘Со ж да мэ кэрдём?’ Кажно лэ́ндыр рисёла чачипнастыр пэ́скирэ дромэ́са сы́рбы грай, саво́ чхурдэлапэ пэ марибэ́н.

⁷ И аж бутяно (бусько) пэ болыбэ́н джинэ́ла пэ́скиро упхэндло́ часо, и цуглица, и бахирка (ласточка), и жураво дыкхэ́ла дуе якхэ́нца пал часо, сыр лэ́нгэ тэ явэ́н [тэ приурнян-р.с.]. Нэ Мирэ́ мануша́ на джинэ́на Ра́скирэ-Дэвлэ́скиро чачипэ́н.

⁸ Сыр тумэ́ сашты́ тэ пхэнэ́н: “Амэ сам барэ́-годякирэ (годымарья), и Ра́скирэ-Дэвлэ́скиро Зако́но исын амэ́нца? Дыкхэ́н: хоханэ́-сыклякирибнаскири кхия (трость) тэ чхинэл дро Зако́но кэрдя́ адя́кэ, со Зако́но яця́ хохано́.

⁹ Кадалэ́ барэ́-годякирэ мануша́ исын ладжакирдэ́, лэ́нгиро ду́хо (фа́но) исын пхагирдо́ и ёнэ дынэпэ дукха́. Акэ, ёнэ отпхэндэпэ Ра́скирэ-Дэвлэ́скирэ лавэ́стыр; и саво́ ж годыпэ́н исын лэ́ндэ?

¹⁰ Палдава́ Мэ да́ва лэ́нгирэ ромне́н явирэ́нгэ, и лэ́нгирэ фэ́лды кодолэ́ манушэ́нгэ, савэ́ явэ́на хулая́ пэ лэ́ндэ. Пал-дова́ со кажно лэ́ндыр тыкнэстыр кэ са́мо барэды́р исын присыклыно и ґа́лко кэ барвалыпэ́н: пророкостыр кэ раша́й – кажно лэ́ндыр кэрэ́ла начачунэс.

¹¹ И ёнэ састякирдэ абысыр дыкхады (фра́нсо/рана), сави́ кэрдя́пэ Мирэ́-манушэ́нгирэ чхатэ, пхэни́: ‘Рама́нё, рама́нё (миро)’! Ке́ли нанэ рама́нё.

¹² Ци ладжандынэ ёнэ, сыр ёнэ кэрдэ́ джунгалэ́ дэвлорэ́? Над! Ёнэ на ладжандынэ сарэ́са, и ёнэ на джиндлэ́ тэ лолён. Палдава́ ёнэ пэрэ́на машки́р одолэ́ндэ, савэ́ пынэ́, дро лэ́нгирэ-сэндоскиро часо (цы́ро) ёнэ обштавэна,’ – раки́рла Рай Дэвэ́л.

¹³ ‘Мэ, чачэс, откэдава саро́ лэ́ндыр’ – раки́рла Рай Дэвэ́л. ‘На явэ́на му́ри пэ винаграды́тко кашт, и на явэ́на фиги пэ финикитко кашт; и патри́н пэ дрэ́во (кашт) зашутёла; и саро́, со Мэ дыём лэ́нгэ, на явэ́ла буты́р лэ́ндэ.

¹⁴ Со́скэ амэ сам бэштэ́ штыл? Кэдэнпэ тумэ́, и явэ́н, джа́са дрэ фо́рья зоралэ́ тыноса, и амэ мэраса одо́й. Пал-дова́ со Рай Дэвэ́л кэрдя́, соб (кай) амэ тэ хасёвас, и Ёв дыя́ амэ́нгэ жэлучо пане́са тэ пьяс, долэ́скэ, со амэ кэрдя́м грэ́хи анги́л Растэ-Дэвлэ́стэ.

¹⁵ Амэ ужакирдям рама́нё, нэ нисаво́ лачхипэ́н на явдя́ далэ́стыр; амэ ужакирдям тэ састёвас, нэ дыкхэ́н: исыс екх трашаибэ́н!

¹⁶ Дано́скирэ форье́ндыр сыс шундло, сыр дэ́на пырски (храпинэна) вэргэ́нгирэ граё: сари́ пхув издрала лэ́нгирэ-грэнгирэ зорья́тыр, сыр ёнэ ґрымитынэна; и ёнэ явэ́на и похана (знишчынэна) сари́ пхув, и саро́, со исын пэ ла́тэ, и фо́ро, и сарэ́н, савэ́ исын джидэ́ дро дова́ фо́ро.

¹⁷ ‘Палдава́, дыкхэ́н: Мэ бичхава́ва машки́р пэ тумэ́ндэ сапэн, саплынен, савэ́н нашты́ тэ зарикирэн, и ёнэ явэ́на тэ дандырэн тумэн’, – ракирэ́ла Рай Дэвэ́л.

¹⁸ Мэ, Ереме́ё, подрикирава миро ду́хо (фа́но), ке́ли мэ тугинава, миро ило́ нашавэла зор андрэ́ ма́ндэ.

Ереме́ё Тугинэла пал Пэ́скирэ Манушэ́ндэ

¹⁹ Шунэ́н! Акэ, шундлы исын мирэ́ манушэ́нгирэ-чхакири зан, сыр ёй дэ́ла го́дла древа́н дуратунэ́ тхэмэстыр?: ‘Ци исын дава́ Рай Дэвэ́л пэ Сио́но? Ци исын дава́ Сионоскиро кра́ли одо́й?’ Рай Дэвэ́л, лэ́нгиро Кра́ли, отпхэнэ́ла: ‘Со́скэ ёнэ дукхавэнас Ман, соб (кай) Мэ тэ холясовав пэ лэ́ндэ пал лэ́нгирэ вычхиндлэ́ и́долы, савэ́ исын чу́жа и (ничы́ намол) хартытка?’

²⁰ Укэдыибэн марэскиро сыс, лынай кончындяпэ (прогия́), и амэ на зракхцямпэ!’” – годлэна мануша́.

²¹ ‘Миро ило́ хасия́ (замыя́) пал-дова́, со мирэ́ мануша́ хасинэ́, мэ, Ереме́ё, зоралэ́с тугинава: бари дар (ди́во трашаса) ухтылдэ́ Ман.

²² Ци исын дава́ бальзамо дро Галаа́до? Ци нанэ да састыпнари одо́й? Со́скэ на састякирдэ чха мирья, мирэ́ манушэнгирья?