Ереме́ё 7 - Библия - Пэ Балтитко Романи чиб (Романэс) 2019

Ереме́ё Ракирэ́ла дрэ По́рта

¹ Лав, саво́ сыс ма́нгэ, Еремеёскэ, Ра́стыр-Дэвлэ́стыр, со пхэнэлас:

² “Тэрдёв дрэ по́рта анги́л Ра́скирэ-Дэвлэ́скиро Кхэр (Кхангири́), и пхэн зоралэ́с анги́л манушэ́ндэ дава́ лав и пхэн: “Шунэ́н Ра́скирэ-Дэвлэ́скиро лав сарэ́ тумэ́, кон исын Юдэя́тыр, савэ́ заджа́на пирда́л дая́ по́рта тэ отдэ́н паты́в Ра́скэ-Дэвлэ́скэ.

³ Адя́кэ ракирэ́ла болыбна́скирэ-янголэ́нгиро Рай Дэвэ́л; Израилёскиро Дэвэ́л: “Парувэн тэ явэ́л чачунэдыр дова́, сыр тумэ́ дживэ́на, и со тумэ́ кэрэ́на, и Мэ кэра́ва адя́кэ, со тумэ́ явэ́на тэ дживэ́н пэ дава́ штэ́то.

⁴ На допатян зоралэ́с хоханэ́ лавэнгэ, со пхэнэ́на: ‘Дава́ исын Ра́скирэ-Дэвлэ́скири Кхангири́, Ра́скирэ-Дэвлэ́скири Кхангири́, Ра́скирэ-Дэвлэ́скири Кхангири́.’

⁵ Нэ ко́ли тумэ́ илэ́стыр парувэна тэ явэ́л чачунэдыр тумаро́ джиибэ́н и дова́, со тумэ́ кэрэ́на; ке́ли тумэ́ явэ́на чачипна́са тэ кэрэ́н пир чачипэ́н сэ́ндо машки́р екхэ манушэ́стэ и лэ́скирэ пашатунэстэ;

⁶ ко́ли тумэ́ на явэ́на тэ притасавэн чужонэ́ манушэ́с, пиротос (сиротас) и пивля (удова), и тумэ́ на явэ́на тэ прочхувэн набанго рат пэ дава́ штэ́то, и тумэ́ на явэ́на тэ псирэ́н тэ отдэ́н паты́в явирэ дэвлорэ́нгэ пэ тумари́ дош (би́да);

⁷ тэ́ньчи Мэ кэра́ва адя́кэ, со тумэ́ явэ́на тэ дживэ́н пэ дава́ штэ́то, пэ дая́ пхув, со Мэ дыём тумарэ́ дадэ́нгэ аж пэ сарэ́ ве́ки.

⁸ Акэ, тумэ́ зоралэ́с допатяна хоханэ́ лавэнгэ, савэ́ на дэ́на ко́фо.

⁹ Сыр да тумэ́ ишчо (инкэ́) чорэна, замарэна, кэрэ́на биладжаипэ́н, совлахана хоханэ́с, хачкирэна дро́га смо́лы Ваалоскэ, и тумэ́ псирэ́на тэ отдэ́н паты́в явирэ дэвлорэ́нгэ, конэ́с тумэ́ на джинэ́на,

¹⁰ и тэ́ньчи тумэ́ явэ́на и тэрдёна анги́л Ма́ндэ дро кхэр, савэ́скэ дынэ́ тумэ́ Миро лав, и тумэ́ пхэнэ́на: ‘Амэ сам зракхнэ́, соб (кай) и дурэды́р тумэ́ тэ кэрэ́н далэ́ джунгалэ́ рэ́нды?

¹¹ Ци со, Миро кхэр, савэ́скэ тумэ́ дынэ́ Миро лав, яця́ виртаса (вертепоса) прахарьенгэ анги́л тумарэ́ якха́? Акэ, Мэ дыкхцём дава́”, – ракирэ́ла Рай Дэвэ́л.

¹² Нэ тумэ́ акана́ джа́н пэ Миро штэ́то, со сыс дро Сило́мо, кай Мэ кэрдём адя́кэ, соб (кай) Миро лав англэды́р сарэ́стыр тэ ячэ́лпэ одо́й, и тумэ́ подыкхэн, со Мэ кэрдём одо́й пал фуипэ́н, Мирэ́-манушэ́нгиро Израилёстыр.

¹³ И акана́, пал-дова́ со тумэ́ кэрдэ́ сарэ́ далэ́ бутя́, – пхэндя́ Рай Дэвэ́л, – и мэк Мэ и ракирдём тумэ́нгэ, сыр Мэ уштавас тася́рлэс (ра́нэс) пэ зло́ко (фра́нсо) и Мэ пхэндём, нэ тумэ́ на шундлэ́ Ман, и Мэ кхардём тумэн, нэ тумэ́ на отпхэндлэ́ Ма́нгэ:

¹⁴ палдава́ Мэ кэра́ва далэ́ Мирэ́ кхэрэса, савэ́скэ тумэ́ зоралэ́с допатяна, и штэтоса, со Мэ дыём тумэ́нгэ и тумарэ́ дадэ́нгэ, дова́-паць, сыр Мэ кэрдём Силомоса.

¹⁵ И Мэ традава криг тумэн Мирэ́ якхэ́ндыр, сыр Мэ традыём криг сарэ́н тумарэ́ пшалэ́н, – саро́ Ефремоскиро (Ефраимоскирэ) явибнаскиро ро́до.

¹⁶ Палдава́ ту, Ереме́ё, на мангпэ пал адалэ́ манушэ́ндэ, и на пхэн патерья (молитвы), и на манг Ман пал лэ́ндэ, пал-дова́ со Мэ на ява́ва тэ шунав тут.

¹⁷ Ци на дыкхэ́са ту, со ёнэ кэрэ́на дрэ фо́рья пир Юдэ́я, и пэ Ерусалимо́скирэ вули́цы (га́сы)?

¹⁸ Бияты скэдэ́на кашта́, и дада́ росхачкирэна яга, и джувля́ мешынэна хумэр (тясто), соб (кай) тэ кэрэ́н параморэ болыбнытконэ кралицакэ, и тэ вычхувэн тхадунэ свэ́нта дыибэна́ явирэ дэвлорэ́нгэ, соб (кай) тэ холякирэн (дукхавэн) Ман тэ холясовав.

¹⁹ Ци дава́ ёнэ Ман дукхавэна тэ холясовав?”, – ракирэ́ла Рай Дэвэ́л. “Ци дава́ ёнэ на кокорэ́ пэс дукхавэнас пэ нашукарипэн пэ́скэ?

²⁰ Палдава́ адя́кэ ракирэ́ла Рай Дэвэ́л, Дэвэ́л: “Акэ, Мири́ холы́ и Миро холякирибэ́н вычхувэнапэ пэ дава́ штэ́то – пэ манушэ́стэ, и пэ кхэритконэ́ мурдалэ́ндэ (ското); пэ фэлды́тка кашта́, и пэ пхаба́, со барьёна пэ пхув. Мири́ холы́ явэ́ла тэ хачол сы́рбы яг, и на мурдёла.

²¹ Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Дочхувэн хачкирибнаскирэ яныбэна́ кэ тумарэ́ свэ́нта дыибэна́ и хан дава́ мас.

²² Мэ ж на пхэндём тумарэ́ дадэ́нгэ, и Мэ на припхэндём лэ́нгэ дро дова́ дывэ́с, ке́ли Мэ яндём лэн Египто́скирэ пхувья́тыр, нисо́ пал хачкирибнаскирэ яныбэна́ и свэ́нта дыибэна́.

²³ Нэ, акэ, со Мэ припхэндём лэ́нгэ, пхэни́: “Шунэ́н мири́ зан и Мэ ява́ва тумаро́ Дэвэ́л, и тумэ́ явэ́на Мирэ́ мануша́. И дживэ́н адя́кэ, сыр Мэ припхэндём тумэ́нгэ, соб (кай) тэ явэ́л миштэ́с тумэ́нгэ.”

²⁴ Нэ ёнэ на кандынэ́, и ёнэ на причхудэ кан тэ шунэ́н, нэ ёнэ дживдэ́ пир пэ́скири годы́, пир пэ́скирэ пхарэ́, бибахталэ́ илэ, и ёнэ рисинэ́ думэса, а на мо́са кэ Мэ.

²⁵ Далэ́ дывэсэ́стыр сыр тумарэ́ дада́ выгинэ́ Египто́скирэ пхувья́тыр кэ ададывэ́с, Мэ бичхававас кэ тумэ́ сарэ́ Мирэ́ писхарье́н, Мирэ́ пророкэ́н, Мэ бичхававас лэн кажно дывэ́с тася́рлэс (ра́нэс) пэ ра́нко;

²⁶ нэ ёнэ на кандынэ́ Ман, и ёнэ на причхудэ кан тэ шунэ́н, нэ ёнэ пхарьякирдэ пэ́скирэ мэня. Ёнэ кэрдэ́ фуеды́р пэ́скирэ дадэндыр.

²⁷ И палдава́ ту, Ереме́ё, пхэнэ́са сарэ́ далэ́ лава́ лэ́нгэ, нэ ёнэ на явэ́на тэ кандэ́н тут. Ту явэ́са тэ кхарэс лэн, нэ ёнэ на отпхэнэна ту́кэ.

Дэвэ́л Пхарэ́с Сэндякирэ́ла Магирипнытко Религия пэ До́ло дро Бэн-Хиномо

²⁸ И ту пхэнэ́са лэ́нгэ: “Дая́ исын манушы́тко нацыя, сави́ на кандэ́ла пэ́скири Ра́скирэ-Дэвлэ́скири зан, и сави́ на сыклёла пхарэ́ сыклякирибнастыр: нанэ патяибэ́н лэ́ндэ, ёв сы́рбы лыно́ криг лэ́нгирэ мо́стыр.

²⁹ Обчхин тырэ́ бала́, шукарни Ерусалимо́стыр, и чхурдэ криг лэн, и ров пэ вучэ́ штэ́ты, пал-дова́ со Рай Дэвэ́л на прилыя́ и мэкця́ ро́до, саво́ зоралэ́с холякирдя Лэс.

³⁰ Пал-дова́ со мануша́ Юдэя́тыр кэрдэ́ биба́хт пэ Мирэ́ якха́’, – ракирэ́ла Рай Дэвэ́л, – ‘ёнэ чхудэ́ пэ́скирэ джунгалэ́ и́долы дро кхэр, со исын кхардо пир Миро лав, соб (кай) тэ магирэ́н лэс.

³¹ И ёнэ кэрдэ́ вучэ́ штэ́ты кэ Тофето, со исын пэ Хиномоскирэ-чхавэ́нгиро до́ло тэ хачкирэ́н Пэ́скирэ чхавэ́н и чхае́н дрэ яг – со Мэ припхэндём тэ на кэрэ́н, и со на явдя́ кэ Мэ пэ годы́.

³² ‘Палдава́, акэ, явэ́на дывэса́’, – ракирэ́ла Рай Дэвэ́л; – ‘ке́ли дава́ штэ́то на явэ́на тэ кхарэ́н “Тофитоскиро”, ци “Хиномоскирэ–чхавэ́нгиро до́ло”, нэ ёй ячэ́ла “Мэрибнаскиро до́ло”; – пал-дова́ со явэ́на тэ гаравэн дро Тофито кэ дова́ дывэ́с, сыр на явэ́ла буты́р штэ́то одо́й.

³³ Кадалэ́-манушэ́нгирэ тру́пы явэ́на сыр хабэ́н болыбнытконэ чирикленгэ и мурдалэ́нгэ пэ пхув. И ние́кх на явэ́ла тэ страхакирэл лэн криг (на явэ́ла конэ́скэ тэ оттрадэл лэн).

³⁴ И тэ́ньчи Мэ кэра́ва адя́кэ, со пириячэна тэ санпэ радыма́тыр, и на явэ́на радыпнытка (хотна), и на явэ́ла зан тэрнэскири и зан тэрнякири дрэ фо́рья кэ Юдэ́я и пэ ґасы (вули́цы) дро Ерусалимо. Пал-дова́ со дая́ пхув явэ́ла чхучакирды/ чхучи́ (пусто).’