Ереме́ё 49 - Библия - Пэ Балтитко Романи чиб (Романэс) 2019

Сэ́ндо пэ Амоно

¹ Адя́кэ ракирэ́ла Рай Дэвэ́л пал Амоноскирэ чхавэ́ндэ: “Ци нанэ чхавэ́н дро Израилё? Ци нанэ лэ́стэ прилыибнаскиро (наследнико) пэ мэкно́ миштыпэ́н? Со́скэ тэды о Малхомо прилыя́ мэкно́ миштыпэ́н Гадостыр, и лэ́скирэ мануша́ дживэ́на дрэ Гадоскиро фо́рья?

² Палдава́, акэ, явэ́на дывэса́,” – ракирэ́ла Рай Дэвэ́л, – “со явэ́ла шундлы марибнаскири зан (глос) дрэ Рава Амоноскирэ-чхавэнгири. И далэ́ форо́стыр ячэ́напэ руинэнгирэ бэ́ргицы, и Равакирэ гава́ явэ́на хачкирдэ́ яга́са. Тэ́ньци Израилё лэ́ла палэ дая́ пхув сыр пэ́скиро миштыпэ́н одолэ́ндыр, кон лыя́ лэ́стыр,” – ракирэ́ла Рай Дэвэ́л.

³ “Тугин ясвэ́нца, Есевоне, пал-дова́ со Гаё (Аё) исын росчордо, дэн го́дла, чхая́ Раваскирэ, подпхандэн пэс балытконэ гонэнца! Ракирэ́н ясвэ́нца и прастан одори́к и палэ пир ва́нты; пал-дова́ со Малхомо джа́ла дро пле́но кхэтанэ́ лэ́скирэ рашанца и пэ́скирэ тхагарьенца.

⁴ Со́скэ ту барьякирэса пэс долэнца? Джин, со ёнэ ростхадэнапэ ратэ́са, ту, бунтуи́тко чхай Амоноскири! Сави́ гарадёла пал пэ́скиро кучипэ́н тэ зракхэлпэ, пхэни́: ‘Кон явэ́ла проти ма́ндэ?’

⁵ Акэ, Мэ яна́ва дар (траш) пэ тумэ́ндэ,” – ракирэ́ла болыбна́скирэ-янголэ́нгиро Рай Дэвэ́л, Дэвэ́л. “Кажно (сва́ко) тумэ́ндыр, кон исын тумэ́ндэ, явэ́ла традыно криг тэ нашэ́л пэ́скэ, кон карик: и на явэ́ла ние́кх ману́ш тэ кэдэл кхэтанэ́ кодолэ́н, кон нашнэ́.

⁶ Нэ пало́ (после) дова́ Мэ яна́ва палэ пленнонэ манушэ́н Амоностыр,” – ракирэ́ла Рай Дэвэ́л.

Сэ́ндо пэ Эдо́мо

⁷ Пал Эдо́мо адя́кэ ракирэ́ла болыбна́скирэ-янголэ́нгиро Рай Дэвэ́л: “Со нанэ буты́р годыпэ́н дро Фемано? Ци со барэ́-годякирэ мануша́ пириячнэ тэ дэн годы́ явирэ́нгэ? Ци со годыпэ́н нашадыя?

⁸ Нашэ́н, рискири пэ́скирэ думэ, бэшэ́н дрэ хор ґанбиня́ (ямы), мануша́лэ, савэ́ дживэ́на кэ Дедано, пал-дова́ со Мэ яна́ва Исавоскиро хасибэ́н пэ лэ́ндэ, – дава́ часо Мэ ява́ва тэ сэндякирав лэн.

⁹ Ко́ли явнэ́ винаградо-скэдыибнаскирэ кэ ту, то нау́што ёнэ тэ на мэкэ́н вари-кицы́ цэ́ла му́ри? Ко́ли явэ́нас чора раты́, то ёнэ чорэнас пэ́скэ ада́кицы, кицы́ лэ́нгэ трэй?!

¹⁰ Нэ Мэ росчхудём [рочхувава-р.с.] Исавос кэ нангипэ́н: Мэ откэрдём [откэрава-р.с.] сарэ́ лэ́скирэ чораханэ штэ́ты, и ёв на дэ́ла ра́да тэ гарадёл. Лэ́скирэ пала́л-явибнаскирэ чхавэ́ пир кхэри́тко ро́до (пле́мё) хасёна, лэ́скирэ пша́ла и лэ́скирэ сусе́ды (кота́рья), и ёв буты́р на явэ́ла.

¹¹ Мэкэ́н пэ́скирэ пиротэн (сиротэн) Ма́нгэ, и Мэ ява́ва тэ ракхав лэн, и мэк тырэ́ пивля (удовы) тэ патя́н зоралэ́с дрэ Ма́ндэ.

¹² Пал-дова́ со-адя́кэ ракирэ́ла Рай Дэвэ́л: “А́кэ, кодолэ́ яви́р Юды, савэ́нгэ на сыс присэндиндло тэ пьен тахта́й (чаша), дыкхэ́н, явэ́на тэ пьен тахта́й. И со да ту, Эдоме, джа́са криг, би сэндоскиро? Над, ту на кэрэсапэ никай, соб (кай) тэ выракхэспэ сэндостыр, и ту, чачэс [усае́кх-р.с.], явэ́са тэ пьес дава́ тахта́й.

¹³ Пал-дова́ со Мэ совлахадём Мирэ́ Лавэ́са”, – ракирэ́ла Рай Дэвэ́л, “со пэ Восоро (Хацоро) явэ́на тэ дивинэнпэ трашаса, лэ́скэ явэ́ла бипатыв, прокошыбэ́н (арман) и ёв ячэ́ла чхучо́. И сарэ́ лэ́скирэ форье́ндыр явэ́на ўса́ды / сак (всегда) чхучэ́ штэ́ты.”

¹⁴ Мэ шундём шуныбэ́н Ра́стыр-Дэвлэ́стыр и посло сыс бичхадо́ кэ Наюды́тка на́цыи тэ пхэнэ́л: ‘Кэдэнпэ кхэтанэ́, джа́н проти лэ́стэ, и тэрдён пэ марибэ́н!’

¹⁵ “И, акэ, Мэ кэра́ва ту́тыр, Эдоме, тыкнэс машки́р Наюды́тка на́цыи, со явэ́на тэ дыкхэ́н вучипна́са пэ ту́тэ.

¹⁶ Трашаибэ́н тыро́ хохадя тумэн и пхутькирибэ́н тырэ́-илэ́скиро притырдынэ тут, саво́ дживэ́ла машки́р скалакирэ шчэлі, и саво́ залэла вучипэ́н бэргицэнгиро! Мэк ту кэрдя́н пэ́скири гня́зда (ку́фо) адя́кэ вучэ́с, сыр о́рло (ки́до), нэ Мэ и одотхы́р тырдава [счхурдава-р.с.] тут тэлэ́,” – ракирэ́ла Рай Дэвэ́л.

¹⁷ ‘И явэ́ла Эдо́мо сыр ди́во трашаса; и кажно (сва́ко) ману́ш, кон явэ́ла тэ джал пашэ́, явэ́ла тэ дивинэлпэ трашаса, и ёв лэ́ла тэ дэл шоля (тэ свистинэл), сыр дыкхэ́ла сарэ́ лэ́скирэ мэрибнытка фра́нсы,

¹⁸ сыр сыс радэ тэлэ́ Содо́мо и Гомо́ра и лэ́нгирэ пашатунэ́ форицы’ – ракирэ́ла Рай Дэвэ́л, со ние́кх ману́ш на явэ́ла тэ дживэ́л одо́й, со ние́кх чхаво́ Манушэ́скиро на ячэ́лапэ тэ дживэ́л дрэ лэ́стэ.

¹⁹ Акэ, о Навуходоносо́ро ґаздэ́лапэ сыр шчэр (ле́во) Иорданоскирэ бэргицэндыр проти зорьякирдэ кхэратунэ штэ́ты, и Мэ зачхувава Эдо́мо тэ нашэ́л лэ́скирэ штэтэ́ндыр. И кон исын выкэдыно ману́ш, савэ́с Мэ ґаздыём упрэ́ пэ лэ́ндэ? Пал-дова́ со кон исын адасаво́ сыр Мэ сом? И кон пхучэлапэ отпхэныбэ́н Ма́ндыр? Кон выкхарэла Ман? И кон исын адасаво́ чхупна́ри (пастырё), кон дэ́ла ра́да тэ тэрдёл анги́л Ма́ндэ?

²⁰ Палдава́ шунэ́н годо́ лав Ра́стыр-Дэвлэ́стыр, саво́ Ёв чхудя́ тэды пэ Эдо́мо, со Ёв камдя́ тэ придуминэл пэ манушэ́ндэ, кон дживэ́на кэ Фемано: аж тыкнэ́-зорьякирэ Халдее́нгирэ гуртостыр явэ́на тэ тырдэн лэн криг; чачэс, ёнэ кэрэ́на лэ́нгирэ кхэратунэ штэ́ты чхучэ́.

²¹ Пхув явэ́ла тэ издрал шумостыр, ке́ли ёнэ пэрэ́на, и зан лэ́нгирэ годлатыр явэ́ла шундлы пэ Лоло́ мо́рё (дэрья́в).

²² Акэ, о вэ́рго ґаздэ́лапэ сыр о́рло (ки́до) и ёв явэ́ла тэ вурнял и тэ росчхувэл пэ́скирэ пхака́ упралэстыр пэ Восоро (Боцра). Дрэ дава́ дывэ́с ячэ́лапэ ило́ зоралэ́-муршэнгиро сы́рбы ило́ джувля́киро, савья́ мэнчынэна дукха́ тэ биянэ́л.

Сэ́ндо пэ Дама́ско

²³ Пал Дама́ско. – “Емафо [Хамато-ю.о.] и Арпадо ладжакирдэ́, пал-дова́ со ёнэ шундлэ́ фуй нэвипэн. Лэ́нгиро ило́ биладыя (замыя́) криг; мо́рё (дэрья́в) кунинэлапэ тугатыр; ёв на дэ́ла ра́да пэ́скэ тэ явэ́л штыл.

²⁴ Дама́ско яця́ бизорья́киро, и рисия́ тэ нашэ́л, дар (траш) ухтылдя лэс. Илытко дукх и туги лынэ́ зор пэ лэ́стэ сы́рбы пэ джувля́тэ, савья́ мэнчынэна дукха́ тэ биянэ́л.

²⁵ Сыр да славу́тно фо́ро на яця́пэ цэ́ло, фо́ро, савэ́стыр радынэнаспэ мануша́!

²⁶ Палдава́ тэрнэ́ мануша́ далэ́ форо́стыр пэрэ́на пэ лэ́скирэ вули́цы (га́сы), и сарэ́ марибнаскирэ мурша́ хасёна дро дава́ дывэ́с, – ракирэ́ла болыбна́скиро-янголэ́нгиро Рай Дэвэ́л.

²⁷ ‘Мэ росхачкирава яг пэ ва́нта Дамаскоскири, и ёй похала сарэ́ фэлатиня́ Венададоскирэ [Бэн-Хададоскирэ-ю.о.].”

Сэ́ндо пэ Кидаро и Асоро (Хазоро)

²⁸ Пал Кидаро и пал кралипэна́ Асороскирэ, савэ́ о Навуходоносо́ро, кра́ли Вавилоно́скиро, розмардя́. Адя́кэ ракирэ́ла Рай Дэвэ́л: “Уштэ́н, джа́н упрэ́ проти Кидаро и лучкирэн манушэ́н [чхавэ́н-р.с.] вастоко́стыр.

²⁹ Лэ́на лэ́нгирэ ша́тры и бакрэ́нгирэ ґурты, лэ́нгирэ пологи (покровы) дрэ ша́тры и сарэ́ лэ́нгирэ пирья, и лэ́нгирэ верблюдэн лыджа́на пэ́скэ Халдеи. Ёнэ явэ́на тэ годлэн: ‘Дар кажнонэ́ рига́тыр!’”

³⁰ “Нашэ́н, прастан дурэды́р адатхы́р, гарадён хор, мануша́лэ, кон дживэ́ла кэ Асоро,’” – ракирэ́ла Рай Дэвэ́л. ‘О Навуходоносо́ро, кра́ли Вавилоно́скиро, чхудя́ пэ годы́ тэ пэрэ́л пэ тумэ́ндэ, и ёв придуминдя плано проти тумэ́ндэ.

³¹ Ушты́, Навуходоносо́ро, джа́ пэ барвалы нацыя, со дживэ́ла би дара́киро’, – ракирэ́ла Рай Дэвэ́л, – ‘конэ́стэ нанэ ни по́рты, ни штабы, савэ́ дживэ́на кокорэ́ пэ́скэ.

³² Лэ́нгирэ верблюдэн сашты́ явэ́ла тэ лэн сыр дорэсыбэ́н, и бут-бут лэ́нгирэ мурдала́ явэ́на чордэ. И Мэ росчхувава тэ дживэ́н пэ сарэ́ балваля одолэ́н, савэ́ндэ яго́ры (краи́) пэ балэнгирэ пе́йсы исын обчхиндлэ́, и Мэ яна́ва биба́хт (би́да) пэ лэ́ндэ сарэ́ ригэ́ндыр’, – ракирэ́ла Рай Дэвэ́л.

³³ ‘Асоро явэ́ла штэ́то ваш шакалэнгэ тэ дживэ́н, и ёв усады (сак) (всегда) явэ́ла чхучо́, и ние́кх ману́ш на явэ́ла тэ дживэ́л одо́й и ниекхэ-манушэ́скиро чхаво́ на тэрдёла тэ дживэ́л одо́й’”

Сэ́ндо пэ Еламо

³⁴ Ра́скирэ-Дэвлэ́скиро лав, со сыс Еремеёскэ, пророкоскэ проти Еламо, ке́ли о Сэдэки́я, кра́ли Юдэя́киро, лыя́ тэ кралинэ́л:

³⁵ Адя́кэ ракирэ́ла Рай Дэвэ́л, болыбна́скирэ-янголэ́нгиро: “Акэ, Мэ пхагирава лу́ко Еламоскиро, са́мо-главныма лэ́нгирэ-зорьякири.

³⁶ Мэ яна́ва штар балваля штарэ́ ягорэндыр пэ болыбэ́н, и Мэ росчхувава тэ дживэ́н лэн пир сарэ́ далэ́ балваля; и на явэ́ла ние́кх нацыя, кэ сави́, соб (кай) тэ на явэ́н бикхэрэскирэ Еламостыр.

³⁷ Мэ кэра́ва адя́кэ, соб (кай) мануша́ Еламостыр тэ замэрэн дара́тыр анги́л лэ́нгирэ вэргэ́ндэ, и анги́л одолэ́ндэ, кон родэ́ла лэ́нгиро ди. Мэ яна́ва бари биба́хт (би́да) пэ лэ́ндэ, Мири́ зоралы́ холы́” – ракирэ́ла Рай Дэвэ́л, – ‘и Мэ бичхава́ва курта́ла пал лэ́ндэ адя́кэ ґара́ (длу́гэс), анги́л Мэ домарава лэн.

³⁸ И Мэ чхува́ва Миро троно дро Еламо, и Мэ мулякирава лэ́нгирэ кралье́н и тхагарьен’ – ракирэ́ла Рай Дэвэ́л.

³⁹ ‘Нэ дро са́мо ко́нцо (яго́ро) дывэсэнгиро Мэ яна́ва палэ пленонэн Еламоскирэн’” – ракирэ́ла Рай Дэвэ́л.