Ереме́ё 6 - Библия - Пэ Балтитко Романи чиб (Романэс) 2019

Вэ́рги Джа́на пэ Ерусалимо

¹ О, Вениамино́скирэ чхавэ́, кэдэнпэ тэ нашэ́н криг Ерусалимо́стыр! Пхурдэ́н дрэ ро́ги (трубы) дрэ Текуя и кэрэ́н яг, сыр сигнало дро Бэц-Хацэрэмо; бари биба́хт джа́ла паш-ратякирэ рига́тыр (северостыр) и бари би́да.

² Тумэ́ сан го́жа и бучиндлэ чхая́ Сионо́стыр, бари би́да явэ́ла пэ тумэ́ндэ.

³ Чхупна́рья пэ́скирэ бакрэ́нгирэ гуртэнца явэ́на кэ тумэ́, кэ Ерусалимо. Ёнэ росчхувэна пэ́скирэ ша́тры трусця́л фо́ро; кажно (сва́ко) лэ́ндыр явэ́ла тэ чалякирэл пэскирэн пэ пэ́скиро штэ́то.

⁴ “Явэ́н скэдынэ́ тэ марэ́нпэ далэ́ фороса!” – кадалэ́ вэ́рги годлэна. “Уштэ́н, и явэ́н, джа́са пэ лэ́ндэ дывэсэ́.” Бида пэ амэ́ндэ, сыг дывэ́с кончынэлапэ, дыкхэ́н сыр бэльвэлитка зэрья (те́ни) барьёна.

⁵ Уштэ́н, джа́са пэ лэ́ндэ раты́, и явэ́н, розмараса лэ́нгирэ фэлатиня́.”

⁶ И пхэндя́ адя́кэ Рай Дэвэ́л, болыбна́скирэ – янголэ́нгиро: “Чингирэн тэлэ́ кашта́, и чхувэ́н пхув тэ явэ́л вало трусця́л Ерусалимо. Дава́ фо́ро тэ джал тэл пхаро́-сэндякирибэн: мануша́ тасавэна екх екхэ́с дро дава́ фо́ро.

⁷ Сыр ґанынгатыр чхувэ́лапэ криг ла́киро пани́, адя́кэ-паць далэ́ форо́стыр чхувэ́лапэ криг лэ́скиро фуипэ́н: мануша́ исын нахрата екх кэ екх, исын шундло исын, сыр ёнэ тасавэна екх екхэ́с. Саро́ часо джа́ла кэ Мэ ту́га и дукхаибэн”, – ракирэ́ла Рай Дэвэ́л.

⁸ “Сыклён (обдуминэнпэ) тумэ́, Ерусалимо́скирэ мануша́, соб (кай) Миро ди тэ на дурьёл (тэ на отджал) тумэ́ндыр, соб (кай) Мэ тэ на чхучакирав тумэн адя́кэ, со пхув явэ́ла биманушэнгири.”

⁹ Адя́кэ ракирэ́ла Рай Дэвэ́л – болыбна́скиро-янголэ́нгиро: “Ёнэ явэ́на зоралэ́с тэ обтринскирэн манушэ́н Израилёстыр, кон ячнэ́пэ сы́рбы винаградоскири рандь, ри́скир палэ пэ́скиро васт сы́рбы винаградонэ–обкэдыибнаскиро (обирателё), кон чхувэ́ла му́ри дрэ корзи́ны (кхудэ́).

¹⁰ Конэ́скэ мэ, Ереме́ё тэ пхэна́в, и тэ досыкавав, соб (кай) ёнэ могиндлэ́ тэ шунэ́н? Акэ, лэ́нгиро кан исын наобчхиндло и ёнэ нашты́ тэ шунэ́н. Ѓа́да, Ра́скирэ-Дэвлэ́скиро лав нанэ дрэ паты́в лэ́ндэ; ёнэ на радынэ́напэ лэ́стыр.

¹¹ Мэ сом пхэрдо́ холя́са Ра́стыр-Дэвлэ́стыр, Мэ сом кхинякирдо тэ пририкирав дая́ холы́.” Пхэндя Рай Дэвэ́л ма́нгэ: “Вычхув ла пэ биятэндэ пэ ґасы (вули́цы), и пэ скэдыни (собраниё), кай исын кхэтанэ́ тэрнэ́ мануша́: пал-дова́ со аж ромэс ромня́са лэ́на дро пле́но, манушэ́с дрэ бэрша́ и пхуранэ́ манушэ́с.

¹² И лэ́нгирэ кхэра́ дэ́на явирэ манушэ́нгэ, лэ́нгирэ ромне́н и фэ́лды кхэтанэ́; пал-дова́ со Мэ ґазда́ва Миро васт пэ манушэ́ндэ пэ кодоя пхув”, – пхэндя́ Рай Дэвэ́л.

¹³ Пал-дова́ со кажно (сва́ко) лэ́ндыр, най тыкнэды́р манушэ́стыр кэ най барэды́р исын присыклыно кэ ґалкима, и, кажно (сва́ко) лэ́ндыр, пророкостыр кэ раша́й кэрэ́ла начачунэс.

¹⁴ Ёнэ састякирдэ [састякирэна-р.с.] чхиндло́ фра́нсо (рана) мирэ́-манушэ́нгири вари-сыр, пхэни́: “Рама́нё, рама́нё (миро)!” Ке́ли нанэ рама́нё.

¹⁵ “И ци ладжандынэ ёнэ, сыр ёнэ кэрдэ́ джунгалэ́ рэ́нды (де́лы)? Над, ёнэ на ладжандынэ, и ёнэ на джинэ́на, со исын дасаво тэ лолён. Палдава́ ёнэ пэрэ́на машки́р одолэ́ндэ, савэ́ пэрэ́на пэ мэрибэ́н”, – пхэндя́ Рай Дэвэ́л.

¹⁶ Рай Дэвэ́л ракирэ́ла адя́кэ: “Тэрдён пэ дрома́, и дыкхэ́н, и пхучэ́н пал пхуранэ́ дрома́, кай исын лачхо́ дром и джа́н пир дава́ дром, и тумэ́ латхэ́на де́скэ тэ откхинён. Нэ ёнэ отпхэндлэ́: “Амэ на джа́са пир дава́ дром.”

¹⁷ Рай Дэвэ́л адя́кэ-паць чхудя́ стрэгарьен (ракхибнарьен) ваш адалэ́ манушэ́нгэ: “Шунэ́н рогоскири зан!” Нэ ёнэ пхэндлэ́: “Амэ на ява́са тэ шунас.”

¹⁸ Палдава́ шунэ́н тумэ́, Наюды́тка на́цыи, и джинэ́н, со явэ́ла Мирэ́-манушытконэ́ скэдыибнаса.

¹⁹ Шун, пхув! Акэ Мэ яна́ва биба́хт (хасибэ́н) пэ адалэ́ манушэ́ндэ, и пэ дова́, со ёнэ придуминэна; пал-дова́ со ёнэ на шундлэ́ Мирэ́ лава́, и со ёнэ отпхэндэпэ Мирэ́ Законо́стыр.

²⁰ Ваш со Ма́нгэ ароматытконэ-смолэнгиро (ладоноскиро) тхув, со джа́ла Сабатыр, и гудлы тришчына (траснико) дуратунэ́ тхэмэстыр? Мэ на прилава Тумарэ́ хачкирибнаскирэ яныбэна́ и тумарэ́ – свэ́нта дыибэна́ на радынэна Ман.”

²¹ Палдава́ ракирэ́ла Рай Дэвэ́л адя́кэ: “Акэ, Мэ чхува́ва бар тэ обштавэнпэ анги́л кадалэ́ манушэ́ндэ: дада́ и чхавэ́ кхэтанэ́ пэрэ́на пир дава́ бар. Пашатуно ману́ш и лэ́скиро мал хасёна.”

²² Халадэ́ (мануша́) паш-ратякирэ тхэмэстыр (северостыр) джа́на пэ Ерусалимо. И акэ, ракирэ́ла Рай Дэвэ́л: “Акэ, бари манушы́тко нацыя ґаздэ́лапэ дуратунэ́ ягорэндыр пэ пхув.

²³ Ёнэ лыджа́на лу́ко и марибны́тко буст тэ пхусавэн, ёнэ исын биде́скирэ и на лачхэ́-илытка, лэ́нгирэ заня́ ґрыминэна сы́рбы мо́рё (дэрья́в), ёнэ традэ́на уклистэ́ пэ грэ́ндэ, ёнэ исын кэдынэ тэ марэ́н тумэн, чхаё Ерусалимо́стыр.

²⁴ “Амэ шундя́м звесь пал лэ́ндэ, – амарэ́ васта́ ячнэ́ бизорья́кирэ, бари ту́га ухтылдя амэн, дукх, сы́рбы дрэ джувля́тэ, кон исын дрэ пхари́ мэнька.

²⁵ Амэ на выджаса пэ фэ́лда, и амэ на псираса дромэ́нца, пал-дова́ со вэргостэ исын курта́ла, сави́ дорэсэ́ла сарэ́ ригэ́ндыр и траш пэ кажно риг.”

²⁶ “Мирэ́-манушэ́нгири чхаё, чхув пэ пэ́стэ жалобно гоно́, и катынпэ дрэ пра́ска! Зоралэ́с тугин сы́рбы пал екхорэ чхаворэстэ, киркэс обров пал-дова́ со екха́тыр пэрэ́ла (явэ́ла) пэ амэ́ндэ замарибнари”, – пхэндя́ Рай Дэвэ́л.

²⁷ Мэ чхудём тут, Ереме́ё, сы́рбы ракхибнаскири вучарды́ (башня) пэ Мирэ́ манушэ́ндэ, сы́рбы тва́рдыма, соб (кай) ту тэ джинэ́с, и тэ пропатякирэс лэ́нгиро дром;

²⁸ Сарэ́ ёнэ исын пхарэ́-шэритка (нахрата) бунтярья, и ёнэ исын каля–кэрибнаскирэ (клеветники); ёнэ исын пхарэ́ сы́рбы харко́ма (медь) и састы́р; сарэ́ ёнэ исын биладжакирэ.

²⁹ Мехо (пишот) куты́ (на́бут) со на схачия сарэ́са, молови (свинцо) похая яг; билякэрибнаскиро (плавильшчыко) биладя ивья́ (напра́снэс), пал-дова́ со шлаки [налачхэ́ манушэ́н-р.с.] на укэдынэ.

³⁰ Мануша́ явэ́на тэ кхарэ́н лэн “чхурдыно́ руп”, пал-дова́ со Рай Дэвэ́л на прилыя́ лэн.”