Ереме́ё 50 - Библия - Пэ Балтитко Романи чиб (Романэс) 2019

Сэ́ндо пэ Вавило́но и пэ Пхув Халдеенгири

¹ Акэ, исын лав, со Рай Дэвэ́л пхэндя́ проти Вавило́но, и проти пхув Халдее́нгири пир Еремеёстэ, пророкостэ:

² “Подэн зан (дэн тэ джинэ́н) машки́р на́цыи, и обзанякирэн (роспхэнэ́н) сарэ́нгэ, и ґаздэ́н сцяго (флаго); обзанякирэн, и на гаравэн дава́, – пхэнэ́н: ‘Вавило́но лыно́, Вило ладжакирдо́. Меродахо исын пхагирдо́ пэ котэра́, лэ́скирэ и́долы магирдэ́, лэ́нгирэ вычхудэ́ муя́ пхагирдэ́ пэ котэра́.

³ Ваш одова́ со паш-ратитконэ́ (севернонэ) рига́тыр джа́ла пашылэды́р Мидянэнгири нацыя проти Вавило́но, ёнэ кэрэ́на лэ́нгирэ пхувья́тыр чхучо́ (пусто) штэ́то, и ние́кх (нико́н) на явэ́ла тэ дживэ́л одо́й: и мануша́ и мурдала́ (жывотна) нашэ́на и джа́на криг.

⁴ Дрэ долэ́ дывэса́ и дро дова́ часо’, – ракирэ́ла Рай Дэвэ́л, – ‘чхавэ́ Израилёскирэ и сарэ́ чхавэ́ Юда́скирэ явэ́на кхэтанэ́, и ёнэ явэ́на, рови, соб (кай) тэ родэ́н Рас-Дэвлэ́с, пэ́скирэс Дэвлэ́с.

⁵ Ёнэ явэ́на тэ пхучэнпэ дром пэ Сио́но, и ёнэ явэ́на тэ рискирэ́н пэ́скирэ муя́ кэ ёв, ракири́: ‘Явэ́н и ла́са тэ кхэтанякираспэ кэ Рай Дэвэ́л вечнонэ заветоса, саво́ на бистрэлапэ.

⁶ Мирэ́ мануша́ нашадынэ сыр бакрэ́: лэ́нгирэ чхупна́рья (пастыри) лыджинэ́ лэн криг дромэ́стыр, ёнэ рискирдэ́ лэн дромэ́стыр пэ бэ́рги. Ёнэ гинэ́ тэ псирэ́н бэрга́тыр пэ бэ́ргица и ёнэ бистырдэ пэ́скиро штэ́то тэ откхинён.

⁷ Сарэ́, кон латхэлас лэн, ханас лэн, и лэ́нгирэ намала (вэ́рги) ракирдэ́: ‘Амэ на сам бангэ́, пал-дова́ со ёнэ кэрдэ́ грэ́хи проти Растэ-Дэвлэ́стэ, дрэ Савэ́стэ дживэ́ла чачипэ́н, Рай Дэвэ́л, Савэ́стыр ужакирдэ лачхипэ́н лэ́нгирэ дада́.

⁸ Израилёскирэ мануша́лэ, прастан Вавилоно́стыр, джа́н криг Халдеенгирэ пхувья́тыр; и явэ́н сыр бузнэ анги́л пэ́скиро ґурто.

⁹ Пал-дова́ со, акэ Мэ ґазда́ва и яна́ва пэ Вавило́но и кэдава кхэтанэ́ проти лэ́стэ барэ́ на́цыи паш-ратитконэ́ тхэмэстыр, и ёнэ явэ́на тэ кэдэнпэ тэ марэ́нпэ проти лэ́стэ, и ёнэ лэ́на Вавило́но. Лэ́нгирэ марибны́тка бустя́ (стре́лы) явэ́на сы́рбы одолэнгирэ, кон исын марибнаскирэ спе́цы, савэ́ на рисёна палэ ивья́ (дармэс).

¹⁰ И пхув Халдее́нгири явэ́ла пхагирды; сарэ́, кон росчорэла ла, явэ́на чалэ”, – ракирэ́ла Рай Дэвэ́л.

¹¹ ‘Пал-дова́ со тумэ́, мануша́ Вавилоно́стыр, радындлэпэ, и тумэ́ свэнкиндлэ кэ вучипэ́н, тумэ́, савэ́ росчордэ Миро мэкно́ миштыпэ́н – Мири́ нацыя. Тумэ́ радындлэпэ, ухнэ (ухтынэ) пэ́скэ сыр рэца (тёлка) пэ чар, и тумэ́ грымитындлэ сы́рбы ґэншта (граё).

¹² Тумари́ дай, Вавило́но, явэ́ла хор ладжакирды (дрэ бари ладж), ёй, сави́ яндя́ тумэн пэ свэ́то, явэ́ла тэ лолёл ладжатыр [ладжакирды-ю.о.]: ёй явэ́ла най тыкнэды́р сарэ́ нацые́ндыр: явэ́ла сы́рбы чхучи́ мал (степ), шуки́ пхув и чхучэ́ прахи.

¹³ Пир Ра́скирэ-Дэвлэ́скиро холякирибэ́н, пэ ла́тэ нико́н на явэ́ла тэ дживэ́л, и ёй явэ́ла сарэ́са чхучи́. Кажно (сва́ко) ману́ш, кон джа́ла пир Вавило́но, явэ́ла тэ путравэл якха́ трашатыр (тэ дивинэлпэ) и явэ́ла тэ дэл шоля (тэ свистинэл), сыр дыкхэ́ла марибны́тка фра́нсы.

¹⁴ Тэрден тумэ́ тэ марэ́нпэ проти Вавило́но, трусця́л лэ́стэ, сарэ́, савэ́ одтырдэна лу́ко; дэн карье́ дрэ лэ́стэ, на тангинэн (на жалинэн) бустя́, пал-дова́ со ёв кэрдя́ грэ́хо (бизо) проти Растэ-Дэвлэ́стэ.

¹⁵ Годлэн проти лэ́стэ сарэ́ трусця́л, пал-дова́ со ёв ґаздыя́ васт тэ поддэлпэ, фундаменты лэ́скирэ пынэ́, лэ́скирэ ва́нты радэ тэлэ́, пал-дова́ со дава́ Рай Дэвэ́л дукхавэла палэ, сыр ёв кэрдя́ адя́кэ, адя́кэ-паць кэрэ́н и тумэ́ лэ́скэ.

¹⁶ Чингирэн тэ хасёл одолэ́с, кон чхувэ́ла гив дрэ пхув дро Вавило́но, и кодолэ́с, саво́ рикирэ́ла серпо (чхиндло́), сыр тэ чхинэл гив, курталакирэ дара́тыр, сави́ явэ́ла тэ притасавэл, мэк со екх ману́ш тэ рисёл кэ пэ́скирэ мануша́, мэк со екх ману́ш тэ нашэ́л пэ пэ́скири пхув.’

Израилёскиро Рисибэн

¹⁷ ‘Мануша́ Израилёскирэ исын сы́рбы бакрэ́, савэ́ росчхурдынэ, кай якха́ дыкхэ́на, шчэра́ (левы) рострадынэ лэн криг: англэды́р кра́ли Асирия́киро похая лэн, и акана́, палатуно́ (после́днё) кадава́ Навуходоносо́ро, кра́ли Вавилоно́скиро, пхагирдя́ лэ́нгирэ кокалы́.’

¹⁸ Палдава́ адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: ‘Акэ, Мэ пхарэ́с сэндякирава крали́с Вавилоноскирэс и лэ́скири пхув, сыр Мэ пхарэ́с сэндякирдём крали́с Асириякирэс.

¹⁹ Нэ Мэ яна́ва палэ Израилё пэ лэ́скири чаритко фэ́лда (пажыть) и лэ́скирэ мануша́ явэ́на тэ чаравэнпэ пэ Кармило и Васа́но; и лэ́скиро ди явэ́ла чало пэ бэ́рга Ефраимо и Галаа́до.

²⁰ Дро долэ́ дывэса́ и дро дова́ часо’, – ракирэ́ла Рай Дэвэ́л, – ‘явэ́на тэ родэ́н чорипэ́н дро Израилё, нэ нисо́ на латхэ́на, и явэ́на тэ родэ́н грэ́хи Юдастэ, нэ ёнэ ничы́ на латхэ́на, нэ Мэ отмэка́ва банг кодолэ́нгэ, савэ́н Мэ ячкирава джидэнца (ракхава тэ дживэ́н).’

Сэ́ндо пэ Пхув Халдеенгири (Вавилония)

²¹ ‘Джа́н проти пхув Мэратаим и конэскирэ мануша́ гинэ́ криг дромэ́стыр. Чхучакир (пустошын) и розмар сарэ́са лэн, – ракирэ́ла Рай Дэвэ́л, – ‘и кэр саро́, со Мэ припхэндём ту́кэ.

²² Грукато [шумо-р.с.] марибнаскиро шундло пэ пхув и баро́ хасибэ́н.’

²³ Сыр дава́ млото (свиринд/хамло), со сыс пир сари́ пхув, яця́ чхиндло́ пэ котэра́ и пхагирдо́! Сыр да Вавило́но яця́ дивоса трашаса машки́р на́цыи?!

²⁴ Мэ росчхудём фэлы́ (сеть) пэ ту́тэ, Вавило́но, и тут адя́кэ-паць лэ́на, и ту на джиндян дава́. Тут латхнэ́ и лынэ́ дро пле́но пир дова́, со ту тэрдиян проти Растэ-Дэвлэ́стэ.

²⁵ Мэ, Рай Дэвэ́л, откэрдём Мири́ пиралы́, и Мэ лыджиём яври́ марибны́тка. Мирэ́ холя́тыр – пал-дова́ со Мэ, Сарэзорья́киро Рай Дэвэ́л, болыбна́скирэ-янголэ́нгиро, лыджа́ва Мири́ буты́ пэ пхув Халдее́нгири.

²⁶ Джа́н марибна́са пэ ла́тэ сарэ́ ягорэндыр (крае́ндыр) пэ пхув, псиравэн (откэрэн) ла́кирэ пираля́, счхувэн екх пэ екх сыр ґарбы, розмарэн сарэ́са дая́ пхув: мэк нисо́ тэ на ячэ́лпэ.

²⁷ Чхинэн сарэ́ ла́кирэ гурувэ́н: мэк ёнэ сарэ́ тэ джа́н тэл чхури! Бида пэ лэ́ндэ! Лэ́нгиро дывэ́с явдя́, соб (кай) лэн пхарэ́с тэ сэндякирэн.

²⁸ Шунэ́н манушэ́нгири зан (глос), савэ́ нашэ́на и ракхэнапэ Вавилоно́скирэ пхувья́тыр. Ёнэ подэна зан (звесь) дро Сио́но, со Рай Дэвэ́л, амаро́ Дэвэ́л дукхавэла палэ, Ёв дукхавэла палэ пал Лэ́скири Кхангири́.

²⁹ Кхарэ́н кхэтанэ́ сарэ́ карье́-дыибнаскирэн пэ лу́ко проти Вавило́но. Тэрдён кхэтанэ́ (табороса) сарэ́ трусця́л, кон одтырдэла лу́ко: соб (кай) ние́кх тэ на кэрэ́лпэ никай. Кэрэ́н чорипэ́н палэ лэ́скэ пир дова́, сыр ёв кэрдя́; пал сари́ лэ́скири буты́, со ёв кэрдя́, кэрэ́н и тумэ́ адя́кэ-паць лэ́скэ. Пал-дова́ со ёв яця́ пхутькирдо проти Растэ-Дэвлэ́стэ, проти Свэ́нто Израилё.

³⁰ Палдава́ лэ́скирэ тэрнэ́ мануша́ пэрэ́на пэ га́сы, и сарэ́ лэ́скирэ марибнаскирэ мурша́ хасёна дро дава́ дывэ́с, – ракирэ́ла Рай Дэвэ́л.

³¹ ‘Акэ, Мэ сом проти ту́тэ, пхутькирдо Вавило́но!’, – ракирэ́ла Рай Дэвэ́л, болыбна́скирэ-янголэ́нгиро; пал-дова́ со тыро́ дывэ́с явдя́, соб (кай) Мэ пхарэ́с тэ сэндякирав тут.

³² Най пхутькирдэ́ обштавэнапэ (обстэмпинэнапэ) и пэрэ́на, и ние́кх наґаздэла пэс. Мэ росхачкирава яг дрэ лэ́скирэ фо́рья, и ёй похала саро́ трусця́л лэ́стэ.’

³³ Адя́кэ ракирэ́ла болыбна́скирэ-янголэ́нгиро Рай Дэвэ́л: “Чхавэ́ [бияты-ю.о.] Израилёскирэ исын притасадэ, адя́кэ сыр и чхавэ́ [бияты-ю.о.] Юда́скирэ. Сарэ́, кон лынэ́ дро пле́но лэн, рикирэ́на лэн зоралэ́с; ёнэ отпхэнэнапэ тэ мэкэ́н лэн пэ во́ля.

³⁴ Лэ́нгиро Выракхибнаскиро исын зорало́; болыбна́скирэ-янголэ́нгиро Рай Дэвэ́л исын Лэ́скиро лав: Ёв добусовэс (старательнэс) обсэндякирэла (роскэдэла) лэ́нгиро рэ́ндо, соб (кай) ёв сашты́ (могинэл) тэ дэл откхиныбэн пхувьякэ, со исын тэл Халдее́ндэ, и напокоё (дар) манушэ́нгэ, кон дживэ́ла кэ Вавило́но.

³⁵ Курта́ла джа́ла пэ Халдее́ндэ, – ракирэ́ла Рай Дэвэ́л, – и пэ манушэ́ндэ, кон дживэ́ла кэ Вавило́но, и пэ лэ́скирэ тхагарье́ндэ и пэ лэ́скирэ годэ́ манушэ́ндэ.

³⁶ Курта́ла пэ подпхэныбнаскирэндэ [зумакирибнаскирэндэ-р.с.], и ёнэ явэ́на дылынинька. Курта́ла пэ сарэ́ марибнаскирэ муршэндэ, и ёнэ замэрэна дара́тыр.

³⁷ Курта́ла пэ лэ́нгирэ грэ́ндэ, и пэ марибнаскирэ вурдэна́, и пэ сарэ́ явирэ-родэнгирэ (мешанонэ) манушэ́ндэ, савэ́ исын машки́р лэ́ндэ, и ёнэ ячэ́на сыр джувля́. Курта́ла пэ лэ́нгирэ кучипэна, и лэ́ндыр лэн чорэна.

³⁸ Баро́ шукипэн тэ явэ́л пэ лэ́скирэ паня́, соб (кай) ёнэ тэ вышутён. Пал-дова́ со дая́ исын пхув вычхиндлэ́ муенца, и мануша́ одо́й ячнэ́ бигодякирэ пэ́скирэ даракунэ идолэндыр.

³⁹ Палдава́ рискирибна́скирэ мурдала́ малятыр/ степатыр [чхучэ́ прахэндыр-ю.о.] явэ́на тэ дживэ́н пэ дая́ пхув кхэтанэ́ шакалэнца, и страусы явэ́на тэ дживэ́н пэ дая́ пхув. Пэ дая́ пхув буты́р ние́кх ману́ш на явэ́ла тэ дживэ́л, и нико́н на явэ́ла пэ дая́ пхув родэндыр кэ ро́до.

⁴⁰ Сыр Дэвэ́л радя тэлэ́ Содо́мо и Гомо́ра и лэ́нгирэ пашатунэ́ фо́рья, адя́кэ-паць ние́кх ману́ш на явэ́ла тэ дживэ́л ада́й, и ние́кх чхаво́ манушэ́скиро на ячэ́лапэ тэ дживэ́л сыр чу́жо дро дава́ фо́ро.

⁴¹ Акэ, мануша́ джа́на паш-ратитконэ́ (севернонэ) рига́тыр, дая́ исын бари нацыя и бут кра́лья, савэ́ ґаздэ́напэ ягорэндыр (краендыр) пэ пхув.

⁴² Ёнэ рикирэ́на лу́ко и пика (лонхо), ёнэ исын бидескирэ, и ёнэ на потангинэна. Лэ́нгири зан исын сыр мо́рё (дэрья́в) брилинэла (шуминэла), ёнэ традэ́на уклистэ́ пэ грэ́ндэ, ёнэ кэдэнапэ тэ марэ́нпэ со кэ екх ману́ш кэ сарэ́ пэ ту́тэ, э чхай Вавилоноскири.

⁴³ О кра́ли Вавилоно́скиро шундя́ дая́ зан (звесь), сыр пхукадэ (пирипхэндлэ) пал лэ́ндэ, и лэ́скирэ васта́ ячнэ́ бизорья́кирэ. Илытко дукх ухтылдя лэс, дукха́, сы́рбы джувля́тэ, савья́ мэнчынэна дукха́ тэ биянэ́л.

⁴⁴ Акэ, вэ́рго Вавилоно́скиро, явэ́ла сыр шчэр (ле́во) Иорданоскирэ бэргицэндыр [хашчатыр/логовостыр-ю.о.] проти зорьякирдэ кхэратунэ штэ́ты, нэ Мэ кэра́ва адя́кэ, со ёв екха́тыр нашэла криг Вавилоно́стыр. Кон исын одова́ выкэдыно ману́ш, соб (кай) Мэ сашты́ (могинавас) тэ ґаздав лэс упрэ́ пэ лэ́стэ? Кон исын кадасаво́ сыр сом Мэ? Кон исын муршкано́ тэ пхучэлпэ Ма́ндыр отпхэныбэ́н? И кон исын адасаво́ чхупна́ри (пастырё), саво́ явэ́ла тэ тэрдёл проти Ма́ндэ?’”

⁴⁵ Палдава́ шунэ́н годо́ лав Ра́стыр-Дэвлэ́стыр, саво́ Ёв чхудя́ пэ годы́ проти Вавило́но и со Ёв камдя́ тэ придуминэл проти пхув Халдее́нгири: най тыкнэды́р лэ́нгирэ чхавэ́ндыр [стадатыр-р.с.] Мидянэнгирэ халадэ́ лыджа́на криг и, чачэс, Ёв – Рай Дэвэ́л – чхучакирэла (опустошынэла) лэ́нгиро кхэратуно штэ́то (кхэра́) кхэтанэ́ лэ́нца.

⁴⁶ Пхув явэ́ла тэ издрал годлатыр Вавилоно́стыр, ке́ли лэс лэ́на, и годлыпэн явэ́ла тэ шунэлпэ машки́р Наюды́тка на́цыи.